कान्तिपुर वेबसाईट
AdvertisementAdvertisement

प्रदेशको राजधानी केही दिनभित्र टुंगिन्छः दाहाल

सुवास विडारी

मकवानपुर — पूर्वप्रधानमन्त्री तथा नेकपाका अध्यक्ष पुष्पकमल दाहालले प्रदेशको स्थायी राजधानी र नामाकरणहरु केही दिनमै टुंगिने दाबी गरेका छन् ।

मंगलबार बिहान प्रदेश ३ का मुख्यमन्त्री डोरमणि पौडेलको निवासमा हेटौंडामा कार्यकर्ता तथा सञ्चारकर्मीहरुसँगको संक्षिप्त भेटघाटको क्रममा दाहालले प्रदेश संरचनाहरुको नामाकरण र स्थायी राजधानी टुंग्याउने विषय टुंग्याउने विषयमा प्रदेश सरकारलाई सहयोग गर्न आफू तयार रहेको बताए । ‘कतिपय प्रदेशहरुले नामाकरण र स्थायी राजधानी टुंग्याइसकेका छन् । बाँकी रहेकाहरुको अब केहि दिनभित्र टुंगिन्छ । म सरकारलाई आवश्यक सहयोग गर्नेछु । अब यस विषयलाई दुविधामा राख्नुहुँदैन ।’, उनले भने ।


दाहालले पार्टी र सरकारमा दुईवर्षदेखि देखिएको संक्रमणकाल सकिएको दावी गरे । ‘दुई वर्षदेखि पार्टी–सरकारमा देखिएको संक्रमणकाल टुंगिएको छ । पार्टीमा रहेका दुईजना अध्यक्षले कार्यविभाजन गरेका छौं । धेरै कन्फ्युजहरु हटेका छन् । अब विकासको कामले तीब्रता पाउनेछन्,' दाहालले भने, ‘संविधानअनुसार तोकिएको समयभित्र बनाउनुपर्ने ऐनहरु तयार भएका भएका छन् । अब संक्रमणकाल छैन । कर्मचारी समायोजनलगायतका विषयहरु टुंगिएका छन् ।’


उनले देशमा ७२ वर्षदेखि रहेको राजनीति अराजकता हटाउनका लागि तत्कालीन एमाले र माओवादी केन्द्रबीच एकता भएको दाबी गर्दै अहिले पार्टीले प्राप्त गरेको जनमतलाई सदुपयोग गर्न जरुरी रहेको औंल्याए ।


कार्यकर्ता तथा सञ्चारकर्मी भेटघाट अगाडि दाहालले मुख्यमन्त्री डोरमणि पौडेल, प्रदेश ३ का सभामुख सानुकुमार श्रेष्ठ, आन्तरिक मामिला तथा कानुन मन्त्री शालिकराम जम्मकट्टेल, सामाजिक विकास मन्त्री युवराज दुलाल, भूमि व्यवस्था कृषि तथा सहकारी मन्त्री दावादोर्जे लामासँग प्रदेशको राजधानीको विषयलाई कसरी टुंग्याउने भन्ने विषयमा करिब ४५ मिनेट छलफल गरेका थिए ।

प्रकाशित : मंसिर १०, २०७६ १२:१८
प्रतिक्रिया
पठाउनुहोस्

पूर्वाधार विकास साझेदारी : सडकलाई दुई तिहाइभन्दा बढी बजेट

सुवास विडारी

(मकवानपुर) — मकवानपुर जिल्लाका प्रतिनिधिसभाका दुई सांसदले पूर्वाधार विकास साझेदारी कार्यक्रमको करिब दुई तिहाइ बजेट सडक निर्माण र मर्मतका लागि विनियोजन गरेका छन् । सम्बन्धित निर्वाचन क्षेत्रका सांसदमार्फत योजना छनोट गर्ने गरी दिइएको पूर्वाधार विकास साझेदारी कार्यक्रमको चालू आर्थिक वर्षको बजेट सडक निर्माण तथा सुधारमै केन्द्रित गरिएको छ । 

प्रतिसांसद ६ करोडका दरले मकवानपुरमा प्राप्त १२ करोडमध्ये ८ करोड १० लाख रुपैयाँ सडक निर्माणका लागि विनियोजन गरिएको छ । क्षेत्र नम्बर १ का सांसद कृष्ण दाहालले छनोट गरेको २४ वटा योजनामध्ये १४ योजना सडककै रहेका छन् । उनले प्राप्त गर्ने ६ करोडमध्ये ४ करोड ४० लाख रुपैयाँ सडकमै सकिनेछ ।

क्षेत्र नम्बर २ का सांसद विरोध खतिवडाले पनि आफूमार्फत् बन्ने योजनामध्ये झन्डै आधाभन्दा बढी बजेट सडकलाई नै खर्च गर्नेगरी योजना सिफारिस गरेका छन् । प्राप्त हुने ६ करोडमध्ये ३ करोड ७० लाखको सडक योजना बनेको छ । खतिवडाले बनाएको २५ वटा योजनामध्ये १५ योजना सडक पूर्वाधार निर्माणकै रहेका छन् ।

‘निर्वाचन क्षेत्रका जनताले सडकको माग गरेपछि सोहीअनुसार बजेट विनियोजन गरिएको हो । विकट क्षेत्रमा पुग्न पहिलो आवश्यकता सडक भएकाले पनि महत्व दिइएको हो,’ सांसद खतिवडाले भने । क्षेत्र नम्बर १ अन्तर्गत बकैया गाउँपालिकाको सुधा, अल्छे, भोगटे, टिकुली, भालुखोला–रतनपुर सडकको लागि ५० लाख रुपैयाँ छुट्याइएको छ । हेटौंडाको पवित्रटोल सडक र गढी गाउँपालिकाको एक्लेखेत, धाप, रानीसेरा ग्रामीण सडकको लागि ५०/५० लाख गरी एक करोड रुपैयाँ विनियोजन गरिएको छ ।

हेटौंडा ६ र ७ मा शान्तिपथ कृषि सडकका लागि ५० लाख र १५ नम्बर वडाको कालीदेवी चोकदेखि भोर्ले स्वास्थ्यचौकीसम्मको सडकमा ५० लाख रुपैयाँ खर्च गर्ने योजना बनाइएको छ । हेटौंडा–९ कै शान्तिकुञ्जपथ भित्री सडक निर्माणमै ४५ लाख रुपैयाँको योजना बनाइएको छ । बकैयाको दोभान–बिजलडाँडा सडक र भीमसेन दमार–मोरङे आहाले भञ्ज्याङ सडकका लागि २५/२५ लाख रुपैयाँ छुट्याइएको छ ।

सांसद दाहालले हेटौंडा–१७ को सानो गगटे ठाडो बाटो सडकका लागि २० लाख रुपैयाँको योजना बनाएका छन् । मकवानपुरगढीमा दुई कृषि सडकका लागि ४० लाख रुपैयाँ छुट्याइएको छ । गढीको मोड भञ्ज्याङ–तितुङडाँडा–मापुङ कृषि सडक र पीपलबोट धमिले कृषि सडकका लागि पूर्वाधार विकास साझेदारी कार्यक्रमको २०/२० लाख रुपैयाँ बजेट खर्च गरिनेछ ।

सांसद् खतिवडाले इन्द्रसरोवर गाउँपालिकाको बज्रमाठ सिकारी गाउँ–मागे पौवा सडकको लागि ५० लाख रुपैयाँ छुट्याएका छन् भने राक्सिराङ गाउँपालिकाको डुङ्गु परेवाभीर सडकका लागि पनि ५० लाखकै योजना सिफारिस गरिएको छ । त्यसैगरी खतिवडाले मानेडाँडा–हालवारी–अल्छे कप्चरी सडक र मनहरी गाउँपालिकाको बसन्तपुर–डिल्लीपुर सडकको लागि पनि ५०/५० लाख रुपैयाँ छुट्याएका छन् ।

मकवानपुरगढीको वासुदेवमार्ग–तिपधारा सुकौरा खण्डमा ३० लाख र सोही गाउँपालिकाको ज्यामिरे–चन्द्रसूर्य पेटिकोट कृषि सडकको लागि २५ लाखको योजना बनाइएको छ । राक्सिराङमा डुङ्चु–राम्चे सडक र टोडर्के–तर्सिकोट सडकका लागि १०/१० लाख खर्च गर्ने तयारी गरिएको छ ।

प्रकाशित : मंसिर ६, २०७६ ०८:४९
पूरा पढ्नुहोस्
प्रतिक्रिया
पठाउनुहोस्
×