महराविरुद्ध साढे ७ वर्ष कैदको मागदाबी

पीडितले १०० मा गरेको फोन, किटानी जाहेरी, सुरक्षाकर्मीको बयान, सीसीटीभी फुटेजका साथै घटनास्थलबाट बरामद सामान प्रमाणका रूपमा पेस
उजुरीकर्ताको अनुहार र हातमा लागेको चोटलाई बलात्कार प्रयासकै परिणामका रूपमा चित्रण 
कृष्ण ज्ञवाली

काठमाडौँ — संघीय संसद्को सचिवालयमा कार्यरत कर्मचारी ‘नयाँ बानेश्वर २६’ (सरकारी वकिलको कार्यालयले राखेको कोड नाम) माथि बलात्कारको प्रयास गरेको आरोपमा निवर्तमान सभामुख कृष्णबहादुर महराविरुद्ध जिल्ला अदालत काठमाडौंमा मुद्दा दर्ता भएको छ । जिल्ला सरकारी वकिलको कार्यालय काठमाडौंले साढे ७ वर्ष कैद मागदाबीसहित महराविरुद्ध बिहीबार मुद्दा दर्ता गरेको हो । 

सरकारी वकिलको कार्यालयका प्रमुख चन्द्रकान्त खनालले प्रहरी प्रतिवेदनमाथि गहन अध्ययनपछि बलात्कार प्रयास (जबर्जस्ती करणीको उद्योग) को आरोपमा मुद्दा दर्ता गरिएको बताए । ‘किटानी जाहेरीलगायतका प्रहरीले संकलन गरेका प्रमाण र अन्य सबुद विश्लेषणबाट बलात्कार प्रयासको आरोपमा मुद्दा चल्ने निर्णय गरेर अभियोगपत्र पेस गरेका हौं,’ उनले कान्तिपुरसित भने, ‘कानुनी प्रावधानअनुसार हिसाब गर्दा अधिकतम साढे ७ वर्षको कैद मागदाबी गरेका छौं ।’ सरकारी वकिलको कार्यालयले महरामाथि मुलुकी अपराध संहिता, २०७४ को दफा २१९ अनुसारको कसुर प्रयास गरेको आरोप लगाएको छ । दफा २१९ मा कसैमाथि पनि जबर्जस्ती करणी गर्न नहुने उल्लेख छ । कार्यालयले बलात्कार नभए पनि बलात्कार प्रयास गरेकाले दफा ३४ अनुसारको कसुर गरेको आरोप लगाएको छ । दफा ३४ मा संहिताले कसुर हुने भनी ठहर्‍याएका अपराधको प्रयास गरे ‘कसुरको उद्योग गरेको मानिने’ भनिएको छ । त्यो आरोप प्रमाणित भए आधा सजाय हुने व्यवस्था छ ।

सरकारी वकिलको कार्यालयले पीडित ‘नयाँ बानेश्वर २६’ को उमेर १८ वर्षभन्दा बढी भएको र उनीमाथि बलात्कार प्रयास भएकाले कुल सजाय ७ देखि १० वर्षको आधा अर्थात् साढे ३ वर्षदेखि ५ वर्ष सजाय हुनुपर्ने माग गरेको छ । उसले ‘फौजदारी कसुर सजाय निर्धारण तथा कार्यान्वयन ऐन २०७४’ को दफा १५ अनुसार थप आधा सजायको मागदाबी गरेको छ । दफा १५ मा ‘कुनै सरकारी कार्यालय वा सार्वजनिक वा संगठित संस्थाको पद र ओहदामा बहाल रही त्यस्तो पद वा ओहदा दुरुपयोग गरी कसुर गर्नेलाई त्यस्तो कसुरमा हुने सजायको डेढी सजाय हुने’ उल्लेख छ । जसअनुसार, महरामाथि १ वर्ष ९ महिनादेखि साढे २ वर्षसम्म कैद थपिन सक्छ । आरोप प्रमाणित भए उनले ५ वर्ष ३ महिनादेखि सात वर्ष ६ महिनासम्म कैद सजाय भोग्नुपर्ने हुन सक्छ । जिल्ला सरकारी वकिलको कार्यालयले बन्द इजलासमा निरन्तर सुनुवाइको व्यवस्था मिलाउनसमेत आग्रह गरेको छ । महराबाट पीडितलाई क्षतिपूर्ति भराउने आदेश दिन र पीडित राहत कोषमा क्षतिपूर्ति शुल्क भराउन पनि मागदाबी गरिएको छ ।

