गाउँपालिका उपाध्यक्ष धरौटीमा रिहा

टीकाप्रसाद भट्ट

रामेछाप — गाउँपालिका अध्यक्षलाई ज्यान मार्ने धम्कीसहित रकम असुल्न खोजेको अभियोगमा पक्राउ परेकी रामेछापको लिखु तामाकोसी गाउँपालिकाकी उपाध्यक्ष तथा न्यायिक समितिकी संयोजक दीपशिखा दाहाललाई काठमाडौं जिल्ला अदालतले ६ लाख ५० हजार धरौटीमा छाडेको छ ।

जिल्ला सरकारी वकिल कार्यालयमार्फत् मुद्दा दायर भएपछि सम्पर्क बाहिर रहेकी दाहाल बुधबार काठमाडौं जिल्ला अदालतमा हाजिर भएकी थिइन् । उनलाई अदालतले तारेखमा छाडेको हो ।

गाउँपालिका अध्यक्ष गोविन्दबहादुर खड्कालाई तिल्पुङका बाबुराम तामाङले फोनबाट २ करोड रुपैयाँ माग्दै नदिए ज्यान मार्ने भनी धम्क्याएको र त्यसमा उपाध्यक्ष दाहाल, वडाध्यक्ष सुवास बोहरा र नेकपाका नेता ध्रुव कार्कीसमेत संलग्न रहेको भन्दै मुद्दा दायर गरिएको थियो । तामाङलाई प्रहरीले काठमाडौंको सीतापाइलाबाट नियन्त्रणमा लिने क्रममा गोली लागेको थियो । महत र कार्की अदालतमा हाजिर भएका छैनन् ।

उपाध्यक्ष दाहाल र वडाध्यक्ष बोहराले गाउँपालिका अध्यक्ष खड्काले मागे जति रकम विनियोजन गर्न नदिइएको झोकमा झूटो मुद्दा दायर गरेको जिकिर गर्दै आएका छन् । गएको असार २४ गते गाउँपालिकाको बैठकमा दुरागाउँमा भएको विद्युतीकरणका लागि खर्च भएको ६ करोड ९५ लाख रुपैयाँ विनियोजन गर्न अध्यक्ष खड्काले माग गरेका थिए ।

उपाध्यक्ष दाहाल पक्षले भने अनुगमन गरी यथार्थ खर्चको रकम मात्र विनियोजन गर्ने अडान लिएको थियो । अनुगमन समितिकी अध्यक्षसमेत रहेकी दाहाललाई अधिकांश वडाध्यक्षले साथ दिएका थिए ।

अध्यक्ष खड्काले भने तामाङसँगको उठबस र मार्नेसम्मको योजना बनाइएकाले कारबाही हुनुपर्ने माग गर्दै आएका छन् । विवादपछि गाउँसभामा चालु आर्थिक वर्षका लागि बजेट पारित हुन सकेको छैन । विवादकै कारण गत आर्थिक वर्षको लेखा परीक्षणसमेत हुन सकेको छैन ।

विवादित पक्ष सबै एकै दल नेकपाका हुन् । नेकपाले उपाध्यक्षलगायत जनप्रतिनिधिलाई फौजदारी मुद्दा दायर गरेको भन्दै अध्यक्ष खड्कालाई पार्टीको सबै जिम्मेवारीबाट निलम्बन गरेको छ । प्रदेश र जिल्ला समितिले खड्कालाई निलम्बन गरेका हुन् । खड्काले पार्टीबाट निलम्बनमा परे पनि न्यायिक लडाइँ जारी राख्ने बताउँदै आएका छन् ।
प्रतिक्रिया
पठाउनुहोस्
ADVERTISEMENT

