जिल्ला अदालतद्वारा सांसद आलममाथि अनुसन्धानका लागि ७ दिनको म्याद थप

शिव पुरी

रौतहट — रौतहटको राजपुर बम बिस्फोट घटनाको आरोपमा पक्राउ परेका नेपाली कांग्रेसका सांसद मोहमद अफताब आलमलाई जिल्ला अदालत रौतहटले अनुसन्धानका लागि ७ दिनको म्याद थप गरिदिएको छ । जिल्ला अदालतका न्यायाधीश चित्रबहादुर गुरुङले सांसद आलमलाई ७ दिनको म्याद थपको आदेश गरेका हुन् ।

ZenTravel

सांसद आलमले घटनाको १२ वर्ष पछि बिना प्रमाण आफुलाइ पक्राउ गरेको न्यायाधीश सामु बताएका थिए।

Meroghar

उनलाई अदालत पेश गर्ने क्रममा प्रहरीले गौरको सुरक्षा व्यवस्था निकै कडा बनाएको थियो। २०६४ चैत २७ गते राति अहिलेको राजपुर नगरपालिकाको फरदवा गाउँमा भएको बम बिस्फोट र त्यसका घाइतेलाई इँटा भट्टामा जलाएर मारको आरोपमा अनुसन्धानका लागि असोज २६ गते आइतबार पक्राउ गरिएका हो। उनी नेपाली कांग्रेसका नेता तथा रौतहट क्षेत्र नम्बर २ बाट प्रतिनिधिसभाका सांसद छन्।

२०६४ सालमा सम्पन्न दोस्रो संविधानसभा निर्वाचनलाई लक्षित गरेर बम बनाउँदै गर्दा बम बिस्फोट हुँदा त्यहाँ केही मानिसको मृत्यु भएको थियो भने २३ जना बढी घाइते भएका थिए। प्रमाण नष्ट गर्नका लागि घाइते भएका २३ जनालाई इँटाभट्टामा जिउँदै जलाएर मारेको अभियोगमा किटानी जाहेरी परेपछि उनलाई प्रहरीले खोजी गरेको थियो।

पीडित परिवारको जाहेरीअनुसार विस्फोटको घटनापछि तत्कालीन एसपी लक्ष्मण न्यौपाने (टीकापुर घटनामा मृत्यु भइसकेको छ) तत्कालै घटनास्थल पुगेका थिए । भोलिपल्ट अर्थात् २८ गते बिहान जिल्ला प्रहरीको टोली पनि पुग्यो तर, कतै पनि बम विस्फोटको घटना नभएको सर्जमिन मुचुल्का गर्‍यो। प्रहरी प्रधान कार्यालयसहित सम्बन्धित निकायमा जानकारी सत्यतथ्य नपठाउनुमा आलमको राजनीतिक प्रभावमा भन्ने बुझेर पीडित परिवार आक्रोशित थिए ।

धेरै रोइकराइ गरेर जाहेरी दिएका पीडित परिवारलाई आश्वस्त पार्न प्रहरीले अनुसन्धान गरेजस्तो झारा टार्‍यो। घाइतेलाई जिउँदै जलाइएको भनिएको भट्टाको माटो परीक्षणका लागि नलगी प्रहरीले त्यसबेला अर्कै भट्टाबाट लगेको पीडित परिवारको आरोप छ । २०६५ असार ९ मा जिल्ला सरकारी वकिलको कार्यालयमा प्रहरीले अनुसन्धान प्रतिवेदन बुझाएको थियो । सरकारी वकिलको कार्यालयले कसुर पुष्टिको आधार कमजोर भन्दै मुद्दा चल्न नसक्ने प्रतिवेदन बनायो । असार ३० मा महान्यायाधिवक्ता कार्यालयले उक्त निर्णयको पक्ष लिँदै मुद्दा नचलाउने भएपछि राजपुर बमकाण्ड ओझेलमा पर्‍यो ।

पीडितले महान्यायाधिवक्ताको कार्यालयको निर्णयविरुद्ध सर्वोच्च अदालतमा रिट दायर गरे । सर्वोच्चले महान्यायाधिवक्ता कार्यालयको उक्त आदेश २०६९ जेठ १६ मा खारेज गरिदियो । त्यसपछि सांसद आलमसहित आरोपीलाई पक्राउ गरेर अनुसन्धान गर्न बाटो खुलेको भएपनि राजनीतिक पहुँच र शक्तिको आडसामु प्रहरी निरीह बन्यो। घटना अनुसन्धान गरी दोषीलाई कारबाहीको दायरामा ल्याउन सर्वोच्चले गरेको आदेशयता रौतहटमा ७ जना एसपी आएर सरुवा भए। कसैले पनि घटना अनुसन्धान अघि बढाउने र आरोपीलाई पक्रने हिम्मत गरेका थिएनन् । पीडितले सर्वोच्चमा पुनः मानहानिको मुद्दा दायर गरे । सर्वोच्चको फैसला कार्यान्वयन निर्देशनालयको ताकेतापछि आलमलाई पक्राउ गर्न प्रहरी बाध्य भएको हो । पहिलेको प्रतिवेदनका आधारमा कर्तव्य ज्यान मुद्दामा आलममाथि अनुसन्धान थाल्ने एसपी खत्रीले बताए ।

प्रहरीले यतिबेला पीडितको निवेदनपछि यथार्थ केलाई पीडित पक्ष तथा साक्षीको बयान संलग्न गराएर मुद्दा अघि बढाउने तयारी छ । अचानक विस्फोटपछि स्लाइनसहित केही स्वास्थ्यकर्मी घटनास्थल पुगेको भन्ने पनि पीडित परिवारको भनाइ छ । तर को पुगे भन्ने पहिचान खुलेको छैन । स्लाइनमा बेहोस पार्ने औषधि चढाइएको पनि जाहेरीमा भनिएको छ । त्यसपछि बोरामा राखेर भट्टामा लगेको पीडितको दाबी छ । त्रिलोक र अख्तर घाइते मात्र थिए । मरिसकेका र घाइते आठ जनासहित २२ जनालाई ट्याक्टरमा राखेर भट्टामा जलाइएको जाहेरीमा छ। घटनाको केही सातापछि, नेपाल बार एसोसियसन, इन्सेकका प्रतिनिधि र मानवअधिकारकर्मी घटनास्थल पुगेका थिए । उनीहरूलाई समेत राजपुर गाउँमा दुर्व्यवहारको प्रयास भएको थियो ।

प्रकाशित : आश्विन २८, २०७६ ११:४६
प्रतिक्रिया
पठाउनुहोस्

चौरजहारीमा ८ महिनापछि नगर बस

कान्तिपुर संवाददाता

रुकुम पश्चिम — चौरजहारी नगरपालिकाले नगर बस चलाउने अन्तिम तयारी गरेको छ  । अघिल्लो आवमा खरिद गरिएका बस चलाउने तयारी अन्तिम चरणमा पुगेको हो  ।

स्थानीयको सुविधाका लागि बस खरिद गरिएको नगरपालिकाले जनाएको छ । नगर कार्यपालिका बैठकले विभिन्न वडाबाट नगरपालिकाको केन्द्रसम्म आउजाउ सहज बनाउन बस खरिदको निर्णय गरेको थियो । नगरपालिकाले ३ मिनीबस खरिद गरिसकेको छ । गत फागुन २८ गते चौरजहारीमा बस आइपुगेका थिए । ब

स ल्याइसकेपछि आवश्यक प्रक्रिया पूरा नहुँदै वर्षा लागेपछि सञ्चालनमा समस्या भएको थियो । ‘अरु प्रक्रिया लगभग सकियो, अब बर्खामा बिग्रिएका सडक सफा गरेपछि बस चल्छन्,’ नगर प्रमुख विशाल शर्माले भने, ‘विभिन्न प्रक्रिया पूरा गर्दागर्दै वर्षा सुरु भएकाले समस्या भएको थियो ।’ नगरका बासिन्दालाई सुलभ भाडामा गाडी चढाउने उद्देश्यसहित बस खरिद गरिएको उनको भनाइ छ ।

महंगो भाडा तिर्दा पनि समयमा गाडी नपाइने र समयमै गन्तव्यमा पुग्न नसक्ने बाध्यताबाट स्थानीयलाई छुटकारा दिन बस खरिदको निर्णय गरिएको उनी बताउँछन् । नगरपालिकाले १ करोड ४ लाख रुपैयाँमा बस खरिदको टेन्डर आह्वान गरेको थियो । ८२ लाख १५ हजार रुपैयाँको टेन्डर स्वीकृत गरी बस खरिद गरिएको कार्यालयले जनाएको छ । नगरपालिकाका अनुसार ३२ सिट भएका २ बस ३१ लाख १० हजार र २६ सिट भएको अर्को बस २७ लाख ९५ हजार रुपैयाँमा खरिद गरिएको थियो । नगर कार्यपालिकाले रुटअनुसार बसको भाडासमेत कायम गरिसकेको छ ।

विभिन्न १८ चोक, बजार र क्षेत्रको भाडा निर्धारण गरिएको छ । कार्यपालिकाले निर्धारण गरेको भाडाअनुसार चौरजहारीदेखि नाउलीसम्मको भाडा २ सय छ । स्थानीयले अहिले उक्त रुटमा ४ देखि ५ सय रुपैयाँसम्म भाडा तिर्दै आइरहेका छन् । चौरजहारी नगरपालिकाको बजार क्षेत्रमा २० रुपैयाँ भाडा तोकिएको छ ।

प्रकाशित : आश्विन २८, २०७६ ११:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×