गद्दी बैठक सबैका लागि खुला

भूकम्पपछि अमेरिकी सहयोगमा निर्माण गरिएको उक्त गद्दी बैंठक पहिले सर्वसाधारणका लागि हेर्न खुला थिएन । अवलोकनका लागि तोकिएको प्रवेश जाँच–स्थलमा दर्ता आवश्यक हुनेछ । नेपाल भ्रमण वर्ष २०२० कै अवसर पारेर नेपाली र विदेशी पर्यटकहरूले पनि गद्दी बैठकको अवलोकन गर्न सक्नेछन् ।

गद्दी बैठक दरबार सन् १९०८ देखि नै उक्त दरबार क्षेत्रको चिनारी रही आएको छ । बैठकको मुख्य कक्ष भ्रमणका लागि उपलब्ध हुनेछ भने यसको भूइँ तलामा संग्रहालय रहने छ । केही समयपछि खुल्ने उक्त संग्रहालयमा नेपाली इतिहास र संस्कृतिका दुर्लभ पुरातात्तिवक वस्तु रहने छन् ।

अमेरिकी सरकारको सांस्कृतिक संरक्षणका लागि राजदूत कोष (एएफसीपी) ले गद्दी बैठक र प्रवेशद्वार भवनलाई संरचनात्मक रूपमा सुदृढ बनाउन नौ लाख डलर बराबरको अनुदान गरेको अमेरिकी राजदूतावासले जनाएको छ ।