यस्तो छ आरोपपत्र
किटानी जाहेरी दिने ‘नयाँ बानेश्वर २६’ ले आफ्नो मुखमा महराले बारम्बार प्रहार गरेको र बलात्कारको प्रयास गरेको खुलाएकी छन् । ‘उनले मेरो मुखमा बारम्बार मुक्का हाने अनि मैले पछाडिबाट पाइन्टमा समाएँ र प्रहरीलाई बोलाउने चेतावनी दिएँ,’ अंग्रेजीमा लेखिएको किटानी जाहेरीबारे महानगरीय प्रहरी परिसर स्रोतले कान्तिपुरसित भन्यो, ‘गुहार मागेर चिच्याएँ, त्यसपछि उनी भान्साकोठाको ढोकाबाट भागे । उनी मदिराले मातेका थिए ।’

अदालत काठमाडौंमा दर्ता भएको अभियोगपत्रमा गत असोज १२ गते महरा ‘नयाँ बानेश्वर २६’ को कोठामा पुगेको र बलात्कारको प्रयास गरेको उल्लेख छ । दुवै पक्षबीच छिनाझम्टी हुँदा महराको चस्मा खसेर फुटेको थियो । सिसासहितको एउटा फ्रेम महराले लगेपछि एउटा आँखाको सिसा र चस्माको खुट्टा ‘नयाँ बानेश्वर २६’ को कोठामा छुटेको थियो । महराले पछि अनुसन्धानका क्रममा क्षतिग्रस्त चस्मा उपलब्ध गराएनन् । तर कोठामा भेटिएको सिसा र महराले प्रयोग गर्ने चस्माको पावर मिलेको थियो । आरोपपत्रमा भनिएको छ, ‘घटनास्थलमा भेटिएको चस्माको सिसा र फ्रेमको डन्डी महराकै हो भन्ने तथ्य स्थापित भएको देखिन्छ ।’

महरामाथि सभामुखको पद दुरुपयोग गरेको आरोपसहित सरकारी वकिलले ‘निवासबाट बाहिर निस्कँदासमेत आफ्ना वरिष्ठ सुरक्षाकर्मीलाई यकिन जानकारी नदिएको’ आरोप लगाइएको छ । केही सुरक्षाकर्मी मात्रै लिएर मादक पदार्थ सेवन गर्नुका साथै मादक पदार्थ साथमा लिई पीडितलाई मादक पदार्थ सेवन गर्न कर लगाएको र सार्वजनिक पदको लाभ लिएको आरोप छ ।

महरा जोडिएको घटना ‘कार्यस्थल’ का कारण पनि संवेदनशील थियो । संहिताको दफा २२३ मा कार्यस्थल र त्यसका कारणले हुने ‘करणी’ मात्रैलाई पनि कसुरयोग्य मानिएको छ । जसमा ‘कार्यालय वा पेसागत सेवा प्राप्त गर्ने व्यक्तिसँग करणी गर्न नहुने’ उल्लेख छ । घटना हुँदा महरा प्रतिनिधिसभाका सभामुख थिए भने पीडित संसद् सचिवालयमा कार्यरत कर्मचारी हुन् । उक्त कानुनी व्यवस्थाअनुसार, कार्यालयको सेवा लिँदा वा दिँदा र कार्यस्थलमा करणी गर्नु हुँदैन । सरकारी वकिलको कार्यालयले यस कानुनी व्यवस्थाअनुसार थप मागदाबी भने गरेको छैन । ‘प्रहरीले पनि यसमा राय दिएको थिएन, हामीले निकै छलफल गर्दा पनि सेवासँग जोडिएर करणी प्रयास भएको नदेखिएकाले मागदाबी लिएनौं,’ खनालले भने ।

सरकारी वकिलको कार्यालयले प्रहरीको कन्ट्रोल रुममा परेको उजुरीलाई पनि प्रमाणका रूपमा पेस गरेको छ । घटना भएको दिन बेलुकी ८ बजेर ४० मिनेट जाँदा ‘नयाँ बानेश्वर २६’ ले आफूमाथि महराबाट बलात्कारको प्रयास भएको भनी १०० मा फोन गरेकी थिइन् । रानीपोखरीस्थित आयुक्तको कार्यालयमा रहेको ‘कन्ट्रोल रुम’ ले त्यो सूचना तत्काल बानेश्वर वृत्तलाई पठाइदिएको थियो । त्यही सूचनाका आधारमा बानेश्वरबाट प्रहरीहरूले घटनास्थल पुगेर पीडितलाई भेटेका थिए ।

घटनापछि प्रहरीले पीडित र महराबीचको मोबाइल फोनको कल र सूचना आदानप्रदानको पर्याप्त प्रमाण संकलन र विश्लेषण भने गर्न सकेन । ‘महरा सरसँग फोन माग्दा रिसको झोंकमा फुटाइदिएँ भन्नुभयो । परिवारका सदस्यलाई सोध्दा कोठा सर्ने क्रममा हरायो भन्ने जवाफ आयो,’ प्रहरी स्रोतले भन्यो, ‘पीडितले आफ्नो फोन परीक्षणका लागि दिन अस्वीकार गरेकाले हामीले कलको विश्लेषण र म्यासेजका विवरण हेरेर अनुसन्धान गरेका हौं ।’ महराले ‘फर्गेट यस्टर्डे (हिजोको कुरा बिर्सिदेऊ) भनी गरेको म्यासेजलाई प्रमाणका रूपमा पेस गरिएको छ ।

