३५ लाख दिएर स्कुलको नाम परिवर्तन

प्रस्ताव साधारणसभाबाट पारित गरेर गाउँपालिकाले विद्यालयको नाम परिवर्तन गरिदिएपछि साबिक ठोट्ने आधारभूत विद्यालय ढुंगेसाँघु–८ बरडाँडा अब ठोट्ने सिंगराज–मनरानी आधारभूत विद्यालय मैवाखोला–२ (चुम्लोक लेकुवा) भएको हो । प्रधानाध्यापक चित्र लिम्बूले नाम परिवर्तनको जानकारी गाउँपालिका, शिक्षा समन्वय इकाई, जिल्ला समन्वय समिति, प्रदेश सरकार, शिक्षक किताबखाना, नागरिक लगानी कोष, कर्मचारी सञ्चय कोष, संघीय शिक्षा मन्त्रालय र चन्दादातालाई गराइएको बताए ।

गाउँपालिकाका तत्कालीन प्रमुख प्रशासकीय अधिकृत गणेश अधिकारीले शिक्षा ऐनमा भएको व्यवस्थाअनुसार नाम र ठेगाना परिवर्तन गरिएको बताए । शिक्षा इकाईका अनुसार चन्दादाताको नाममा विद्यालयको नाम परिवर्तन भएको यो दोस्रो विद्यालय हो ।

यसअघि फक्ताङलुङ गाउँपालिका–६ लेलेपको सरस्वती माविलाई सरस्वती च्यारिबुक मावि बनाइएको थियो । च्यारी विदेशी नागरिक हुन् । ठोट्नेमा सिंगराज र मनरानीका आठ सन्तानले २७ लाख लगानी गरेर खेल मैदान बनाइदिएको प्रधानाध्यापक लिम्बूले बताए । यो ९५ मिटर लम्बाइ र ३२ मिटर चौडाइको छ । यसका लागि ९ रोपनी २ आना जमिन सिंगराज–मनरानीका जेठा छोरा मकरध्वजले विद्यालयका नाममा पास गरिदिएका छन् । विद्यालय स्थापना हुँदा ९ रोपनी १४ आना जमिन पनि आफूहरूले नै दिएको मकरध्वजले बताए ।