झापाका जनप्रतिनिधिले लिए दसैं खर्च

अर्जुन राजवंशी

बिर्तामोड — जनप्रतिनिधि सेवामुखी भन्दा भत्तामुखी भएको जनगुनासो बढ्दो छ । जनतालाई सेवा गर्न निर्वाचित भएका जनप्रतिनिधिले राज्य ढुकुटीबाट आवश्यकताभन्दा बढी सेवासुविधा लिएको आरोप छ ।

व्याप्त जनगुनासोकाबीच झापाका स्थानीय तहका जनप्रतिनिधिहरुले दसैं खर्च समेत लिएका छन्। १५ मध्ये १३ वटा स्थानीय तहका ६१८ र जिल्ला समन्वय समिति (जिसस) का ९ जना जनप्रतिनिधिले यस वर्षको दसैं खर्च लिएका हुन्।

स्थानीय तहका जनप्रतिनिधिले दसैं खर्चबापत ६१ लाख ८० हजार तथा जिससका ९ जनाले एक लाख ८४ हजार रुपैयाँ लिएका हुन्। पालिकाका जनप्रतिनिधिले जनही १० हजार रुपैयाँका दरले दसैं खर्च लिएको मेचीनगर नगरपालिकाका प्रशासकीय अधिकृत महेन्द्रकुमार खाम्याहांगले जानकारी दिए। उनका अनुसार मेचीनगरका ७९ जना जनप्रतिनिधिले दसैं खर्चबापत ७ लाख ९० हजार रुपैयाँ लिएका छन्। अर्जुनधारा नगरपालिकाका ६० जना जनप्रतिनिधिले ६ लाख रुपैयाँ दसैं भत्ता बुझेको प्रशासकीय अधिकृत पंकज भूर्तेलले जानकारी दिए।

शिवसताक्षी नगरपालिकाका ५८ जनाले ५ लाख ८० हजार, दमकका ५४ जनाले ५ लाख ४० हजार, भद्रपुरका ५३ जनाले ५ लाख ३० हजार, गौरादहका ४९ जनाले ४ लाख ९० हजार, कनकाईका ४८ जनाले ४ लाख ८० हजार, गौरीगञ्जका ३४ जनाले ३ लाख ४० हजार, झापाका ३९ जनाले ३ लाख ९० हजार, बाह्रदशीका ३८ जनाले ३ लाख ८० हजार, बुद्धशान्तिका ३९ जनाले ३ लाख ९० हजार, कचनकवलका ३८ जनाले ३ लाख ८० हजार र हल्दिबारी गाउँपालिकाका २९ जनाले २ लाख ९० हजार रुपैयाँ दसैं भत्ता बुझेका छन्।

जिससका सभापतिले ४४ हजार, उपसभापतिले ४५ हजार र अन्य ७ जना सदस्यले जनही १९ हजारका दरले चाडपर्व खर्च लिएको सभापति सोमनाथ पोर्तेलले जानकारी दिए। जिल्लाको बिर्तामोड नगरपालिका र कमल गाउँपालिकाका जनप्रतिनिधिले भने दसैं खर्च लिएका छैनन्। ‘हामीलाई त त्यो ऐनबारे जानकारी नै भएन। त्यसैले हाम्रो नगरपालिकाबाट कुनै जनप्रतिनिधिले दसैं खर्च पाउनु भएन’ प्रशासकीय अधिकृत पशुपतिराज खतिवडाले भने।

जनप्रतिनिधिहरुलाई ‘गाउँ तथा नगर सभाका सदस्यहरुले पाउने सुविधाका सम्बन्धमा बनेको ऐन २०७५’ को दफा ३ को उपदफा ४ मा व्यवस्था भए बमोजिम चाडपर्व खर्च उपलब्ध गराएको अर्जुनधारा नगरपालिकाले जनाएको छ।

प्रदेश कानुनअनुसार चाडपर्व खर्च लिन पाउने व्यवस्था भएपनि आन्तरिक स्रोत हेरेर पालिकाहरुले लिने/नलिने भन्ने निर्णय गर्न पाउने व्यवस्था गरिएको छ। उक्त सुविधा लिन कार्यपालिका बैठकबाट अनिवार्य निर्णय गर्नुपर्ने व्यवस्था छ। तर, जिल्लाका कतिपय पालिकाहरुले कार्यपालिका बैठकबाट निर्णय नै नगरी चाडपर्व खर्च लिएका छन्।

‘प्रदेश सरकारको कानुनअनुसार जनप्रतिनिधिलाई दसैं खर्च दिएका हौं’ अधिकृत भूर्तेलले भने। कानुनअनुसार लिएको सुविधाप्रति आलोचना गर्नु उचित नभएको कनकाई नगरपालिकाका मेयर राजेन्द्र पोखरेलले बताए। उनले भने,‘अहिले पाइरहेको सेवा सुविधा हाम्रो खटाईको हिसाबले निकै थोरै हो। दिनमा १७ घण्टासम्म जनताको सेवा गरेर लिएको सामान्य सुविधाप्रति आलोचना गर्नुको अर्थ छैन।’ उनले सबै जनप्रनितिधिहरु आर्थिक रुपमा सवल नभएकाले दसैं खर्च लिनु स्वभाविक भएको तर्क गरे।

‘जनप्रतिनिधिले सुविधा लिए भनेर आलोचना गर्नुभन्दा स्थानीय तहहरुमा भ्रष्टाचार हुन नदिने खबरदारी अहिले आवश्यक छ’ उनले भने। उनले आफूले पाउने गरेको सबै सेवा सुविधा बार्षिक रुपमा कुनै एक सामाजिक कार्यमा लगाउने गरेको बताए। जिसस सभापति पोर्तेलले पनि संवैधानिक व्यवस्थाअनुसार चाडपर्व खर्च स्वाभाविक भएको तर्क गरे।

प्रकाशित : आश्विन ३०, २०७६ २०:००
प्रतिक्रिया
पठाउनुहोस्
ADVERTISEMENT

चौरपाटीमा ठेकेदारबीच विवाद , तीन जना प्रहरी नियन्त्रणमा 

मेनुका ढुंगाना

अछाम — अछामको चौरपाटी गाउँपालिकामा ठेकेदारबीच विवाद भएको छ । गाउँपालिकाको वडा नम्बर ७ मार्कुको शान्ति मावि र वडा नम्बर ५ लुङग्राको दया पिपलतोला माविमा ८/८ कोठे विद्यालय भवन निर्माणमा टेन्डरको विषयलाई लिएर ठेकेदारबीच विवाद भएको हो ।

बिहीबार २ बजे मूल्यांकन समितिले टेन्डर खोल्ने बेलामा विवाद भएको हो।

स्थानीयका अनुसार कांग्रेस निकटका रामबहादुर खड्काले कम मूल्यमा टेन्डर हालेको र उनैले पाउने थाहा पाएपछि नेकपा निकटका ठेकेदार बमबहादुर धामीले आक्रोशमा आएर सबै कागज च्यातेका हुन्।

'हामी ठेक्का कसले पाँउछ भन्ने प्रक्रियाको अन्तिम चरणमा थियौं। त्यति नै बेला ठेकेदार बमबहादुर धामीभित्र पसे। सबै कागज हातमा लिएर बाहिर फ्याँके। तल पट्टी अरु केटाहरूले समातेर सबै च्याते' चौरपाटी गाउँपालिकाका प्रमुख प्रशासकीय अधिकृत गणेशप्रसाद ढुंगानाले भने,'आफू ठेक्का नपाउने आक्रोशमा घटना घटाए। मिलेमतो भएन। पैसा खान पाएनन्। कागजत जलाइदिए।'

उनका अनुसार दयापिपलतोला मावि र शान्ति माविमा ८२ र ८३ लाखमा विद्यालय भवन बनाउनु पर्नेछ। यी दुई भवन बनाउनको लागि १५ जना भन्दा बढिले टेण्डर हालेका थिए।

यता प्रहरीले भने कागजात च्यात्ने बमबहादुर धामीलगायत अन्य दुई जनालाई पक्राउ गरेको छ। 'तीन जनालाई पक्राउ गरि जिल्ला प्रहरी कार्यालयमा ल्याइरहेका छौं। अहिले बाटोमै छन। यहाँ पुर्याएपछी विस्तृत बुझ्नेछौ ' प्रहरी निरीक्षक कलेन्द्र बहादुर शाहीले भने।

प्रकाशित : आश्विन ३०, २०७६ १९:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT