विभागलाई म्यानपावर व्यवसायीले भन्यो, ‘हामीसँग सहकार्य गरी निर्णय गर्नु’

कान्तिपुर संवाददाता

काठमाडौँ — वैदेशिक रोजगार व्यवसायी संघले आफूहरुसँग सहकार्य गरेर मात्रै वैदेशिक रोजगार व्यवसायीसँग सम्बन्धित निर्णय गर्न माग गरेको छ ।

प्रधानमन्त्री केपी शर्मा ओलीले श्रम, रोजगार तथा सामाजिक सुरक्षामन्त्री गोकर्ण विष्टलाई मन्त्रिपरिषद्‌बाट हटाएको दोस्रो दिन म्यानपावर व्यवसायीले चेतावनीसहित वैदेशिक रोजगार विभागलाई यस्तो माग गरेको हो । शून्य लागतको नीति लिँदा र म्यानपावरलाई कडाई गर्दा रेमिट्यान्समा असर पुगेको भन्दै ओलीले विष्टलाई मन्त्रीबाट हटाएका थिए ।

‘व्यवसायीले यसरी सहकार्यको अपेक्षा गरे तापनि वैदेशिक रोजगार विभागले कुनै सम्पर्क, सम्वाद, सहकार्य र छलफल नगरी एकतर्फी रुपमा एक पछि अर्को गर्दै विभिन्न निर्णय गर्ने, विभिन्न कागजात माग गर्ने र नयाँ नयाँ प्रावधानहरु लागू गर्नेजस्ता कार्यले व्यवसायीमा द्विविधा उत्पन्न भएको देखिन्छ,’ महासचिव सुचितकुमार श्रेष्ठद्वारा जारी विज्ञप्तिमा भनिएको छ, ‘एकतर्फी रुपमा गरिएका निर्णय र प्रावधानले सकारात्मक परिणाम नदिने भएकाले आगामी दिनमा ईजाजतपत्र प्राप्त वैदेशिक रोजगार व्यवसायीसँग सम्बन्धित निर्णय, प्रावधानहरु लागू गर्दा नेपाल वैदेशिक रोजगार व्यवसायी संघसँग सहकार्य गरी निर्णय, प्रावधान लागू गर्न/गराउन वैदेशिक रोजगार विभाग लगायत सम्बन्धित निकायमा अनुरोध गरिन्छ ।,’

प्रकाशित : मंसिर ६, २०७६ १८:३५
प्रतिक्रिया
पठाउनुहोस्
ADVERTISEMENT

रोजगारदाता छाडेर भाग्ने कामदारलाई साउदीमा आजीवन प्रतिबन्ध

६ महिना जेल, ५० हजार रियाल जरिवाना
९ हजार नेपालीले टेलिफोनबाट दूतावासमा आफ्ना समस्या टिपाए  
होम कार्की

काठमाडौँ — साउदी अरबले करार अवधि नसकी रोजगारदाता छाडेर अवैध रुपमा बस्ने कामदारलाई पुनः साउदी प्रवेशका लागि आजीवन प्रतिबन्ध लगाउने भएको छ । आप्रवासी कामदारले रोजगारदाता छाडेर अर्को कम्पनीमा काम गर्नेक्रम बढ्न थालेपछि यस्तो नयाँ कानुन जारी गरेको हो । त्यस्ता कामदारलाई थप ६ महिना जेल र ५० हजार रियाल जरिवानासमेत तिर्ने नियम ल्याएको साउदीको अध्यागमन विभागले जनाएको छ ।

रियादस्थित नेपाली दूतावासले समेत नेपाली कामदारलाई रोजगारदाता छाडेर अन्यन्त्र नजान अपिल गरेको छ । ‘साउदीमा हप्ता/दस दिनमा नै कम्पनी राम्रो नरहेको, भने अनुसार सुविधा नदिइएको, मेडिकल नगरेको, मेसको खानाले आफूलाई सञ्चो नगरेको, बिरामी हुँदा कम्पनीले उपचार नगरेको लगायत कारण देखाइ काम छोड्ने नेपालीको संख्या पछिल्ला दिनमा बढेको देखिन्छ’, दूतावासद्वारा जारी सूचनामा छ, ‘तसर्थ, साउदी अरबमा आइसकेपछि यहाँको रोजगारीमा कफला पद्धतिको भूमिकाबारे थोरै भए पनि जानकारी राख्न अनुरोध छ ।’

‘काम मन परेन भनेर गरिरहेको काम छोड्ने काम गर्दै नगर्नुहोस् । यसले समस्या समाधानमा झन् जटिलता थप्ने एवं कफिललाई मात्र बलियो बनाउँछ । तपाईंका समस्या राजदूतावासमा राख्नुहोस् तर काम र आवास नछाड्नुहोस्’, दूतावासले भनेको छ, ‘दूतावासले समस्या समाधानमा गर्ने प्रयासमा रोजगारदाता (कफिल) र तपाईंलाई नेपालबाट पठाउने म्यानपावर व्यवसायीले गर्ने सहयोगमा निर्भर गर्दछ । राजदूतावासमा समस्या राख्दा बढाइचढाइ दोषारोपण मात्र गर्ने प्रकारले नराख्नुस्, यथार्थ समस्या राख्नुहोस् ।’

काम र आवासमा रहेर नै समस्या समाधान सहज हुने दूतावासको भनाइ छ । पछिल्लो ४ महिनामा मात्रै दूतावासले १ सय ६ जना भागेका कामदारलाई स्वदेश पठाएको छ । दूतावासले समयमा तलब नपाएका १९ सय २६ जनालाई तलब दिलाएको, एक सय ११ जनालाई बहिगर्मन भीसा दिलाएको, १३ सय ७६ कामदारको अकमा (परिचयपत्र) नवीकरण गरेको जनाएको छ । दूतावासमा झन्डै ९ हजार कामदारले टेलिफोनबाट आफ्ना समस्या टिपाएका थिए ।

प्रकाशित : मंसिर ६, २०७६ १७:५५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×