गोल्डेन अवार्ड पाउने काम गरेका छौँ : प्रधानमन्त्री

दिनेश रेग्मी

काठमाडौँ — प्रधानमन्त्री केपी शर्मा ओलीले नयाँ संविधान जारी भएपछि अन्तर्राष्ट्रिय जगतबाट नेपालले सिल्भर अवार्ड (रजत सम्मान) मात्र नभएर गोल्डेन अवार्ड (स्वर्ण सम्मान) पाउने काम गरेको बताएका छन् । 



सर्बियाको राजधानी बेलग्रेडमा हालै आयोजित अन्तर–व्यवस्थापिका संघ (आइपीयू) को सम्मेलनमा नेपालले पाएको सिल्भर अवार्ड प्रधानमन्त्री निवास बालुवाटारमा बुधबार ग्रहण गर्दै ओलीले उक्त कुरा बताएका हुन् ।


‘समानुपातिक सहभागिता, महिला सशक्तिकरण र सहभागिताको सामाजिकीकरणको क्षेत्रमा सिल्भरमात्र होइन गोल्डेन अवार्ड पाउने काम गरेको छौं’ उनले भने, ‘तर हामीले अझै विश्वको ध्यान खिच्न भने सकेका छैनौं ।’ आइपीयूको १ सय ४१ औं सम्मेलनको अवसरमा नेपालको संविधानले शान्तिपूर्ण रुपमा द्धन्द्ध व्यवस्थापन, युवा सहभागिता र अधिकार तथा विभेद अन्त्यको सुनिश्चिता लगायतमा हासिल गरेको सफलताको लागि ‘फ्युचर पोलिसी सिल्भर अवार्ड’ प्रदान गरिएको थियो ।


प्रधानमन्त्री ओलीले नेपाल आकार प्रकारमा सानो देखिएपनि विश्वको ध्यानाकर्षण हुन थालेको छ भन्दै छिट्टै विश्वको तीव्र आर्थिक वृद्धि दर भएको देश बनाउने दाबी गरे । चालू आर्थिक वर्षमा सरकारले साढे ८ प्रतिशत आर्थिक वृद्धिको लक्ष्य राखेको थियो । गत आवमा ७ प्रतिशत आर्थिक वृद्धि हुने केन्द्रीय तथ्याङ्ग विभाको प्रारम्भिक अनुमान छ । ‘हामी छिट्टै विश्वको तीव्र आर्थिक वृद्धि भएको देश बनाउँछौं’ उनले भने, ‘प्रसस्त सम्भावना छ र हामी चौतर्फी प्रगति गर्दैछौं ।’


ओलीले युवा परिषद गठन, त्यसको कार्ययोजना र कार्यक्रम गरेर सम्मान पाएको भन्दै यसलाई संघर्षको उपलब्धिको रुपमा लिनुपर्ने बताए । ‘ यो सम्मान शान्ति, समानता र विकासको पक्षमा भएको संघर्षको यो उपलब्धि हो’ ओलीले भने । उनले दुनियाँका जनप्रतिनिधिको संस्था आइपीयूले सम्मानित गरेको नेपालको संविधानलाई कसैले पनि सानो चित्त नगरी कार्यान्वयन गर्न समेत आग्रह गरे । संविधान सभाले चार वर्ष अघि २०७२ असोज ३ गते नेपालको संविधान जारी गरेको थियो ।


५ दिने आइपीयू सम्मेलनमा नेपालको नेतृत्व गरेका राष्ट्रियसभा अध्यक्ष गणेशप्रसाद तिमिल्सिनाले उक्त फ्युचर पोलिसी सिल्भर अवार्ड असोज २९ गते बेलग्रेडमा बुझेका थिए । सोही अवार्ड प्रधानमन्त्री ओलीलाई तिमिल्सिनाले हस्तान्तरण गरेका हुन् । बालुवाटारमा आयोजित हस्तान्तरण कार्यक्रममा प्रधानमन्त्री पत्नी राधिका शाक्य, पूर्वसभामुख तथा संविधानसभा अध्यक्ष सुवास नेम्वाङ, राष्ट्रिय सभा उपाध्यक्ष शशिकला दाहाल, अर्थमन्त्री युवराज खतिवडा लगायतको उपस्थिती थियो ।


जर्मनीको ह्याम्बर्गमा सन् २००७ मा स्थापित एउटा स्वतन्त्र निकाय ‘वर्ल्ड फ्यूचर काउन्सिल’ आइपीयू र राष्ट्र संघीय विकास नियोग (यूएनडीपी)सँगको सहकार्यमा विभिन्न विधामा नेपाल सहित ८ देशलाई सम्मान गरेको हो । जसमा रुवाण्डा र स्टोनियाले गोल्डेन अवार्ड (स्वर्ण सम्मान) पाएका थिए । नेपाल र संयुक्त अधिराज्यको स्कटल्याण्ड राज्यले सिल्भर अवार्ड, दक्षिण अफ्रिका र यूरोप काउन्सिलको यूवा क्षेत्र सह–व्यवस्थापकले ब्रोन्ज अवार्ड (कास्य सम्मान) र सेनेगल तथा लस एन्जल्सले फ्यूचर पोलिसी भिजन अवार्ड (सम्मान) पाएका थिए । आइपीयूमा नेपाल लगायत १ सय ७१ राष्ट्र सदस्य छन् । प्रकाशित : कार्तिक ६, २०७६ १९:४३

ADVERTISEMENT
प्रतिक्रिया
पठाउनुहोस्

अमेरिका भन्छ– ‘नेपालमा चिनियाँ प्रभाव बढ्दो’

कान्तिपुर संवाददाता

काठमाडौँ — संयुक्त राज्य अमेरिकाले नेपालमा चिनियाँ प्रभाव बढ्दै गएको टिप्पणी गरेको छ । दक्षिण तथा मध्य एसिया मामिलासम्बन्धी अमेरिकी सहायक विदेशमन्त्री एलिस जी वेल्सले त्यहाँको एक संसदीय उपसमितिमा नेपालसम्बन्धी ब्रिफिङ गर्ने क्रममा उक्त टिप्पणी गरेकी हुन् ।

‘नेपालमा चिनियाँ प्रभाव बढ्दो छ, त्यसैले तिब्बती समुदायमाथि नेपाल सरकारको प्रतिबन्ध छ,’ उपसमितिमा मंगलबार उनले भनेकी छन्, ‘सरकारले तिब्बती बौद्धमार्गी समुदायलाई प्रतिबन्ध लगाउने क्रम बढेको छ । दलाई लामाको जन्मोत्सव मनाउने सार्वजनिक समारोहमा रोक लगाइएको छ ।’ चीनका राष्ट्रपति सी चिनफिङले नेपाल भ्रमण गरेको १० दिनपछि अमेरिकी अधिकारीबाट यस्तो धारणा आएको हो ।

ब्रिफिङमा उनले नेपालमा जारी भएको फौजदारी अपराध संहिताले जबर्जस्ती धर्म परिवर्तनलाई अपराध मानेकाले धार्मिक अल्पसंख्यक समुदाय जोखिममा परेको पनि उल्लेख गरेकी छन् । नेपालको संविधान र अन्तर्राष्ट्रिय प्रतिबद्धतामा धार्मिक स्वतन्त्रताको अधिकार सुनिश्चित गरिए पनि व्यवहारमा लागू हुन चुनौती रहेको उनको टिप्पणी छ ।

पछिल्लोपटक बन्न लागेका मिडिया कानुनबारे उनको टिप्पणी छ, ‘नेपालले प्रेस स्वतन्त्रता र लोकतन्त्रका सिद्धान्तहरूको रक्षा गरेको भए पनि अनलाइन मिडियाहरूसम्बन्धी हालैका नियम र निर्देशनहरूले प्रेस स्वतन्त्रतामाथि प्रतिबन्ध लगाउने आधार तय गरेको छ ।’

नागरिकहरूको राजनीतिक अधिकार र जीवनस्तरमा भने सुधार भइरहेको भन्दै उनले प्रशंसा गरेकी छन् । ‘सामाजिक–आर्थिक विकासले नेपालीको जीवनमा महत्त्वपूर्ण सुधार भएको छ,’ वेल्सको ब्रिफिङमा छ । उनले दक्षिण एसियाका भारत, पाकिस्तानलगायत सबै मुलुकबारे ब्रिफिङ गरेकी थिइन् ।

प्रकाशित : कार्तिक ६, २०७६ १९:२०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×