शान्ति सुरक्षाको माग गर्दै राजपुर घटनाका घाइते अदालतमा 

शिव पुरी

रौतहट — बम विस्फोटका घाइतेहरुलाई जिउँदै इँटाभट्टामा जलाएर हत्या गरेको अभियोगमा पक्राउ परेका कांग्रेस नेता एवं पूर्वमन्त्री मोहम्मद आफताब आलममाथि थुनछेक बहस चलिरहेका बेला उक्त विस्फोटमा परी गम्भीर घाइते भारतीय नागरिक गौरीशंकर रामले आफू असुरक्षित भएको भन्दै बिहीबार अदालतमा निवेदन दिएका छन् । 

उनले शान्ति सुरक्षा र अविलम्ब बकपत्र गराइ पाऊँ भन्दै अदालत समक्ष निवेदन दिएका हुन्। उनी तिनै राम हुन् जसलाई आलमका मानिसले एक साताअघि अपहरण गरि बयान फेर्न लगाइएको कागजमा सही गराएर अदालतमा पेश गरेका थिए।

आलमका मानिसले आफूलाई जुनसुकै बेला अपहरण गरि प्रमाण लाग्न सक्ने कागजमा जबरजस्ति हस्ताक्षर गराउन सक्ने भन्दै आवश्यक सुरक्षा र अविलम्ब बकपत्र गराइ पाऊँ भनी जिल्ला अदालतमा निवेदन दर्ता गराएका हुन्।

एक साताअघि आलमका मानिसले आफ्नै घरबाट अपहरण गरी रामलाई बयान फेरिएको कागजमा सही गर्न लगाएर अदालतमा पेश गरेका थिए। तिनै राम अहिले प्रहरीको शरणमा छन्। पछिल्लो समय आलमका मानिसले साक्षीलाई खोजी खोजी धम्क्याउने, डर,त्रास आर्थिक प्रलोभन देखाउने र अपहरण गर्न थालेपछि उनीहरुको सुरक्षा चासोको विषय बनेको छ। अहिले साक्षीलाई सुरक्षाकै चिन्ता हुन थालेको हो।

पछिल्लो पटक अपहराणको शिकार बनेका राजपुर बमकाण्डका घाइते राम अअदालतको शरणमा पुगेका हुन्। आलम विरुद्ध थुनछेक बहस चलिरहेका बेला घट्नामा गम्भीर घाइते राम र भट्टामा जलाइएको भनिएको ओसि अख्तरको परिवारलाई आर्थिक प्रलोभन र डरत्रासमा पारेर आलमका मानिसले बयान फेर्न लगाएका थिए।

रामलाइ अप्ठेरा स्थिति बनाई जबर्जस्ती विस्फोटमा परेको होइन, स्टोभ पड्किएर घाइते भएको झूटो विवरण लेखिएको कागजमा सही गराएर आफ्ना पक्षका कानुन व्यवसायी मार्फत न्यायाधीशकै इजलास सम्म पुर्‍याउन लगाए।

बमको छर्राले रामको दुवै कान चुँडिएको छ। झण्डै तीन महिना भारतकै मोतिहारी अस्पतालमा उपचारपछि उनी घर फर्केका हुन्। आलमलाई असोज २६ गते राजपुर विस्फोटको घट्नाको अनुसन्धानको क्रममा पक्राउ गरेपछि त्यसै घट्नासित जोडिएका रामले कात्तिक १४ गते आलम विरुद्ध जिल्ला प्रहरीमा ज्यान मार्ने उद्योगको निवेदन दिएका थिए।

प्रहरीको अनुसन्धान मिसिलमा उनको लिखित बयान सामेल छ। घट्नाका उनी पोख्त साक्षीको रुपमा प्रस्तुत छन्। अदालत समक्ष आफूलाई डरत्रास, धम्की, अनुचित प्रभावमा पार्न सक्ने भन्दै मुलुकी फौजदारी कार्यविधि २०७४ को दफा ११४ (१) बमोजिम आवश्यक शान्ति सुरक्षाको प्रबन्ध र अविलम्ब बकपत्रको माग गरेका छन्।

आलम विरुद्ध अदालतमा जारी थुनछेक बहस सकिएर मुद्दाको आदेश भइसकेपछि घट्नाका साक्षीहरुलाई अदालतमा झिकाई न्यायधीशको अगाडी बयानको क्रममा बोलेका कुराहरु ठिक साँचो हो भनेर सोधिन्छ। साँचो कुराको परिक्षण बयान नै बकपत्र हो।

साक्षीको बकपत्र पछि न्यायधीशले फैसलाको आधार बनाउँछन्। राजपुर घट्नामा १५ जना जति प्रत्यक्षदर्शी साक्षीहरु रहेको जिल्ला न्यायधिवक्ता खडिन्द्रराज कट्वालले बताए। ‘कुनै पनि साक्षीलाई डरत्रास, धम्की, अपहरण वा अचानक बाहिर जानु परेको बखतमा अविलम्ब बकपत्रका लागि निवेदन दिन सक्ने कानुनी व्यवस्था रहेको छ,’ उनले भने,‘आलमको मुद्दाको हकमा यस्तै भएको हो। रामले पछिको अवस्थालाई हेरेर बकपत्रका लागि निवेदन दिएका हुन्।’

गत वर्षबाट लागू मुलुकी फौजदारी कार्यविधि संहिताले पीडित र साक्षीको संरक्षणको व्यवस्था गरेको छ । संहिताको दफा ११४ अनुसार आफ्नो सुरक्षामा खतरालाई मध्यनजर गर्दै साक्षीले सुरक्षा प्रबन्ध गरिदिन अदालतसमक्ष निवेदन दिन सक्नेछ । यही नजिरलाई टेकेर रामले अदालतमा निवेदन दिएका हुन्।

घट्नामा जिउँदै जलाइएको भनिएका सरुअठाका ओसि अख्तरका श्रीमती आमना खातुनको परिवारलाई ५ लाख र जग्गा दिने प्रलोभन देखाएका छन्। आलमका मानिसले खातुनलाई श्रीमान विदेशमा छ भनेर झूठो विवरण लेखी सही गर्न लगाएको घट्ना सार्वजनिक भएको छ।

घटनामा अख्तर मारिएपछि न्यायका लागि धाइरहेकी उनकी आमा रोक्साना खातुनको पनि अज्ञात समूहले गोली हानेर हत्या गरेको थियो । यही पृष्ठभूमिकाको घट्नालाई अदालत सम्म पुगेको राजपुर बमकाण्डको मुद्दालाई ओझेलमा पार्न आलमका मानिसहरुले हरेक हत्कण्डा अपनाइरहेका छन्।

आलमविरुद्ध कर्तव्य ज्यान, ज्यान मार्ने उद्योग र विस्फोटन भण्डारणको तीनवटा कसुरमा मुद्दा चली एक सातादेखि थुनछेक बहस जारी छ। घटनाका पीडित र साक्षीले डर–त्रासमा परी एकपछि अर्को बयान फेरिरहेको घट्ना बाहिर आएपछि जिल्ला प्रहरीले उनीहरुको सरक्षालाई विशेष चासो लिएको छ।

जिल्ला प्रहरी प्रमुख एसपी भूपेन्द्र खत्रीले पीडित र साक्षीको सुरक्षाको लागि कुनै कसर बाँकी नराख्ने बताए। ‘अदालतमा थुनछेकको मुद्दामा आलमका मानिसहरुले पीडित प्रति गरिएको व्यवहारले सबैलाई चकित पारेको छ,’ उनले भने, ‘पिडित र साक्षी लगायत घाइतेको सुरक्षाको पुरा प्रबन्ध गर्छौ।’

प्रहरीका अनुसार अन्य साक्षीलाई समेत धम्की दिन थालिएको छ । यस्तो अवस्थामा साक्षीलाई दीर्घकालसम्म सुरक्षाको अनुभूति दिलाउनु राज्यको न्यूनतम् दायित्व भएको एसपी खत्रीले सुनाए।

प्रकाशित : कार्तिक २८, २०७६ १९:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×