राजपुर फरदहवा बमकाण्डका साक्षीलाई प्रहरीको सुरक्षा

अदालतले मुलुकी फौजदारी कार्यविधि संहिता २०७४ को दफा ११४ (२) र मुलुकी फौजदारी कार्यविधि २०७५ को नियम ६१ बमोजिम पीडित, जाहेरीकर्ता, साक्षीको उचित व्यवस्थापन गर्न आदेश दिएको थियो । कर्तव्य ज्यान, ज्यान मार्ने उद्योग र विस्फोटक पदार्थ भण्डारणको आरोपमा पक्राउ परेका कांग्रेस नेता एवं पूर्वमन्त्री मोहम्मद आफताब आलमको मुद्दाबारे अदालतमा थुनछेक बहस चलिरहेका बेला विस्फोटका घाइते भारतीय नागरिक गौरीशंकर रामलाई अपहरण गरेर बयान फेर्न लगाइएको घटना बाहिर आएको थियो । यस्तै मृतक ओसी अख्तरकी श्रीमतीलाई आर्थिक प्रलोभन तथा मानसिक तनाव दिई श्रीमान् जिउँदै छ भनेर अदालतमा जाहेरी दिन लगाइएको थियो ।

घटनाका घाइते रामको सुरक्षा व्यवस्थाका लागि प्रहरी प्रधान कार्यालयले भारतीय सुरक्षा अधिकारीलाई अनुरोध गरेको छ । जिल्ला प्रहरी प्रमुख एसपी भूपेन्द्र खत्रीले राजपुर घटनाका सरोकारवाला अधिकांशको सुरक्षा व्यवस्था गरिएको बताए । ‘२० जना जति साक्षी, घाइते, मृतक परिवार र प्रत्यक्षदर्शीको सुरक्षाका लागि निगरानी गरिरहेका छौं,’ उनले भने, ‘साक्षीको सुरक्षामा कुनै कसर बाँकी राख्दैनौं ।’

पहिलो संविधानसभा निर्वाचनको अघिल्लो दिन भएको बम विस्फोटमा छोरा गुमाएका सरुअठाका श्रीनारायण सिंहलाई सबैभन्दा बढी सुरक्षा चुनौती रहेको प्रहरीको आकलन छ । उनको सुरक्षाका लागि हतियारसहित प्रहरी परिचालन गरिएको छ ।

विस्फोटमा ज्यान गुमाएका ओसी अख्तरको परिवारका लागि समेत सुरक्षा व्यवस्था मिलाइएको छ । ओसीकी आमा रुक्साना खातुनले आलमविरुद्ध जाहेरी दिएकी थिइन् । उनको ०६७ माघ १० गते माइतीबाट घर आउँदै गर्दा गौंडा कुरेर बसेको हतियारधारी समूहले गोली हानी हत्या गरेको थियो ।

प्रहरीले घटनाका साक्षीहरू बसेको स्थानमा सुरक्षाकर्मी परिचालन गरी निगरानी गरिरहेका छन् । ‘कस्ता मानिस भेट्न आउँछन्, कसले के भन्छन्, बयान फेर्न दबाब दिन्छन् कि दिँदैनन् भनेर हेरिरहेका छौं,’ एसपी खत्रीले भने ।

अदालतले आलमलाई पुर्पक्षको आदेश गरिसकेको छ ।

‘अब साक्षीलाई जोगाउने जिम्मा हाम्रो हो,’ डीएसपी नवीन कार्कीले भने । पक्रन गएका बेला आलमले डीएसपी कार्कीलाई समेत धम्क्याएका थिए । आलमका मानिसले घटनासित सरोकार राख्ने अधिकांशलाई डर देखाउने, धम्की दिने र आर्थिक प्रलोभनमा पार्ने काम गरेपछि अदालतले साक्षीको सुरक्षाको आदेश गरेको हो ।

असोज २६ गते पक्राउ परेका आलमलाई कात्तिक २९ गते अदालतले पुर्पक्षका लागि कारागारमा राख्न आदेश दिएको थियो । उनलाई आदेश भएकै राति ललितपुरको नख्खु कारागार लगिएको थियो । आलम आपराधिक मनोवृत्तिका भएकाले डर लाग्नु स्वाभाविकै भएको जाहेरीकर्ता श्रीनारायणले बताए । ‘अदालतको आदेशबाट छुटेको भए हामीलाई ज्यानको खतरा हुन्थ्यो,’ उनले भने, ‘अहिले पनि उनका मानिसहरू बदला लिने चक्करमा हिँडेका होलान् ।’

बम विस्फोटका घाइते भएका भारतीय नागरिक गौरीशंकर राम र सर्लाही गडैता २ पिपराटोलका सफी अहमदलाई प्रहरीले उच्च सुरक्षा प्रदान गरेको छ । राम र अहमदले प्रहरीसमक्ष आलमविरुद्ध ज्यान मार्ने उद्योगमा जाहेरी दिएका थिए । रामलाई आलमका मानिसले घरबाट लगेर चार दिनसम्म बन्धक बनाई स्टोभ पड्केर घाइते भएको भन्ने व्यहोराको कागजमा हस्ताक्षर गर्न लगाएका थिए । रामले त्रासमा सही गरेका थिए । पछि उनले अदालतसमक्ष ज्यानको सुरक्षाको मागसहित निवेदन दर्ता गराए ।

बम विस्फोट घटनाका साक्षीहरूलाई समेत आलमका मानिसले पछ्याइरहेको प्रहरीले सुराकी पाएको छ । उनीहरूका लागि समेत सुरक्षा व्यवस्था मिलाइएको प्रहरीले जनाएको छ ।

फरारको खोजी

राजपुर बमकाण्डका प्रतिवादी भनिएका फरार १० जनाको खोजी तीव्र पारिएको प्रहरीले जनाएको छ । घटनामा आलम मात्र पक्राउ परेका छन् । उनका भाइ महताब आलमलगायत भने फरार छन् । ‘हामीले फरारको खोजीका लागि प्रहरी परिचालन गरिसकेका छौं,’ एसपी खत्रीले भने । आलम पछिल्लोपटक पक्राउ परेपछि प्रहरीले गरेको अनुसन्धानका क्रममा ६ जना प्रतिवादी थपिएका हुन् ।