एस्काभेटर आक्रमण : छानबिन समिति गठन

कान्तिपुर संवाददाता

बैतडी — दशरथ चन्द–९ ग्वाल्लेकमा सोमबार एस्काभेटरको बकेटले महिलालाई हिर्काइएको विषयमा छानबिन गर्न जिल्ला प्रशासन कार्यालयले समिति गठन गरेको छ ।

सबै पक्षसँगको बैठकपछि घटनाको वास्तविकता पत्ता लगाउन छानबिन समिति गठन गरिएको हो । सहायक प्रमुख जिल्ला अधिकारी लोकेन्द्रसिंह नेगीको संयोजकत्वमा बनेको समितिमा प्रहरी निरीक्षक, नगरपालिका र पूर्वाधार कार्यालयका इन्जिनियर तथा एक जना अनुसन्धान गर्ने निकायका प्रतिनिधि सदस्य रहेको प्रमुख जिल्ला अधिकारी आनन्द पौडेलले बताए । समितिलाई प्रतिवेदन पेस गर्न २ दिनको म्याद दिइएको छ ।

ग्वाल्लेकमा सुन्नाखान–चिलाउने–पार्सा सडक खन्ने क्रममा एस्काभेटरले आक्रमण गर्दा सोमबार गौरी जोशी घाइते भएकी थिइन् । चिलाउने टोलबाट अगाडि अयरखाली टोलमा सडक खन्दै गर्दा स्थानीयले अवरोध गरेका थिए । विरोधमा उत्रिएकी गौरीलाई एस्काभेटरले हिर्काएपछि दुवै पक्षबीच झडप भएको थियो । त्यस क्रममा ७ जना घाइते भएका थिए ।

गाउँलेले गौरीलाई बेहोस अवस्थामै जिल्ला अस्पतालमा पु‍र्‍याएका थिए । घाइतेलाई त्यहाँबाट धनगढी रेफर गरिएको थियो । धनगढीबाट पनि उनलाई कोहलपुर पठाइएको हो । उनको बिहीबार अस्पतालबाट डिस्चार्ज हुने भएको छ । ‘एस्काभेटरले धकेल्दा बकेटको दाँत लागेको ठाउँको मासु दबिएको डाक्टरहरूले भनेका छन् ।

अरू अवस्था सामान्य छ भनेर १० दिनलाई औषधि दिएका छन्,’ गौरीका देवर सुरेन्द्रले भने । उनले आफू घरबाट ७ हजार रुपैयाँ लिएर उपचारका लागि हिँडेको र थप पैसा आफन्तसँग सरसापट मागेर काम चलाएको बताए । उनले उपचारका लागि अन्य कुनै निकायबाट सहयोग प्राप्त नगरेको पनि जानकारी दिए ।

कारबाही गर्न माग
महिलामाथि अमानवीय व्यवहारले एस्काभेटर प्रयोग गरेको घटना र सहमतिबिना सडक खनेको विषयमा स्थानीयवासी, राजनीतिक दल, जनप्रतिनिधिलगायत सबैले विरोध गरेका छन् । ज्यानको ख्यालै नगरी एस्काभेटर प्रयोग गर्नु गल्ती भएको दशरथ चन्द नगरपालिकाकी उपप्रमुख मीना चन्दले बताइन् । उनले भनिन्, ‘सहनै नसक्ने घटना भयो ।’

उनका अनुसार विवाद आएपछि नगरपालिकाले सडकको काम रोक्न भनेको थियो । ‘जबर्जस्ती सडक खन्नु गल्ती भयो,’ उनले भनिन् । ‘त्यसैमा महिलामाथि अमानवीय प्रहार भयो ।’

प्रकाशित : कार्तिक ६, २०७६ २०:४५
ADVERTISEMENT
प्रतिक्रिया
पठाउनुहोस्
ADVERTISEMENT

राजपा उपाध्यक्ष रामनारायण यादव फरार सूचीमा

रामनारायण यादवलाई जिल्ला अदालत सप्तरीले विस्फोटक पदार्थसम्बन्धी मुद्दामा १ वर्ष ६ महिना कैद सजाय तोकेको थियो ।
अवधेशकुमार झा

राजविराज — राजपाका केन्द्रीय उपाध्यक्ष रामनारायण यादव प्रहरीको फरार सूचीमा रहेको खुलेको छ । विस्फोटक पदार्थसम्बन्धी मुद्दामा सप्तरी जिल्ला अदालतबाट १ वर्ष ६ महिना कैद सजाय तोकिएका उनी खुलेआम राजनैतिक गतिविधिमा सहभागी हुने गरेका छन् । उनी सप्तरीको छिन्नमस्ता गाउँपालिका सखडाका हुन् ।

कर्तव्य ज्यान, आगलागी र डाँका मुद्दामा २०६९ मंसिर २६ गते पक्राउ परेका सप्तरीको साबिक रम्पुरा मल्हनिया गाविसका कमलेश यादव भनिने किसन यादवको बयानका आधारमा सप्तरी प्रहरीले रणवीर सिंह भनिने रामनारायणको खोजी थालेको थियो।

रामनारायण त्यतिबेला तराईमा भूमिगत सशस्त्र समूह जनतान्त्रिक तराई मुक्ति मोर्चा रणवीर सिंह समूहका केन्द्रीय अध्यक्ष थिए। रणवीर सिंह उनकै भूमिगत संगठनभित्रको नाम थियो।

कमलेशले रामनारायणलगायतसँग सुरक्षाकर्मीको गाडीलाई लक्षित गरी हनुमाननगर–कुनौली सडक खण्डभन्दा १ किलोमिटरपूर्व पुलनजिक सडकमा बम गाडेको बयान दिएका थिए। त्यसपछि प्रहरीले कमलेशले भनेको ठाउँमा उत्खनन गर्दा बम फेला परेको थियो।

कमलेशको बयानपछि जिल्ला प्रहरी कार्यालय सप्तरीले विस्फोटक पदार्थसम्बन्धी मुद्दामा रामनारायणलाई समेत विपक्षी बनाउँदै पक्राउ गर्न मातहतको इलाका प्रहरी कार्यालय सखडालाई २०६९ पुस ३ गते पत्राचार गरेको थियो। तर रामनारायणलाई प्रहरीले पक्राउ गर्न सकेन। लगत्तै जिल्ला अदालत सप्तरीले उनको नाममा म्याद जारी गरेको थियो। तर जारी भएको म्याद २०७० जेठ १ गते तामेली भए पनि रामनारायण अदालतमा उपस्थित नभएको जिल्ला अदालतका स्रेस्तेदार दिलकुमार बर्देवाले बताए।

प्रहरीको अनुसन्धानपछि जिल्ला सरकारी वकिल कार्यालयमार्फत रामनारायणमाथि विस्फोटक पदार्थसम्बन्धी ऐन २०१८ को दफा ४(१) बमोजिमको अभियोग लगाउँदै सजायको मागदाबीसहित जिल्ला अदालतमा अभियोगपत्र दायर गरिएको थियो। उक्त मुद्दामा २०७१ वैशाख १७ गते जिल्ला अदालत सप्तरीका तात्कालीन न्यायाधीश बद्रीप्रसाद ओलीको इजलासले रामनारायण र कमलेश दुवैलाई जनही १ वर्ष ६ महिना कैद सजाय सुनाएको थियो।

कमलेश अर्के मुद्दामा कारागारभित्रै थिए भने रामनारायण फैसला हुँदासम्म फरार थिए। पुनरावेदन गर्नुपर्ने म्यादभित्र कमलेशले उच्च अदालत राजविराज इजलासमा फैसलाप्रति असहमति जनाउँदै रिट दायर गरेका थिए। २०७५ माघ ९ गते उच्च अदालत राजविराज इजलासका न्यायाधीशद्वय तिलप्रसाद श्रेष्ठ र शेखरचन्द्र अर्यालको इजलासले २०७४ माघ १६ गते नै कमलेशको मृत्यु भइसकेकाले उनीमाथिको सजाय मिनाहा गर्ने फैसला गरेको थियो।

रामनारायणले भने म्यादभित्र पुनरावेदनसमेत नगरेकाले उनीमाथि जिल्ला अदालत सप्तरीले गरेको १ वर्ष ६ महिना कैदसम्बन्धी फैसला नै अन्तिम भएको स्रेस्तेदार बर्देवाले बताए। ‘रामनारायण अदालतबाट सजाय तोकिएर फरार भएका व्यक्ति हुन्,’ बर्देवाले भने।

रामनारायण अनिलकुमार झा नेतृत्वको तात्कालीन नेपाल सद्भावना पार्टीको केन्द्रीय उपाध्यक्ष हुँदै अहिले ६ पार्टीबीच एकता भएपछि निर्माण भएको राजपाको केन्द्रीय उपाध्यक्ष छन्। उनले भने आफू जनतान्त्रिकमा रहेका बेला राज्यद्वारा लगाइएको झूटा मुद्दाको उक्त कैद सजाय भएको बताए। ‘२०७१ र २०७५ सालमा गरी दुईपटक सरकारी टोलीसँग वार्ता भई मुद्दा फिर्ता गर्ने सहमति भएको हो। तर सरकारीस्तरबाट मुद्दा फिर्ता नगरी फरार सूचीमा राखिनु दुःखद् छ,’ उनले भने, ‘वार्तामा आई हतियार त्यागेर शान्तिपूर्ण राजनीतिमा आएको पाँच वर्ष भयो तर सरकारले प्रतिबद्धताअनुरूप मुद्दा फिर्ता नगरेर द्वन्द्व बल्झाउन खोजेको छ।’

प्रकाशित : कार्तिक ६, २०७६ २०:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT