पुन: डायलाइसिस गराउन प्रधानमन्त्री आज ग्राण्डी जानसक्ने- समाचार - कान्तिपुर समाचार

पुन: डायलाइसिस गराउन प्रधानमन्त्री आज ग्राण्डी जानसक्ने

कान्तिपुर संवाददाता

काठमाडौँ — प्रधानमन्त्री केपी शर्मा ओलीलाई तेस्रोपटक डायलाइसिस गर्नका लागि आइतबार धापासीस्थित ग्रान्डी अन्तर्राष्ट्रिय अस्पताल लैजाने तयारी भएको छ । ग्राण्डी अस्पतालबाट बालुवाटार पुगेको चिकित्सकको टोली उनको रगतको परिक्षण गरेको र परीक्षणको रिपोर्ट आएपछि डायलाइसिस गर्न अस्पताल लगिनसक्ने स्रोतले बताएको छ ।

प्रधानमन्त्री ओलीले हिजै सचिवालय बैठकमा आफ्नो स्वास्थ्य अवस्थाका बारे जानकारी दिँदै फेरी पनि डायलाइसिस गर्नुपर्ने बताएका थिए । प्रधानमन्त्री आफैंले अब उनीसँग प्रत्यारोपण र नियमित डायलाइसिस मध्ये एउटा गर्नुपर्ने अवस्था आइपरेको बताएका थिए ।


बिहीबार दिउँसो डायलासिस गरेपछि उनको डायलाइसिस भएको छैन । त्यसैले पनि आज उनलाई डायलाइसिस गर्नका लागि ग्राण्डी लाने सम्भावना रहेको स्रोतले बताएको छ । चिकित्सकहरुका अनुसार मिर्गौलाले काम गर्न छोडेको अवस्थामा मिर्गौला प्रत्यारोपण नगरेसम्म हप्ताको तीनपटक डायलाइसिस गर्नुपर्ने हुन्छ ।


प्रधानमन्त्रीको सचिवालय स्रोतका अनुसार आज प्रधानमन्त्रीकै आग्रहमा मन्त्रिपरिषद बैठकका साथै अन्य बैठकहरु पनि बालुवाटारमा नै बस्ने गरी बोलाइएको छ । तर, ओली डायलाइसिसका लागि अस्पताल जाने भएपछि सबै बैठक अनिश्चित भएका छन् ।


यद्यपि आइतबार बिहान ११ बजेका लागि बोलाइएको मन्त्रिपरिषद् बैठक भने ओली अस्पतालबाट फर्केपछि बस्ने बताइएको छ ।


उनले हिजो नेकपाको सचिवालयको बैठकमा आफ्नो स्वास्थ्य अवस्था बारे अवगत गराएका थिए । सचिवालय बैठकमा उनले आफू सिकिस्त नभएको तर मिर्गौलाले राम्ररी काम नगरेको जानकारी गराएका थिए ।


नियमित डायलाइसिस या मिर्गौला प्रत्यारोपण के गर्ने भन्नेबारे मेरासामु दुइटा विकल्प मात्रै छन्,’ सत्तारूढ नेकपाको शनिबार बसेको सचिवालय बैठकमा प्रधानमन्त्री ओलीले भने, ‘के गर्ने भन्नेबारे रिपोर्ट हेरिसकेपछि मात्रै भन्न सकिने अवस्था छ । फेरि मिर्गौला प्रत्यारोपण गर्नुपर्ने हुन पनि सक्छ, हेरौं ।’ बैठकमा उनले मिर्गौलाले राम्रोसँग काम नगरेको र फोक्सोमा पानी जमेकाले ग्रान्डी अस्पतालमा गएर दुईपटक डायलाइसिस गराएको बताएका थिए।


डायलासिस गराउन ४ घण्टा लाग्ने भएकाले मन्त्रिपरिषद् बैठकपछि आजै दिउँसो बस्ने बताइएको छ । तर, त्यसको पूर्णरुपमा टुंगो लागिसकेको छैन । यस्तै आजै बस्ने भनिएको नेकपा सचिवालय बैठक पनि अनिश्चित भएको छ।


यसअघि कार्तिक १३ र १४ गते ग्राण्डीमा भर्ना नै भएर प्रधानमन्त्री ओलीको दुईपटक डायलाइसिस भइसकेको छ ।


१२ वर्षअघि प्रत्यारोपण गरिएको मिर्गौलाले राम्ररी काम गर्न छाडेपछि प्रधानमन्त्री ओली गत साउन १८ गते उपचारका लागि सिंगापुर गएका थिए । नेसनल युनिभर्सिटी अस्पताल सिंगापुरमा एक साता बसेर फर्किएका उनले फेरि भदौमा सिंगापुर गएर करिब २ साता उपचार गराएका थिए । त्यतिखेर प्लाज्माफेरिसस पद्धतिबाट शरीरको एन्टीबडी नष्ट गरिएको थियो ।


प्रकाशित : कार्तिक १७, २०७६ ११:४९
प्रतिक्रिया
पठाउनुहोस्

झकिझकाउ जलाशय 

पश्चिम तराई–मधेसमा समेत छठ पर्व मनाउनेहरु बढ्दै गएका छन् । पहाडी समुदायले पनि यो पर्व धुमधामसाथ बनाउन थालेका छन् । 
भवानी भट्ट, निर्मला खडायत

(कञ्चनपुर) र (धनगढी) — धनगढीस्थित मोहना नदी किनार दुलहीझैं सिंगारिएको छ । छठ पूजा गर्ने व्रतालुहरूले पूजा गर्नका लागि मोहना नदीलाई सिंगारेका छन् । धनगढीको चौराहादेखि गेटहरू बनाएका छन् । ४ वटा केराका थुम्बाको मण्डप बनाएर नदीमा देवताको मुर्ति थपना गरेका छन् । झिलीमिली बत्तिले मोहना घाटको रुप नै फेरिएको छ । 

उता कञ्चनपुरको महेन्द्रनगरमा बसोबास गर्ने तराई मुलका बासिन्दाले महाकाली नहर किनारलाई झकिझकाउ बनाइएका छन् । नदी किनारमा राखिएका फलफूल तथा पूजासामग्रीले नहर किनार निकै आकर्षक देखिएको छ ।

‘छठ पर्व बिहीबार नै सुरु भइसक्यो । शनिबार छठको तेस्रो दिन । यस दिनमा अस्ताउँदै गरेको सूर्यको अर्घ दिएर पूजा गरिन्छ,’ छठ पूजा सेवा समितिका अध्यक्ष सन्तोष मण्डलले भने, ‘केही वर्षअघिसम्म पनि यहाँ छठ मनाउनेहरू ८/१० जना मात्रै थिए । अहिले २ सयभन्दा बढी त मण्डप मात्रै बनेका छन् ।’

लामो समयदेखि महेन्द्रनगरमै बसोबास गरिरहेका जनकपुरका हरि ठाकुरले भने, ‘हरेक वर्ष छठको भीड बढ्दो छ ।’ उनले मधेसीले मात्र नभई पहाडी समुदायले समेत छठका बारेमा बुझ्न र जान्न थालेको बताए ।

सन्तोषले पछिल्लो समय कैलालीमा बसोवास गर्ने मधेसीले मोहना किनारमै छठ मनाउन थालेको बताए । ‘१० वर्षअघि हामीहरूले समिति बनाएर धनगढीमा छठ मनाउन सुरु गरेका हौं । त्यतिबेला बाटोमा हिँड्नेहरूलाई बोलाएर पूजामा सहभागी गराउँथ्यौं’, सन्तोषले भने, ‘अहिले पहाडी समुदाय पनि छठमा सहभागी हुने गर्छन् । छठ पूजा गर्नेको संख्या सयौं हुन्छ ।’

उनले यस पर्वमा व्रतालुले मनोकामना पूरा होस् भनेर ७२ घण्टासम्म व्रत बस्ने गरेको बताए । उनीहरू आइतबार बिहान उदाउँदै गरेको सूर्यलाई अर्घ दिएर व्रत समापन गर्नेछन् । ‘रोगब्याधी निको भएको छ । पछिल्लो समय यहाँका स्थानीयले पनि छठको व्रत बस्न थालेका छन्,’ धनगढी सन्तोषी टोलका नन्दलाल गुप्ताले भने । उनले छठमा रातभर मोहना नदी छेउ भजनकिर्तन गरेर रात बिताउने गरेको सुनाए ।

शनिबार रातभर ब्रतालु र छठ पूजाका दर्शनार्थीहरूका लागि बिजुली, खानेपानी र सुरक्षाको विशेष व्यवस्थासमेत गरिएको छठ पूजा सेवा समितिका सल्लाहकार सन्दिप साहले बताए । ‘मोहना किनारमा रातितिर अझ झकिझकाउ र आकर्षक देखिन्छ,’ उनले भने ।

सामाजिक सद्भावका कारण अवलोकन गर्न आउने पहाडी समुदायका मानिसको संख्या पनि उत्तिकै बाक्लो छ । उनीहरू आफूले छठ पर्व नमनाए पनि सद्भावका कारण आउने गरेको बताउँछन् । ‘छठ हाम्रो पर्व त होइन् । तर हामी हरेक वर्ष छठका दिनको नदीको सौन्दर्य हेर्न आउने गरेका छौं,’ धनगढीकी पार्वती शर्माले भनिन् । उनीसँगै छठको रौनक हेर्न मोहना नदी किनार पुगेका मनीराज भट्ट पनि सिंगारिएको मोहना नदीको सुन्दरताले लोभ्याएको बताउँछन् ।

छठ पर्वमा व्रत गरे दु:ख र दरिद्रताबाट मुक्ति पाइन्छ भन्ने जनविश्वास छ । यस पर्वमा झुप्पा–झुप्पा फल चढाउँदा सूर्य देवता प्रसन्न भई ब्रतालुका कुटुम्बसहित सबै सन्तानको भलो हुन्छ भन्ने मान्यता रहिआएको छ ।

प्रकाशित : कार्तिक १७, २०७६ १०:२६
पूरा पढ्नुहोस्
प्रतिक्रिया
पठाउनुहोस्
×