कान्तिपुर वेबसाईट
AdvertisementAdvertisement

प्रधानमन्त्रीले मन्त्रीहरुलाई भने, 'भोलि मन्त्रिपरिषद् हेरफेर हुन्छ, यसमा अन्यथा नमान्नु होला'

बबिता शर्मा

काठमाडौँ — प्रधानमन्त्री केपी शर्मा ओलीले मन्त्रीहरुलाई आफूले मन्त्रिपरिषद् पुनर्गठन गर्न लागेको जानकारी दिएका छन् । 


मंगलबार प्रधानमन्त्री निवास बालुवाटारमा बसेको मन्त्रिपरिषद्को बैठकमा मन्त्रिपरिषद् पुनर्गठन गर्न लागेको जानकारी दिँदै बुधबार काठमाडौं उपत्यका भन्दा बाहिर कार्यक्रम नबनाउन पनि निर्देशन दिएका छन् ।


‘कोही पर्नुहोला, कोही नपर्नुहोला । भोलि म मन्त्रिपरिषद हेरफेर गर्दै छु,' प्रधानमन्त्रीले बैठकमा भनेको भनाई उद्धत गर्दै एक मन्त्रीले भने, ‘अहिलेसम्म साथ दिनुभयो त्यसका लागि धन्यवाद । भोलि तपाँईहरु कसैले औपचारिक कार्यक्रम नराख्नुहोला ।’


बैठकमा को–को मन्त्री रहने, को हट्ने भन्नेबारे भने प्रधानमन्त्री ओलीले कुनै जानकारी नदिएको ती मन्त्रीले बताए ।


प्रधानमन्त्रीले सम्भवतः बुधबार मन्त्रिपरिषद् हेरफेर गर्नेछन् ।


प्रधानमन्त्री ओलीले मंगलबारको मन्त्रिपरिषद् बैठकमा मन्त्रिपरिषद् हेरफेर गर्ने जानकारी दिए पनि यस विषयमा प्रधानमन्त्री ओली र नेकपा अध्यक्ष पुष्पकमल दाहालबीच समझदारी हुन बाँकी छ । मंगलबार दाहालसँग भेट गरेका नेकपाका एक स्थायी कमिटी सदस्यका अनुसार ओली र दाहालबीच मन्त्रिपरिषद् हेरफेरबारे अन्तिम सहमति हुन बाँकी छ ।


सोमबारको भेटमा ओली र दाहालबीच बुधबार विहान बसेर मन्त्रिपरिषद् हेरफरेको विषयमा थप छलफल गर्ने सहमति भएको थियो । तर, मंगलबार नै प्रधानमन्त्रीले बुधबार मन्त्रिमण्डल हेरफेर गर्ने जानकारी मन्त्रीहरुलाई दिएका छन् । केही मन्त्री राख्ने वा हटाउने विषयमा ओली र दाहालबीच मतभेद थियो । त्यसैबीच नेकपाले बुधबार बिहान सचिवालय बैठक बोलाएको छ ।

प्रकाशित : मंसिर ३, २०७६ २०:१९
प्रतिक्रिया
पठाउनुहोस्

मधेसवादी दलको माग पूरा गर्न संविधान संशोधन हुन्छः दाहाल

कान्तिपुर संवाददाता

परासी — नेकपा अध्यक्ष पुष्पकमल दाहालले संविधान कैयौं पटक संशोधन हुन सक्ने बताएका छन् । मधेसी दल सरकारमा सहभागी हुँदा संघीय समाजवादी दलसँगको दुईबुँदे सहमतिअनुसार आफैंले संविधान संशोधनको प्रस्ताव दर्ता गराए पनि विविध कारणले संशोधन हुन नसकेको उनको भनाइ छ । 

‘अहिले नै संशोधन भएन भनेर तर्सिनुपर्ने अवस्था छैन,’ परासीमा मंगलबार व्यापार मेला उद्घाटन गर्दै दाहालले भने, ‘संविधान सात पटक मात्र होइन, कैयौं पटक संशोधन हुन सक्छ ।’

सहकार्य र एकताबाटै मुलुकलाई अगाडि बढाउने चाहनाअनुरूप आफ्नो पार्टी र सरकारले मधेसवादी दलको माग पूरा गर्न संविधान संशोधन गर्ने उनले दाबी गरे ।

संक्रमणकाल भएकाले सबैको माग एकैपटक पूरा गर्न नसकिएको दाहालले बताए । निजी क्षेत्रसँगको सहकार्यबाट आर्थिक समृद्धि हासिल गर्न सरकारले लगानीमैत्री वातावरण बनाएको भन्दै उनले ढुक्क भएर उद्योग व्यवसाय सञ्चालन गर्न आग्रह गरे ।

व्यापार मेला आगामी १५ गतेसम्म चल्नेछ । दाहालले मंगलबारै भैरहवामा पाँचौं लुम्बिनी पर्यटन प्रवर्द्धन, औद्योगिक व्यापार तथा कृषि महोत्सव पनि उद्घाटन गरेका छन् ।

प्रकाशित : मंसिर ३, २०७६ १९:४३
पूरा पढ्नुहोस्
प्रतिक्रिया
पठाउनुहोस्
×