जेलमा सित्तैमा खान पाइन्छ भन्दै चोरी

हरि गौतम

रुकुम पश्चिम — मुसीकोट नगरपालिका–२ का अन्दाजी २० वर्षीय राजु परियार प्रहरी हिरासतमा छन् । उनी विरुद्ध प्रहरीले चोरी डााका मुद्दा दर्ता गरी अनुसन्धान गरिरहेको छ उनीमाथि मोबाइल पसल फोडेर नगद तथा मोबाइल सम्बन्धिका सामग्री चोरेको आरोप छ ।

उनलाई कार्तिक १६ गते राति मुसीकोट नगरपालिका–१ त्रिवेणि चोकमा रहेको एक मोबाइल पसलमा चोरी गरेको आरोपमा प्रहरीले पक्रेको हो । उनलाई प्रहरीले कार्तिक १८ गते पक्राउ गरेका थियो ।

प्रहरीले राजुलाई यसरी पहिलो पटक चोरी, डााका मुद्दा लगाएको होइन । यसअघि पनि उनले यही मुद्दामा जेल सजाय भुक्तान गरिसकेका थिए । २०७३ कार्तिक २३ गते खलंगाको एउटा कोठामा चोरी गरेको आरोपमा पक्राउ परेका राजु तीन वर्ष जेल सजाय भुक्तान गरेर भर्खरै बाहिर निस्केका हुन् ।

जेल सजाय भुक्तान गरेर निस्कने बित्तिकै उनी फेरि उही प्रकृतिको घटनामा समातिएका छन् । पसलका मालिकका अनुसार राजुले तीन थान मोबाइल, तीन वटा मोबाइलका ब्याट्री तथा ४ हजार ३ सय ८० बढी नगद चोरी गरेका थिए ।

एउटै मुद्दामा दुई पटक समातिएपछि प्रहरीले अनुसन्धान गर्दा राजुले खान, बस्नको लागि चोरी गरेको तथ्य फेला पारेको छ । जेलमा निःशुल्क खान पाइने भएकाले राजुले प्रहरीबाट पक्राउ पर्न चोरी गरेको प्रहरीले जनाएको छ । ‘अनुसन्धान गर्दै जाादा यस्तो तथ्य आयो,’ जिल्ला प्रहरी प्रमुख प्रहरी नायब उपरीक्षक सुमित खड्काले भने, ‘यसले त खान सजिलो हुन्छ भनेर चोरी गरेको पत्ता लागेको छ ।’

राजुले जेलबाट निस्केपछि खान, बस्नको कुनै ठेगान नभएकाले पुनः जेल जान चोरी गरेको बयान दिएका छन् । प्रहरीका अनुसार राजुको बाबुको मृत्यु भएको र आमाले वास्ता नगरेपछि खान,बस्ने पाइने उद्देश्यले चोरी कार्यमा संलग्न भएका थिए ।

प्रहरीले पक्राउ गरोस् भनेर चोरी गरेर बजारमा नै घुमिरहेको सम्मको बयान राजुले दिएको डीएसपी खड्काले बताए ।

प्रकाशित : कार्तिक २१, २०७६ १७:३३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अब मेसिनबाटै मादल

हरि गौतम

(रुकुम पश्चिम) — त्रिवेणी गाउँपालिका २, का मंगलबहादुर बादी एक्लै दैनिक ५ मादल बनाउँछन् । यसअघि दिनमा एउटा मादल बनाउन पनि मुस्किल हुन्थ्यो । मेसिनबाट मादल बनाउन थालेपछि उनको आम्दानी पनि बढेको छ ।

उनले दैनिक ५ मादलको घार खोल्ने, सुकाउने तथा छालाले मोड्नेसम्मको काम भ्याउँछन् । सजिलैसित उनले दैनिक २० देखि २५ हजार कमाउन सक्ने भएका छन् । एउटा मादल १८ सयदेखि ७ हजार रुपैयाँसम्ममा बिक्री भइरहेको छ । बजारमा प्रतिस्पर्धा बढ्दै गएपछि उनले मेसिनमार्फत मादल निर्माण गरिरहेका हुन् । ‘हातैले मादल बनाउदा धेरै मिहिनेत लाग्ने र महंगो पर्ने भएकाले मेसिनबाट मादल बनाइरहेको छु,’ उनले भने, ‘मेसिन ल्याएपछि मुस्किलले भए पनि माग धानिएको छ ।’ उनका अनुसार स्थानीय बजारमा मादलको माग अत्यधिक छ । ४ लाख रुपैयाँ लगानी गरी मेसिन भित्र्याएपछि व्यवसाय गर्न सहज भएको उनले सुनाए ।

कच्चा पदार्थको सम्पूर्ण व्यवस्था भएपछि मादल बनाउन उनलाई खासै समस्या र मिहिनेत पनि पर्दैन । जिल्लामा हातले मादल निर्माण गर्नेको संख्या घट्दै गएका बेला बादीले मादल उद्योगै चलाएका छन् । ‘पुर्खादेखि चलिआएको पेसा भएकाले छाड्न सकिएन, बाबुबाजेको पेसा टिकाउन र आम्दानी बढाउन मेसिन खरिद गरी थप व्यावसायिक बनाएको हुँ,’ उनले भने, ‘चाडपर्व र मेलाको बेला भएकाले २ महिनायता एकछिन फुर्सद छैन ।’

५५ वर्षीय बादीले २०४० सालदेखि मादल बनाउन थालेका थिए । लामो समय हातैले मादल बनाएका उनले २ वर्षअघि मात्रै मेसिन ल्याएका हुन् । मादलबाटै एक सिजनमा ३ देखि ४ लाख रुपैयाँ आम्दानी भइरहेको उनी बताउँछन् । स्थानीय सामुदायिक वनबाट ‘चिन्नेखमारी’ र ‘उत्तिस’ जातका काठ ल्याएर मादल र डौंरी बनाउने गरेको उनी बताउँछन् । गत वर्ष वर्ष उनले सय मादल र ८० डौंरी बिक्री गरे । यस वर्ष १ सय २० मादल र ४० डौंरी बेचिसकेको उनले बताए । उनका अनुसार स्थानीय बजारका साथै रोल्पा, सल्यान, सुर्खेत, जाजरकोट, नेपालगन्ज, भैरहवा र काठमाडौंसम्मबाट मादल र डौंरीको माग आउने गरेको छ । साना आकारका केही मादल विदेशसम्म पठाएको उनको अनुभव छ ।

विशेषगरी भदौदेखि मंसिरसम्म मादल र डौंरी बढी बिक्री हुने उनको बुझाइ छ । पछिल्लो समय जिल्लाका अन्य ठाउँका बादी समुदायले मादल बनाउन लगभग छाडिसकेका छन् । बनाए पनि निकै नगण्य मात्रामा छन् । बजारमा बाहिरबाटै मादल आउने भएकाले हातैले मादल बनाउनेको पेसा संकटमा परेको छ । जिल्लामा एउटा मात्रै व्यावसायिक मादल उत्पादन गर्ने उद्योग रहेको निमित्त जिल्ला समन्वय अधिकारी तेजकुमार ओलीले बताए । परम्परागत रुपमा बन्ने तथा बनाइने वस्तु लोप हुन नदिन आधुनिकीकरण गर्न जरुरी भइसकेको उनको भनाइ छ ।

प्रकाशित : कार्तिक २०, २०७६ १०:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT