टेकुमा फोहोर जम्मा गर्न नपाइने

कान्तिपुर संवाददाता

काठमाडौँ — टेकुस्थित ट्रान्सफर स्टेसनमा अब फोहोर जम्मा गर्न नपाइने भएको छ । फोहोर संकलन गरेर ल्याइएको दिन नै डम्पिङ साइटमा पुर्‍याइसक्नुपर्ने काठमाडौं महानगरका प्रमुख प्रशासकीय अधिकृत केदार न्यौपानेले बताए । 

महिनौंदेखि जम्मा भएको करिब तीन मेट्रिक टन फोहोर आइतबार उठाएर ओखरपौवा पुर्‍याइएको थियो । सो क्रममा अधिकृत न्यौपानेसहित महानगरपालिकाको वातावरण विभागका अधिकारी स्टेसन पुगेका थिए । फोहोर उठाइसकेपछि उक्त ठाउँ पखालेर फिनेल र चुना छर्किइएको वातावरण विभागले जनाएको छ ।

‘स्टेसन भनेको एक छिन बिसाउने, नमिलेको फोहोर मिलाउने ठाउँ मात्र हो,’ न्यौपानेले भने, ‘प्राविधिक समस्या भए मात्र एक दिनसम्म राख्न सकिन्छ, अर्को दिन डम्पिङ साइटमा पठाइहाल्नुपर्छ ।’

सहरका सडक र गल्ली–गल्लीमा पुगेर फोहोर जम्मा गरेपछि ट्रान्सफर स्टेसनमा ल्याउने गरिएको छ । संकलित फोहोरलाई ठूला सवारीसाधनबाट ल्यान्डफिल साइटमा पुर्‍याउने गरिन्छ । कुनै एक ठाउँमा समस्या भयो भने त्यसको चाप सीधै स्टेसनमा पर्दा फोहोर थुप्रिन्छ ।

स्टेसनलाई सधैं सफा राख्न अझ प्रयास गरिने वातावरण व्यवस्थापन विभागका प्रमुख हरिकुमार श्रेष्ठले बताए । फोहोर उत्पादनदेखि अन्तिम व्यवस्थापन गर्ने प्रणालीमा सबै जिम्मेवार भए फोहोर व्यवस्थापन सजिलो हुने उनको भनाइ छ ।

टेकुमा सञ्चालित ट्रान्सफर स्टेसन करिब ३९ रोपनी जग्गामा छ । त्यसमध्ये ३० रोपनी क्षेत्रफलमा फोहोर व्यवस्थापनमा प्रयोग हुने सवारी राख्ने तथा फोहोर ट्रान्सफर गर्ने गरिएको छ । अब महानगरले बाँकी क्षेत्रमा हरियाली बगैंचा बनाएर फोहोरबाट हुने नकारात्मक प्रभाव घटाउने योजना अघि सारेको छ ।

विभागले २०७२ भदौमा पनि ट्रान्सफर स्टेसनलाई फोहोर शून्य बनाएको थियो ।



प्रकाशित : कार्तिक ४, २०७६ १२:०१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

साझाको विद्युतीय बस खरिद अन्योलमा

प्रशान्त माली

काठमाडौँ — साझा यातायातको विद्युतीय बस खरिद योजना अन्योलमा परेको छ । असार मसान्तमा भौतिक पूर्वाधार तथा यातायात मन्त्रालयले तीन अर्ब र ललितपुर महानगपालिकाले साढे दुई करोड रुपैयाँ साझालाई दिएको थियो ।

प्रदेश ३ सरकारले ३० करोड र काठमाडौं महानगरपालिकाले १० करोड रुपैयाँ दिने भने पनि साझाले पाइसकेको छैन ।

यातायात मन्त्रालयले साझालाई बस खरिदको टेन्डर प्रक्रिया रोक्न एक महिनाअघि पत्राचार गरेको थियो । त्यसयता साझाले प्रक्रिया अगाडि बढाउनेबारे मन्त्रालयलाई दुईपटक पत्र पठाइसकेको छ । साझाले प्रगति विवरण नबुझाएको भन्दै तत्काल टेन्डर प्रक्रिया रोक्न मन्त्रालयले असोज १ गते पत्राचार गरेको थियो । मन्त्रालयले कुनै प्रतिक्रिया नदिएपछि अन्योल सिर्जना भएको हो ।

बस खरिदका लागि टेन्डर प्रक्रिया अगाडि बढाउन साझाले यातायात मन्त्रालय, यातायात विभाग, काठमाडौं महानगरपालिका, नेपाल विद्युत् प्राधिकरणका प्रतिनिधि र खरिद प्रक्रियासम्बन्धी विज्ञसमेत गरी सात सदस्यीय समिति गठन गरेको थियो । साझाका कार्यकारी निर्देशक भूषण तुलाधरले समितिमा मन्त्रालयका प्रतिनिधि पनि भएकाले छुट्टै रिपोर्ट बुझाउन आवश्यक नरहेको बताए ।

‘यद्यपि मन्त्रालयको पत्र प्राप्त भइसकेपछि प्रगति विवरणसहित दुईपटक पत्र पठाइसकेका छौ,’ उनले भने, ‘मन्त्रालयका सचिवसँग कुरा भइरहेकै थियो । प्रगति विवरण बुझाउनेबारे मन्त्रालयले
मौखिक, लिखित केही जानकारी गराएको थिएन ।’

यसबारेमा बुझ्न खोज्दा यातायात मन्त्रालयका सचिव देवेन्द्र कार्की फोन सम्पर्कमा आउन चाहेनन् । विभागका महानिर्देशक गोगनबहादुर हमालले भने आफू सरुवा भएर आएको दुई महिना मात्र भएकाले केही जानकारी नभएको बताए । ‘म आएदेखि एकपटक पनि बैठक बसेको छैन,’ उनले भने ।

मन्त्रालयले साझालाई रकम दिँदा स्फेसिफिकेसन (खरिद गर्न लागेको बसको विस्तृत विवरण) पनि दिएको थियो । तर, साझाले बस खरिद गर्न बनाएको समितिले उक्त स्फेसिफिकेसन परिमार्जन गर्‍यो ।

स्फेसिफिकेसन परिमार्जन गरेकाले पनि चित्त नुबझेको सरकारी अधिकारीको भनाइ छ । तर, साझाले भने मन्त्रालयका प्रतिनिधि नै समितिमा भएकाले स्फेसिफिकेसन परिमार्जन गर्न छुट्टै मन्त्रालयसँग बुझिराख्नु नपर्ने बताएका छन् ।

साझाका कार्यकारी निर्देशक तुलाधरले मन्त्रालयले दिएको स्फेसिफिकेसनको मुनिपट्टि यो खाका मात्र हो भनी लेखिएकाले पनि परिमार्जन गर्न सकिने तर्क गरे । ‘स्फेसिफिकेसन अपुरो पनि छ । आवश्यकता हेरेर विज्ञसँगको छलफलमा स्फेसिफिकेसन परिमार्जन गर्न सकिन्छ,’ उनले भने ।

प्रकाशित : कार्तिक ४, २०७६ ११:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT