‘जबर्जस्ती अन्त जान्नँ’ 

डीआर पन्त

(डडेलधुरा) — डा. गोविन्द केसीको स्वास्थ्यमा गम्भीर समस्या देखिन थालेपछि थप उपचारका लागि काठमाडौं लैजान सरकारले डडेलधुरा पठाएको सेनाको हेलिकप्टर रित्तै फर्किएको छ । १७ औं पटक अनशनरत केसीले जबर्जस्ती अन्यत्र नजाने अडान लिएका छन् । स्थानीयले पनि सहमतिविपरीत केसीलाई लैजान नदिने भन्दै विरोध गरेका छन् । 

डा. केसीलाई मनाउन डडेलधुराका प्रमुख जिल्ला अधिकारी लागिपरेका थिए । तर उनलाई डा. केसीले भेट्नसमेत मानेनन् । अनशनको आठौं दिन सोमबार केसीलाई स्थानान्तरण गर्न डडेलधुरामा व्यापक सुरक्षाकर्मी परिचालन गरिएको थियो । बिहानैदेखि अनशन तोडाउन र काठमाडौं लैजान सुरक्षाकर्मीले केसीलाई दबाबसमेत दिएका थिए ।

समर्थकले डडेलधुरा बजार क्षेत्रमा डा. केसीको समर्थनमा दिनभर प्रदर्शन गरे । बजार बन्द भयो । यता डडेलधुरा अस्पतालले भने डा. केसीको स्वास्थ्य अवस्था निकै गम्भीर रहेको भन्दै सुरक्षित स्थानमा पठाउन आग्रह गरेको छ । ‘डा. केसीको स्वास्थ्य स्थिति झन्झन् कमजोर बन्दै गएको छ,’ अस्पतालका प्रमुख डा. जितेन्द्र कँडेलले भने । चिसोमा स्वास्थ्य अझ प्रतिकूल हुन सक्ने उनको भनाइ छ । डडेलधुरा अस्पताल नजिकैको एउटा कोठामा कात्तिक १८ देखि अनशन थालेका डा. केसीलाई ४ दिनअघि अस्पताल भर्ना गरिएको हो ।

सर्वपक्षीय छलफल निष्कर्षविहीन
जिल्ला प्रशासन डडेलधुराले डा. केसीलाई काठमाडौं पठाउन सोमबार गरेको सर्वपक्षीय छलफल निष्कर्षविहीन भएको छ । आन्दोलनरत संघसंस्था र स्थानीयले डा. केसीको इच्छाविपरीत कदम उठाए आन्दोलन गर्ने चेतावनी दिएको प्रजिअ राजुप्रसाद पौडेलले बताए । ‘छलफलले कुनै निष्कर्ष निकाल्न सकेन,’ उनले भने । डा. केसीको इच्छाविपरीत हस्तक्षेप गर्ने प्रयास गरे थप आन्दोलन चर्काउने उद्योग वाणिज्य संघ डडेलधुराका अध्यक्ष लोकराज भट्टको भनाइ छ ।

वार्ताबाट समाधान खोज : संघ
यसैबीच नेपाल चिकित्सक संघले केसीको जीवन रक्षाका लागि तत्काल वार्ता गरी समस्या समाधान गर्न माग गरेको छ । संघले सोमबार जारी गरेको विज्ञप्तिमा सम्झौता कार्यान्वयन गर्नसमेत सरकारलाई आग्रह गरिएको छ ।

केसीलाई अनशन तोड्न आग्रह
शिक्षामन्त्री पोखरेलले डा. गोविन्द केसीलाई अनशन तोड्न आग्रह गरेका छन् । चिकित्सा शिक्षा ऐन बनेर आयोग गठनले पूर्णता पाउने क्रममा रहेको उनको भनाइ छ । डा. केसी ८ दिनदेखि डडेलधुरामा १७ औं अनशनमा छन् । पोखरेलले देश कालापानी र लिपुलेकका विषयमा एकजुट भएका बेला अनशन बस्न उपयुक्त नहुने धारणा राखे । केसीले अनशन बस्नुभन्दा ऐन कार्यान्वयनमा जोड दिनुपर्ने उनको तर्क छ ।

प्रकाशित : कार्तिक २६, २०७६ ०७:५७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पूर्वी सीमा पनि अस्तव्यस्त

कान्तिपुर संवाददाता

इलाम — जिल्लाको सीमा क्षेत्रमा भारतीय पक्षले दशगजाभित्रै आएर संरचना बनाइरहेको छ । सीमा चेकपोस्टदेखि एसएसबीका क्याम्पसम्म दशगजामै छन् । एसएसबीले सीमा विवाद झिक्दै नेपाली भूमिमा हुने विकास निर्माणका काममा समेत अवरोध गर्ने गरेको छ ।

कालपोखरी, मानेभन्ज्याङ, गुफापातल, छब्बिसेलगायत स्थानमा दसगजा मिचिइसकेको छ । सीमानाका पशुपतिनगरको फाटकस्थित भारतीय चेकपोस्ट दशगजामै छ । सडक, एसएसबीका क्याम्प पनि भारतले एकलौटी रूपमा बनाइरहेको छ । ‘भारतीय पक्षले सीमा वास्ता नगरी पूर्वाधार बनाउने अनि नेपाली पक्ष टुलुटुलु हेर्नुपर्ने अवस्था छ,’ सन्दकपुरका पेमाडन्डु शेर्पाले भने ।

जिल्लाको अधिकांश सीमा क्षेत्रमा भारतको सिंहलीला नेसनल पार्क छ । वन विभागले वन मासेर मासेर संरचना बनाउन नदिने भन्दै भारतले दशगजा मिच्न थालेको हो । यसअघि हिले, पुलखोलालगायतमा पनि सीमा अतिक्रमण भएको थियो । तर, स्थानीयस्तरबाट निकै प्रतिवाद भएपछि भारतीय पक्ष पछि हटेको थियो ।

सीमामा भारतले ३/४ किलोमिटरको अन्तरमा सुरक्षा फौज राखेको छ । नेपालतर्फ भने पशुपतिनगरमा एउटा बोर्डर अब्जरभेसन पोस्ट (बीओपी) मात्र छ ।

छब्बिसे, मानेभन्ज्याङ र सन्दकपुरमा सशस्त्रको बीओपी क्याम्प बस्ने भनिए पनि अझै बसिसकेको छैन । मानेभन्ज्याङमा सीमा प्रहरी चौकी, जौवारी र कालपोखरीमा प्रहरी चौकी छन् । स्थानीयले भारतले जसरी नै धेरै स्थानमा सशस्त्र प्रहरी पोस्ट राख्न माग गर्दै आएका छन् ।

प्रकाशित : कार्तिक २६, २०७६ ०७:५४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×