सहअस्तित्वमा तमु सम्मेलनको जोड

कान्तिपुर संवाददाता

काठमाडौँ — पहिलो अन्तर्राष्ट्रिय तमु सम्मेलन १७ बुँदे घोषणापत्र जारी गर्दै सकिएको छ । सम्मेलनले विभिन्न मुलुकमा रहेका तमु (गुरुङ) हरूबीच भावनात्मक एकता, सहअस्तित्व, पहिचान र आर्थिक समृद्धिमा जोड दिएको छ । 

तमु ह्युल छोंज धीं गुरुङ राष्ट्रिय परिषद्को संयोजनमा काठमाडौंमा सम्पन्न दुईदिने सम्मेलनबाट जारी घोषणापत्रमा तमु समुदायको आदिम भूमिको रक्षा र अधिकारका लागि एकताबद्ध हुने प्रतिबद्धतासमेत व्यक्त गरिएको छ ।
सम्मेलनले तमु समुदायको इतिहास, भाषा, धर्म, संस्कृति, परम्परागत मूल्यमान्यता, भौतिक, अभौतिक, पुरातात्त्विक सम्पदाको खोज अनुसन्धान, परम्परागत ज्ञान, सीप र पेसाको संरक्षण, संवर्द्धन र विकासमा लाग्ने प्रतिबद्धता पनि व्यक्त गरेको छ ।

तमुको खेगी लामा, पच्यु, घेब्रीद्वारा पालना भइआएका मौलिक संस्कार तथा संस्कृतिमा सुधार गर्दै एकरूपता ल्याउने, कला, साहित्य, शिक्षाको विकासमा युवापुस्तालाई पुस्तान्तरण गर्ने घोषणापत्रमा उल्लेख छ ।

संरक्षण र विकासका साथै पहिचानका लागि विश्वमा रहेका तमु संस्थाहरू निरन्तर क्रियाशील हुनुपर्ने भनिएको छ । सम्मेलनले अन्तर्राष्ट्रिय तमु परिषद् गठन गर्दै प्रत्येक तीन वर्षमा तमु सम्मेलन गर्ने घोषणा गरेको छ ।

प्रकाशित : आश्विन २६, २०७६ २०:४८
प्रतिक्रिया
पठाउनुहोस्
ADVERTISEMENT
ADVERTISEMENT

भारतमा नेपाली चेलीको हत्या

कान्तिपुर संवाददाता

विराटनगर — भारत बिहारको अररिया जिल्लामा पर्ने जोगवनीको भेडयारीमा नेपाली चेली २२ वर्षीया रञ्जना सहनी (बहरदार) को शुक्रबार राति हत्या भएको छ । 

विराटनगर–११ पिचराकी रञ्जनाको ८ महिना अगाडी २३ फागुनमा जोगवनी भेडयारीकै २५ वर्षीय भिम बहरदारसँग मागी विवाह भएको थियो । जोगवनी प्रहरी चौकीका अनुसार हत्याको दुई दिनपछि आइतबार बिहान सीमावर्ती जोगवनी बजारदेखि करिब ३ किमी दक्षिण भवानीपुरस्थित परमान खोलामा रञ्जनाको शव फेला परेको हो ।

हत्या अघि रञ्जनालाई शारीरिक यातना दिइएकोले गहन अनुसन्धान भइरहेको प्रहरीले जनाएको छ । दाइजो स्वरुप माग गरिएको २ लाख रुपैयाँ नदिंदा छोरीको हत्या भएको माइती पक्षको दाबी अनुसार प्रहरीले तत्कालै रञ्जनाको श्रीमान, ससुरा सैनी बहरदार, जेठाजु अर्जुन बहरदार र छिमेकी शिवानन्द मुखियालाई पक्राउ गरेको छ ।

फरार आरोपी सासुआमा र जेठानी दिदीको खोजी भइरहेको प्रहरीले जनाएको छ । पन्ध्र दिन अगाडि पनि ज्वाइँले पसल खोल्नलाई रकम चाहिएको भन्दै दबाब दिएको र नदिएमा रञ्जनाको हत्या गर्ने धम्की दिएको माइती पक्षको आरोप छ । विवाह पछि पनि ऋण काढेर ज्वाइँलाई मोटरसाइकल किनेर दिएको माइती पक्षले प्रहरी समक्ष भनेको छ ।

रञ्जनाको शव घरदेखि करिब १ किलोमिटर परमान खोलामा फेला परेको थियो । । शनिबार छोरी हराएको खबर पाएपछि माइती पक्ष खोजतलास गर्दै जोगवनीको भेडयारी पुगेका थिए ।

खोजबिन जारी रहँदा आइतबार बिहान स्थानीय बालबालिकाले खोलामा शव देखेर खबर गरेका थिए । प्रहरीले पोष्टमार्टमका लागि शवलाई आइतबार दिउँसो फारबिसगन्ज लगेको छ ।

प्रकाशित : आश्विन २६, २०७६ २०:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT