द्रुतमार्ग अनियमितताको आन्तरिक छानबिन प्रतिवेदन प्रधानसेनापतिको टेबुलमा

जगदीश्वर पाण्डे

काठमाडौँ — नेपाली सेनाले निर्माण हुनु अगावै अनियमितताको आरोप खेपेको बहुचर्चित ‘काठमाडौं–मधेश द्रुतमार्ग’ निर्माण प्रक्रियाको आन्तरिक छानबिन टुंगाएको छ ।

मुलुकको राजधानी काठमाडौं उपत्यकाबाट दक्षिणी भेग मधेशमा एक घन्टामै पुग्न सकिने करिब ७३ किलोमिटर लामो द्रुतमार्ग निर्माण प्रक्रियाको सुरूआतमै अनियमितताको उजुरी परेपछि सेनाले अन्तरिक छानबिन थालेको थियो ।

प्रधानसेनापति पूर्ण चन्द्र थापाले बलाधिकृत रथी शरद गिरीको नेतृत्वमा एक छानबिन टोली गठन गरेका थिए । उक्त टोलीले प्रधानसेनापति थापालाई प्रतिवेदन हस्तान्तरण गरिसकेको छ । ‘प्रधानसेनापतिको कार्यालयमा रिर्पोट पुगिसकेको छ, त्यस बारेमा केहि दिनमै हामी जानकारी दिने छौं,’ सैनिक प्रवक्ता विज्ञानदेव पाण्डेले भने ।

छानबिनका क्रममा सेनाले सुरूआतमा काठमाडौं–मधेश द्रुतमार्गका आयोजनाको नेतृत्व गरेका अवकाश प्राप्त प्राविधिक उपरथी योगेन्द्र खाँडलाई पनि अनुसन्धानको लागि बोलाएको थियो । खाँडले असार १३ मा नियमित अवकाश पाएका हुन् ।

सैनिक स्रोतका अनुसार उक्त टोलीले खाँडपछि आयोजना सम्हालेका सहायक रथी शरदलाल श्रेष्ठलाई अनुसन्धानको अवधिभर कुनै जिम्मेवारी दिइएको छैन । खाँड आयोजना प्रमुख हुँदा श्रेष्ठले द्रुतमार्गको डिजाइन बनाएका थिए ।

खाँडले अनुसन्धानका दौरान श्रेष्ठको पनि नाम लिएपछि श्रेष्ठमाथि पनि अनुसन्धान गरिएको सैनिक स्रोतले बतायो । ‘श्रेष्ठ दोषी नदेखिए फेरि काममा फर्कने छन् । दोषी देखिए कारबाहीको भागीदार हुने छन्,’ स्रोतले भन्यो ।

नेपाल सरकारको २०७४ साउन २७ को मन्त्रिपरिषद्को निर्णय अनुसार सेनालाई द्रुतमार्ग बनाउने जिम्मेवारी दिइएको हो । मुलुकको रणनीतिक पूर्वाधार सेनालाई दिनुपर्ने भन्दै सरकारले सेनालाई निर्माणको जिम्मेवारी दिइएको थियो ।
चार वर्षमा निर्माण सक्नु पर्ने उक्त आयोजनाको लागत करिब एक खर्ब ७५ अर्ब रहेको सेनाले जनाएको छ । विस्तृत परियोजना प्रतिवेदन आएसँगै सेना परामर्शदाता खोज्ने प्रक्रियामा छ ।

प्रकाशित : कार्तिक २१, २०७६ १९:२७
ADVERTISEMENT
प्रतिक्रिया
पठाउनुहोस्
ADVERTISEMENT

बुद्ध नेपालमा पो जन्मेका रहेछन् : आइभरिकोस्टका उपराष्ट्रपति

जगदीश्वर पाण्डे

काठमाडौँ — ‘नेपाल आउनुअघि बुद्ध भारतमा जन्मेको भन्ने बुझेको थिएँ । यहाँ आएपछि हिजो (सोमबार) पो थाहा भयो, त्यो तथ्य गलत पो रहेछ । बुद्ध नेपालको लुम्बिनीमा जन्मेका रहेछन्,’ नेपालको तीनदिने भ्रमण पूरा गरी मंगलबार स्वेदश फर्केका अफ्रिकी मुलुक आइभरिकोस्टका उपराष्ट्रपति डानिएल काब्लान डुन्कनले भने ।

उपराष्ट्रपति डुन्कन प्लेन चार्टर गरी आइतबार काठमाडौं उत्रिएका थिए । पहिलोपटक ‘सगरमाथाको देशमा’ आउँदा उनी रोमाञ्चित भए । आइभरिकोस्टबाट करिब साढे ९ हजार किलोमिटर हवाई यात्रा गर्दै आएका उनले त्यहाँका करिब एक हजार मिटर अग्ला हिमाल र संसारकै सर्वोच्च ८ हजार ८ सय ४८ मिटर अग्लो सगरमाथाको तुलना पनि गरे ।

सन् २०१७ जनवरीमा पद सम्हालेका ७६ वर्षीय डुन्कन पोषणसम्बन्धी सेवाहरूको विस्तारका लागि आयोजित विश्व सम्मेलनमा सहभागी हुन काठमाडौं आएका थिए । मंगलबार कान्तिपुरसँगको कुराकानीका क्रममा उनले आफ्नो मुलुकका चर्चित फुटबलर डिडियर ड्रोग्बा र याया टुरेको चर्चा मात्र गरेनन्, हालै ८ हजार मिटरभन्दा माथिका १४ वटा हिमाल एक नेपालीले ६ महिनामा चढेको भन्दै प्रशंसासमेत गरे । ‘दुई मुलुकबीच सम्बन्ध विस्तार गर्न अन्य विभिन्न क्षेत्र छन् । आइभरिकोस्टले नेपाललाई फुटबलमा अघि बढ्न सघाउँछ । नेपालले हामीलाई शिखर चढ्न सिकाउनुपर्छ,’ उनले भने ।

नेपालीहरूले फुटबलमार्फत आइभरिकोस्टमाथि गरेको मायाप्रति उनी खुसी भए । ‘नेपाल र आइभरिकोस्टबीच सुमधुर सम्बन्ध हुनुपर्छ । नेपालकी राष्ट्रपति विद्यादेवी भण्डारीले हाम्रा राष्ट्रपतिलाई अर्को वर्ष भ्रमणको निम्तो दिनुभएको छ,’ उनले भने, ‘कसरी दुई मुलुकबीच सम्बन्ध अघि बढाउन सकिन्छ भनेर संयुक्त राष्ट्रसंघमा रहेका दुई मुलुकका प्रतिनिधिबीच कुरा गर्न सकिन्छ ।’ दुईपटक प्रधानमन्त्रीसमेत बनिसकेका डुन्कनले नेपाल आउन पाउँदा गज्जब लागेको बताए । नेपाल संस्कृतिको धनी मुलुक रहेको र यहाँका उच्च हिमाल विकासमा सघाउने उनको भनाइ छ ।

अफ्रिकी महादेश पछाडि मात्र परिरहेको छ कि त्यहाँ विकासका परिवर्तन पनि देखिएका छन् भन्ने प्रश्नमा डुन्कनले भने, ‘तथ्यांक हेर्ने हो भने एसियापछि सबैभन्दा बढी आर्थिक वृद्धिदर गर्ने महादेश अफ्रिका हो । त्यहाँको प्रतिव्यक्ति आय (जीडीपी) मा ५ प्रतिशत वृद्धि भएको छ । आइभरिकोस्टमा सन् २०१२ देखि २०१८ सम्म लगातार ८ प्रतिशतको आर्थिक वृद्धि भइरहेको छ ।’ चिनियाँ लगानीले अफ्रिकी मुलुकहरूमा खेलिरहेको भूमिकाबारे पनि उनले प्रस्ट्याए ।

प्रकाशित : कार्तिक २०, २०७६ ०७:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT