फोटोकपीले आलमको बयान केही समय रोकियो 

शिव पुरी

रौतहट — कर्तव्य ज्यान, ज्यानमार्ने उद्योग र विस्फोटन भण्डारणको आरोपमा पक्राउ परेका कांग्रेस नेता एवं पूर्वमन्त्री मोहम्मद आफताब आलमसँग जिल्ला अदालतले बयान लिन सुरु गरे लगत्तै केहीसमयका लागि रोकिएको छ । 

झण्डै ८ सय पृष्ठ लामो अनुसन्धानको मिसिल फोटोकपी गर्न समय लागेकोले आलमको बयानमा ढिलाइ भएको हो । मिसिलको फोटोकपी अधुरो भएको भन्दै बयान केही समयका लागि रोकिएको हो ।
आलममाथि ३ वटा अभियोग लगाएर जन्मकैद मागसहित जिल्ला सरकारी वकिलको कार्यालयले सोमबार अभियोग पत्र दर्ता गराए पछि मंगलबार उनीसित बयान लिइएको हो । अनुसन्धानको क्रममा प्रहरी र सरकारी वकिलको कार्यालयमा आलमले घटना नै नभएको भन्दै बयान दिएका छन् । उनको इन्कारी बयान पछि प्रहरीले पोलिग्राफको तयारी गरेको थियो । तर आलमले मानेनन् । अदालतमा समयमै उपस्थित गराइए पनि मिसिल ठूलो भएकाले फोटोकपी मै समय धेरै लागेको जिल्ला न्यायधिवक्ता खडिन्द्रराज कटवालले जनाए ।

‘बल्ल बयान सुरु भएको थियो,’ उनले भने, ‘बयान सकिएपछि सम्भवतः भ्याइयो भने आजै नभए भोलिबाट थुनछेक बहस हुने छ ।’ उनको बयान सुरु भएपछि मिसिलमा रहेको केही फोटोकपी गर्न छुटेकाले रोकिएको प्रहरीले जनायो । उनलाई अदालत लगिँदा कार्यकर्ताको बाहिर भीड लागेको थियो । सदरमुकाम गौरको सुरक्षा व्यवस्था कडा बनाइएको छ । जिल्ला प्रहरी प्रमुख एसपी भुपेन्द्र खत्रीले गौरको सुरक्षा व्यवस्था कडा बनाइएको बताए ।

संविधानसभा निर्वाचनको अघिल्लो दिन २०६४ चैत २७ गते राजपुर फरदहवामा भएको बम विस्फोटको घटनामा आलमविरुद्ध कर्तव्य ज्यान, ज्यान मर्ने उद्योग र विस्फोटन भण्डारणको मुद्दामा प्रहरीले अनुसन्धान सकेर सरकारी वकिलको कार्यालयमा गएको शुक्रबार मिसिल बुझाएको थियो । त्यसपछि उनीमाथि अभियोग अनुसारको सजायको माग सहित ३९ पृष्ठ लामो अभियोग पत्र अदालतमा दर्ता भएको छ ।

उनलाई जिल्ला अदालतका न्यायधीश दिपक ढकालले बयान लिन सुरु गरेका छन् । राजपुर बम विस्फोटमा परी सरुअठाका त्रिलोकप्रताप सिंह र ओसी अख्तरलाई घाइते अवस्थामा लगेर जिउँदै चिम्नीभट्टामा हालेर मारेको आलममाथि आरोप छ ।

प्रकाशित : कार्तिक १९, २०७६ १४:१९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

आलमलाई बयानका लागि अदालत लगियो 

शिव पुरी

रौतहट — रौतहटको राजपुर फरदहवा बमकाण्डमा पक्राउ परेका कांग्रेस नेता एवं पूर्वमन्त्री मोहम्मद आफताब आलमलाई बयानका लागि अहिले जिल्ला अदालतमा उपस्थित गराइएको छ । आलममाथि ३ वटा अभियोग लगाएर जन्मकैद सजायसहित जिल्ला सरकारी वकिलको कार्यालयले सोमबार अभियोगपत्र दर्ता गराएपछि बयानका लागि अदालत लगिएको हो ।

उनको बयान सकिएपछि थुनछेक बहस सुरु हुने भएको छ । अहिले सदरमुकाम गौरको सुरक्षा व्यवस्था कडा बनाइएको छ ।

संविधानसभा निर्वाचनको अघिल्लो दिन २०६४ चैत २७ गते राजपुर फरदहवामा भएको बम बिस्फोटको घटनामा आलम विरुद्ध कर्तव्य ज्यान, ज्यानमर्ने उद्योग र बिस्फोटन भण्डारणको मुद्दामा प्रहरीले अनुसन्धान सकेर सरकारी वकिलको कार्यालयमा गएको शुक्रबार मिसिल बुझाएको थियो । त्यसपछि उनि माथि अभियोग अनुसारको सजायको मागसहित ३९ पृष्ठ लामो अभियोगपत्र अदालतमा दर्ता भएको छ ।

उनलाई जिल्ला अदालतका न्यायशधीश दिपक ढकालले बयान लिने तयारी भइरहेको जिल्ला न्यायाधिवक्ता खडिन्द्रराज कटवालले जनाए । ‘केही बेरमा आलमसित बयान लिने काम सुरु हुन्छ,’ उनले भने, ‘न्यायाधीश ढकालले उनीसँग बयान लिनुहुन्छ । र बयान सकिए पछि बहस सुरु हुन्छ ।’

राजपुर बमबिस्फोटमा परी सरुअठाका त्रिलोकप्रताप सिंह र ओसी अख्तरलाई घाइते अवस्थामा लगेर जिउँदै चिम्नीभट्टामा हालेर मारेको आलम माथी आरोप छ । विभिन्न व्यक्तिले घटना बारे बयान दिए पनि उनले अहिलेसम्म आरोप स्विकारेका छैनन् ।

अदालतको नियमित प्रक्रिया अनुसारको गोलाप्रथा गर्दा आलमको मुद्दा इजलाश नम्बर ४ का न्यायाधीश ढकालको बेञ्चमा परेको हो । आलमलाई अदालत लगिँदा सदरमुकामको सुरक्षा व्यवस्था कडा पारिएको छ । गौरमा ठुलो संख्यामा प्रहरी परिचालन गरिएको छ । आलमको मुद्दामा पीडित तथा वादीको पक्षमा दुई वरिष्ठ अधिवक्तासहित १२ कानुन व्यवसायीले बहस गर्ने जनाइएको छ । आलमको बयान सकिएपछि जिल्ला सरकारी वकिल जिल्ला न्यायाधिवक्ता कटुवालले बहस सुरु गर्ने जानकारी गराइएको छ । आलमको पक्षमा रौतहटका २८ जना कानुन व्यवसायीले बहस गर्ने भएका छन् ।
लोगो लगाउन छाडेनन्
कर्तव्यज्यान मुद्दामा पक्राउ परेका आलमले अहिलेसम्म सांसदको लागो लगाइरहेका छन् । प्रहरीले उनलाई लोगो नलगाउन अनुरोध गरे पनि उनले टेरेका छैनन् । फौजदारी अभियोग लागेकाले सांसदको लोगो लगाउन पाइँदैन ।

उनी असोज २६ गते पक्राउ परे पछि संसद सचिवालयले निलम्बनको जानकारी प्रहरीलाई गराईसकेको छ । उनि अदालतमा पटकपटक उपस्थित हुँदा लागो लगाएरै आउने गरेका छन् । हिरासतमा बस्दा समेत उनले लागो छाडेका छैनन् ।

प्रकाशित : कार्तिक १९, २०७६ १२:५५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT