हिन्दु राष्ट्रको माग राख्दै राप्रपाले सुरु गर्यो जानकी-बुद्ध यात्रा

श्यामसुन्दर शशि

जनकपुर — हिन्दु राष्ट्र घोषणा गर्नुपर्ने मागसहित राष्ट्रिय प्रजातन्त्र पार्टी ( संयुक्त )ले जनकपुरधामबाट लुम्बिनीसम्मको जानकी–बुद्ध रथ यात्रा सुरु गरेको छ । 

जानकी मन्दिरबाट सुरु भएको रथयात्रामा सो पार्टीका अध्यक्षद्वय पशुपति शमशेर जबरा र प्रकाशचन्द्र लोहनीसँगै सुनिलबहादुर थापा, ध्रुवबहादुर प्रधान, विष्णु विक्रम लोहनी लगायतका पार्टीका शिर्ष नेता तथा सयौंको संख्यामा कार्यकर्ताहरु पनि सहभागी थिए।

ठूला पार्टीहरुले मुलुकका बहुसंख्यक जनताको भावना विपरीत मुलुकलाई धर्मनिरपेक्ष घोषणा गरेको अध्यक्ष जबराले आरोप लगाए। ‘हिन्दु राष्ट्र हाम्रो पहिचान हो। राष्ट्रको पहिचान पुनः स्थापना गराउन रथ यात्रा सुरु गरेका हौं। मुलुक पुनः हिन्दु राष्ट्र घोषणा नभएसम्म हाम्रो आन्दोलन जारी रहन्छ,’ उनले भने।

अर्का अध्यक्ष प्रकाशचन्द्र लोहनीले कात्तिक २८ गते जानकी मन्दिरबाट सुरु भएको यात्रा वाल्मिकी आश्रम हुँदै मंसिर ४ गते बुद्ध जन्मस्थल लुम्बिनी गएर टुंगिने जानकारी दिए। हिन्दु राष्ट्र पुनःस्थापनाका लागि आफ्नो पार्टी शान्तिपूर्ण रुपमा चरणबद्ध धार्मिक यात्राको अभियान थालेको उनको कथन थियो।

प्रकाशित : कार्तिक २८, २०७६ १६:०२
ADVERTISEMENT
प्रतिक्रिया
पठाउनुहोस्
ADVERTISEMENT

भारतसँग नेपालको हार

इमर्जिङ टिम्स एशिया कप क्रिकेट
कान्तिपुर संवाददाता

काठमाडौँ — पवन सर्राफले अर्धशतक बनाए पनि नेपालले एसीसी इमर्जिङ टिम्स कपको पहिलो खेलमा भारतसँग ७ विकेटको हार बेहोरेको छ । बिहीबार बंगलादेशमा सुरु प्रतियोगिताको पहिलो दिन ओमानले श्रीलंकालाई ४ विकेटले स्तब्ध पार्‍यो भने पाकिस्तान र आयोजक पनि विजयी भएका छन् । 

ढाकास्थित बीकेएसपी ३ मैदानमा टस हारेर ब्याटिङ गरेको नेपाल ४४.५ ओभरमा १ सय ९३ रनमा अलआउट भयो । भारतले सानवीर सिंहको ५६ र अर्मान जाफरको अविजित ५१ रन मदतबाट ४२ ओभरमै लक्ष्य पूरा गर्‍यो । यी दुईले तेस्रो विकटेमा ९७ रनको साझेदारी गरे । सिंहले ७३ बलमा ४ चौका र जाफरले ७७ बलमा १ चौका र १ छक्का प्रहार गरे । यसअघि रवि शरथ र आर्यन जुयलले पहिलो विकेटमा ७२ रन जोडेर भारतलाई राम्रो सुरुआत दिलाए । शरथले ४९ बलमा ८ चौका र १ छक्कासहित ४९ तथा जुयलले ४३ बलमा ४३ बलमा ३ चौका प्रहार गरी २९ रन बनाए ।

सुशन भारीले शरथलाई एलबीडब्लू आउट गरी साझेदारी तोडेका थिए । जुयललाई ललितनारायण राजवंशीले बोल्ड गरे । सिंहको विकेट करण केसीको नाममा रह्यो । करणले ७ ओभरमा २५ रन खर्चे । सुसनले १० ओभरमा ४० र ललितले १० ओभरमा ४३ रन खर्चेका थिए । सोमपाल कामीले ४ ओभरमा २६, पवनले ५ ओभरमा ३८ र दीपेन्द्रसिंह ऐरीले ६ ओभरमा खर्चे पनि कुनै विकेट लिन सकेनन् ।

यसअघि नेपालको सुरुआत निकै खराब रह्यो । पूर्ण कप्तानको रूपमा पहिलो प्रतियोगितात्मक खेल खेलिरहेका ज्ञानेन्द्र मल्ल दोस्रो बलमै खाता नखोली सौरभ दुबेको बलमा बोल्ड भए । राष्ट्रिय टोलीबाट ‘डेब्यु’ गरिरहेका कुशल भूर्तेलले शरद भेषावकरसँग मिलेर दोस्रो विकेटमा ५४ रन जोडे । कुशलले ६० बलमा ४ चौकासहित २८ रन बनाए । आरिफ शेख धेरैबेर टिक्न सकेनन् । २ रनमै पेभेलियन फर्के । शरदले ४४ रन बनाए । उनले ७६ बल खेली १ चौका र १ छक्का प्रहार गरे । दीपेन्द्रले ३१ बलमा ३ चौका प्रहार गरी २४ रन बनाए । पवनको ५६ रनले नेपाललाई हेर्नलायक स्कोरमा उभ्यायो । ४९ बल सामना गरेका पवनले ७ चौका र २ छक्का प्रहार गरे । करण केसीले १६ बलमा १ चौका र १ छक्का प्रहार गरी २० रन बनाए । विनोद भण्डारी ५, सोमपाल २ र ललित शून्यमा आउट भए । सुसन २ रनमा अविजित रहे । दुबेले भारतबाट ४ विकेट लिए । उनले ७.५ ओभरमा १ मेडन राख्दै २६ रन खर्चे । यश राठोडले ३ र पार्थ रेखादेले २ विकेट लिए ।

कक्स बजारमा पहिलो ब्याटिङ गरेको श्रीलंका पूरा ५० ओभर खेल्दै २ सय ६८ रनमा अलआउट भयो । ओपनर जतिन्दर सिंहले अविजित १ सय ३१ रन बनाएपछि ओमानले ७ बल अगाडि लक्ष्य पूरा गर्‍यो । पाकिस्तानले अफगानिस्तानलाई ८ विकेट र बंगलादेशले हङकङलाई ९ विकेटले पराजित गरेका थिए ।

नेपालले शनिबार हङकङसँग खेल्नेछ ।

प्रकाशित : कार्तिक २८, २०७६ १५:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×