प्रहरीले महराको सुरक्षामा खटिएका सेना, सशस्त्र र नेपाल प्रहरीका आधा दर्जन सुरक्षाकर्मीसँग समेत बयान लिएको थियो । उनीहरूले पीडितको कोठा बाहिरसम्म आफूहरू गएको अनि महरा भित्र गएर फर्किएको बयान दिएका थिए । महरा करिब एक घण्टाभन्दा बढी समय पीडितको कोठामा बसेको खुलेको सीसीटीभी फुटेजबाट देखिएको छ । प्रहरीले महराको बलात्कार प्रयाससँग जोडिएका विभिन्न अन्तर्वार्ताको पनि विश्लेषण गरेको छ । स्रोतले भन्यो, ‘सूचना आदानप्रदानका अन्य महत्त्वपूर्ण प्रमाण र साक्षी पनि अदालतमा पेस हुनेछन् ।’

३६ पेजको आरोपपत्रमा उजुरीकर्ताको अनुहार र हातमा लागेको चोटलाई बलात्कार प्रयासकै परिणामका रूपमा चित्रण गरिएको छ । बलात्कारको प्रयासका क्रममा ‘नयाँ बानेश्वर २६’ माथि हातपात र आक्रमणसमेत भएको आरोपपत्रमा उल्लेख छ । प्रहरीले प्रमाणका रूपमा घटनास्थलको फोटो, भिडियो, चस्माको डन्डी र सिसा, मदिराको बोत्तल र गिलास तथा महराको जुत्ताको तलुवासमेत अदालतमा पेस गरेको छ ।

महराले बयानका क्रममा आफूमाथिको आरोपलाई ‘प्रायोजित’ भनी टिप्पणी गरेको स्रोतले बतायो । उनले ‘मलाई फसाउन कसैले आफ्नो जुत्ताको तलुवा पीडितको कोठामा लगेर राखेको हुन सक्ने’ भनी प्रतिक्रिया दिएका थिए । सीसीटीभी फुटेजका सन्दर्भमा उनले घटनास्थल भनिएको ठाउँ नजिक गएको तर संसद् सचिवालयमा कार्यरत ती कर्मचारीको कोठामा नछिरेको दाबी गरेका थिए ।

बिहीबार मुद्दा दर्ता भएकाले शुक्रबार अदालत खुल्नासाथ महराको बयान हुनेछ । बयानको अवधि उनले दिने प्रतिक्रिया र जवाफमा निर्भर रहनेछ । अदालतका कर्मचारीहरूको अनुमानमा, शुक्रबार बयान सकिए आइतबार थुनछेकको बहस हुनेछ । त्यसपछि अदालतले महरालाई पुर्पक्षका लागि थुनामा राखी मुद्दा अघि बढाउने, धरौटी वा सामान्य तारेखमा छाड्नेबारे आदेश दिनेछ । बलात्कार र त्यससँग जोडिएका मुद्दामा निरन्तर सुनुवाइ हुने भएकाले ‘न्याय सम्पादन’ प्रक्रियासमेत अन्य मुद्दाको प्रक्रियाका तुलनामा छिटो हुने अनुमान छ ।

प्रकाशित : कार्तिक १४, २०७६ १६:५२
ADVERTISEMENT
प्रतिक्रिया
पठाउनुहोस्

कृष्णनगरमा मृत्यु हुने भारतीय

रासस

कपिलवस्तु — कपिलवस्तुको कृष्णनगरमा प्रहरीको गोलीबाट मृत्यु हुने भारतीय रहेको पुष्टि भएको छ । कर्फ्यु तोडेर गरिएको प्रदर्शनको नेतृत्व गरेका व्यक्तिमाथि प्रहरीले चलाएको गोली लागेको थियो । 

त्यसरी गोली लागेर मृत्यु हुनेमा भारतको सिद्धार्थ नगर जिल्लाका बासिन्दा रहेको पुष्टि भएको छ। उनी बढ्नीसँग जोडिएको भारतीय भूभागमा स्थायी घर भएका व्यक्ति रहेको पुष्टि भएको कपिलवस्तुका प्रहरी उपरीक्षक दीपशम्शेर जबराले बताए।

कृष्णनगरमा भएको झडपमा थप उत्तेजित तुल्याउन उनीसहितको ठूलो समूह नेपाल भित्रिएको प्रहरीले आँकलन गरेको छ। प्रदर्शनमा सहभागी धेरै नागरिक अनुहार नचिनिएका रहेको समेत स्थानीयवासीको भनाइ छ।

प्रकाशित : कार्तिक १४, २०७६ १६:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×