चिकित्सा शिक्षा आयोग निर्देशकमा ४ सिफारिस

कान्तिपुर संवाददाता

काठमाडौँ — चिकित्सा शिक्षा आयोगको निर्देशकका लागि चार जनाको नाम सिफारिस गरिएको छ । चिकित्सा शिक्षा ऐनको प्रावधानअनुसार सिफारिस समितिले डा. दिलीप शर्मा, डा. रमेश आचार्य, डा. आरपी शाह र डा. सगरत्न बज्राचार्यको नाम सिफारिस गरेको हो ।

ऐनमा आयोगको कार्यसम्पादनका लागि चारवटा निर्देशनालय तथा बोर्ड रहने व्यवस्था छ । राष्ट्रिय योजना आयोगका सदस्य उषा झाको संयोजकत्वमा निर्देशकहरूको नाम सिफारिस समिति गठन भएको थियो ।

सिफारिसमा परेकाहरू समितिमा आवेदन दिएका २६ जनामध्येका हुन् । ऐनले आयोगमा मापदण्ड तथा प्रत्यायन, योजना, समन्वय तथा प्राज्ञिक उन्नयन, परीक्षा निर्देशनालय र नेसनल बोर्ड अफ मेडिकल स्पेसियालिटिज रहने व्यवस्था गरेको छ । सिफारिस समितिले नाम पठाए पनि बैठक डाकेर मात्र नियुक्तिको निर्णय लिइने आयोगले जनाएको छ ।

आयोगका अध्यक्ष तथा प्रधानमन्त्रीले सिफारिस समिति गठन गर्ने र उपाध्यक्षलाई निर्देशकहरूको नाम सिफारिस गर्ने प्रावधान छ । उपाध्यक्षले नै निर्देशकहरूलाई नियुक्ति दिनेछन् । ऐनमा निर्देशनालय वा बोर्डको प्रमुखका रूपमा कार्य गर्न प्रत्येक निर्देशनालय वा बोर्डमा एक/एकजना पुरा समय काम गर्ने निर्देशक रहने व्यवस्था छ ।

निर्देशकहरूको नियुक्ति नहुँदा आयोगले एकीकृत प्रवेश परीक्षा, शुल्क निर्धारण र छात्रवृत्ति वितरणको काम अघि बढाउन सकेको छैन । निर्देशकहरूको पदावधि उपाध्यक्षको जस्तै चार वर्षको हुनेछ । अर्को एक अवधिका लागि निजको पुनः नियुक्ति हुन सक्ने व्यवस्था छ ।

‘निर्देशक नियुक्तिका लागि कम्तीमा १५ वर्षको अनुभवप्राप्त प्राध्यापक वा नेपाल सरकारको विशिष्ट श्रेणीको पदमा अनुभव भएको, उत्कृष्ट व्यवस्थापकीय सीप तथा कौशल, स्वच्छ छवि र व्यावसायिकता भएको व्यक्ति हुनुपर्छ,’ ऐनमा भनिएको छ ।

प्रकाशित : मंसिर १, २०७६ १९:०८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

प्रेस लोकतन्त्रको अक्सिजन हो : पूर्वराष्ट्रपति डा. यादव

कान्तिपुर संवाददाता

काठमाडौँ — पूर्वराष्ट्रपति डा रामवरण यादवले प्रेस लोकतन्त्रको अक्सिजन भएको बताएका छन् । नेपाल पत्रकार महासंघ महोत्तरी शाखाको नवनिर्मित भवनको प्रथम तल्लाको उद्घाटन गर्दै उनले जुन देशको प्रेस जति बलियो र स्वतन्त्र हुन्छ त्यहाँको लोकतन्त्र त्यति बलियो हुने गरेको बताएका थिए ।

उनले देशको समुचित विकासमा स्वतन्त्र प्रेसले निक्कै महत्वपूर्ण भूमिका खेलेको हुनाले प्रेसलाई कुनैपनि देशले संकुचन गर्न नहुने र देश, समाज तथा जनताको चौतर्फी विकासका लागि पूर्ण प्रेस स्वतन्त्रतालाई प्रोत्साहन गर्नुपर्ने धारणा राखेका थिए ।

प्रेस संकुचनमा परे लोकतन्त्र धरापमा पर्ने र लोकतन्त्र धरापमा परे जनताले दुःख पाउने तथा विकासका सारा बाटा बन्द हुने उल्लेख गर्दै उनले देश र जनताका भलाइ र समुचित विकासका लागि देशमा पूर्ण स्वतन्त्रतासहितको प्रेसको विकल्प नरहेको बताए ।

नेपाल पत्रकार महासंघका महासचिव रमेश विष्टले नेपालमा तीनै तहका सरकारले प्रेसलाई संकुचनमा पार्न खोजेको आरोप लगाए । त्यस्तै सम्बोधनकै क्रममा प्रदेश नं २ का पत्रकार महासंघका अध्यक्ष दीपेन्द्र चौहानले नेपालमा प्रेस चौथो अंग भएर पनि स्वतन्त्र नरहेको तथा सधैं आफ्नो अस्तित्वकै लागि सरकारसँग लडाइ लडिरहेको बताएका थिए ।

कूल रु ३६ लाख ५३ हजार लागतमा बनेको महासंघको प्रथम तल्लाको आज भएको सो उद्घाटन कार्यक्रम शाखाका अध्यक्ष कमलेश मण्डलको अध्यक्षतामा सम्पन्न भएको थियो ।

प्रकाशित : मंसिर १, २०७६ १९:०६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×