राष्ट्रपति सीको जेटलाई छड्के पार्किङ

सुरज कुँवर

काठमाडौँ — चिनियाँ राष्ट्रपति सी चिनफिङ अर्को साता एयर चाइनाको प्रेसिडेन्टल जेट विमान बोइङ ७४७ बाट त्रिभुवन अन्तर्राष्ट्रिय विमानस्थलमा ओर्लिंदै छन् । विमानस्थलस्थित स्रोतका अनुसार उक्त विशेष विमान एक रात काठमाडौं विमानस्थलमै पार्किङ गरिनेछ । यो जहाजको पार्किङ नागरिक उड्डयन प्राधिकरण, त्रिभुवन अन्तर्राष्ट्रिय विमानस्थल र नेपाल वायुसेवा निगमका अधिकारीहरूका लागि भने निकै चुनौतीपूर्ण बनेको छ ।

ZenTravel

चिनियाँ राष्ट्रपतिको जेट विमानलाई विमानस्थलको टर्मिनल भवनतर्फ फर्काएर पश्चिम–पूर्व राख्न नसकिने भएको छ । अहिले जसरी अन्य विदेशी एयरलायन्स राखिन्छन्, त्यसरी पार्किङ गर्न नसकिनुको कारण यस जहाजलाई पुसब्याक (धकेल्न) गर्न सकिने उपकरण नहुनु हो । काठमाडौं विमानस्थलमा नेपाल वायुसेवा निगमले विदेशी विमानको ग्राउन्ड ह्यान्डल (भूमिस्थ व्यवस्थापन) गर्छ ।

Meroghar


चिनियाँ राष्ट्रपतिको जेट विमानलाई ह्यान्डल गर्ने क्षमताको उपकरण निगमसँग छैन । राष्ट्रपति चढेर आउने विमान डबल डेकर (दुईतले) र चारवटा इन्जिनयुक्त हो । ‘निगमसँग भएको उपकरण (ट्र्याक्टर) ले २ सय ५० टनसम्मको जेट विमान पुसब्याक गर्न सक्छ तर राष्ट्रपति सी आउने जहाजको तौल ३ सय टनभन्दा बढी छ,’ निगमका प्राविधिकले भने ।

चिनियाँ राष्ट्रपतिको जहाज अहिलेजसरी पश्चिम टर्मिनल भवनतर्फ पार्किङ गरिए फर्किने बेला पुसब्याक गर्न सकिने छैन । विमानस्थलका अधिकारीहरूले उक्त जहाजलाई उत्तरतर्फ फर्काएर राख्ने योजना चिनियाँ अधिकारीहरूलाई बताइसकेका छन् । ७६ मिटर लामो जहाजलाई उत्तरतर्फ फर्काएर पार्किङ गरिए यसले तीनवटा जहाजको पार्किङ स्थान ओगट्नेछ ।

राष्ट्रपति सीको भ्रमणमा यस्तै प्रकारको अर्को जहाज पनि साथै आउँदै छ । उक्त विमानलाई पनि त्यस्तै गरी राखिँदा थप तीनवटा जहाजको स्थान ओगट्ने उच्च स्रोतले बतायो ।

नेपाल सरकारको निम्तोमा आउन लागेका चिनियाँ राष्ट्रपतिका दुइटा विशेष जेट विमानलाई उत्तर–दक्षिण फर्काएर राख्दा सातवटा जहाज पार्किङको स्थान ओगटिनेछ । जसका कारण त्यस दिनका अन्य व्यावसायिक उडान प्रभावित हुनेछन् ।

‘हामीले धेरै विदेशी एयरलाइन्सका प्रतिनिधिलाई त्यस दिनको उडान प्रभावित हुन सक्ने भनिसकेका छौं,’ स्रोतले भन्यो, ‘राष्ट्रपतिको भ्रमणका दिन २४ घण्टा विमानस्थल सञ्चालन गर्दै छौं ।’ त्रिभुवन अन्तर्राष्ट्रिय विमानस्थलको पार्किङ क्षमता तीनवटा वाइडबडीसहित नौवटा जेट जहाज राख्न सकिने हो ।

विमानस्थल अधिकारीहरूका अनुसार राष्ट्रपतिको आगमन र फर्किने बेला आन्तरिक उडान पनि प्रभावित हुनेछ तर विमानस्थलले समय किटान गरिसकेको छैन । ‘अति विशिष्ट व्यक्तिको सुरक्षाका कारण धेरै कुरा गोप्य राखिएका छन्,’ सम्बद्ध एक अधिकारीले भने, ‘हामीलाई पनि धेरै जानकारी दिइएको छैन ।’

उनका अनुसार, चिनियाँ दूतावासको नेतृत्वमा एक सातायता विमानस्थलमा निगम, विमानस्थल कार्यालय, प्रहरी लगायतसँग बैठकहरू भइरहेका छन् । ती बैठकमा चिनियाँहरूको चासो राष्ट्रपतिको उडान व्यवस्थापनमा केन्द्रित देखिने गरेको एक अधिकारीले बताए । बुधबार चीनबाट एयर चाइनाको प्रेसिडेन्टल जेट आएको थियो । दिउँसो १ बजे आइपुगेको उक्त जेट विमानसहित प्राविधिकहरूले काठमाडौंको धावनमार्ग, ट्याक्सी, पार्किङस्थलको रेकी गरेका थिए ।

उक्त जहाज पनि एप्रोनमा उत्तरतर्फ फर्काएर राखिएको थियो । त्यसबेला ६ वटा विमान अटाउने पार्किङ खाली राखिएका थिए । उक्त विमान काठमाडौंमा अवतरण भएका बेला अन्य जहाजको ‘मुभमेन्ट’ कमी गराइएको थियो भने एप्रोनमा कडा सुरक्षा अपनाउँदै फोटो खिच्न पनि निषेध गरिएको एक अधिकारीले कान्तिपुरसँग भने । विमान ३ बजे फर्किएको थियो ।

प्रकाशित : आश्विन १७, २०७६ ०७:१८
ADVERTISEMENT
प्रतिक्रिया
पठाउनुहोस्
ADVERTISEMENT

अस्ट्रेलिया उडानको बाटो खुल्यो

नेपालले तोकेका वायुसेवा कम्पनीले सिड्नी, मेलबर्न, क्यानबेरा र पर्थमा सातामा ७ वटासम्म उडान गर्न पाउनेछन् ।
सुरज कुँवर

काठमाडौँ — अन्तर्राष्ट्रिय उडान अनुमतिप्राप्त नेपाली वायुसेवा कम्पनीका लागि अब अस्ट्रेलियाका लागि सिधा उडानको बाटो खुलेको छ ।

क्यानडाको मन्ट्रियलमा नेपाल र अस्ट्रेलियाका प्रतिनिधिमण्डलले मंगलबार हवाई सेवा सम्झौता गरेका छन् । अस्ट्रेलियासँग भएको समझदारीपछि नेपालले हवाई सम्झौता गरेका मुलुकको सूची ४० पुगेको छ ।

दुवै मुलुकका अधिकारीबीच भएको समझदारीपत्रअनुसार नेपालले तोकेका वायुसेवा कम्पनीले अस्ट्रेलियाको सिड्नी, मेलबर्न, क्यानबेरा र पर्थमा सातामा ७ वटासम्म उडान गर्न पाउने पर्यटन सचिव केदारबहादुर अधिकारीले जानकारी दिए । अस्ट्रेलियाले यी ठूला चार सहरबाहेकका अरू सहरमा पनि नेपाली वायुसेवालाई असीमिति उडान गर्न दिने भएको छ ।

अस्ट्रेलिया सरकारले तोकेका अस्ट्रेलियन वायुसेवा कम्पनीलाई नेपालले सातामा ३५ उडान अनुमति दिएको छ । जसमा काठमाडौंमा सातामा ७ वटा उडान गर्न पाइनेछ । बाँकी २८ वटा उडान भने अब सञ्चालनमा आउने गौतमबुद्ध अन्तर्राष्ट्रिय विमानस्थल भैरहवा र पोखरा क्षेत्रीय अन्तर्राष्ट्रिय विमानस्थलमा हुनेछन् ।

दुवै मुलुकका वायुसेवा कम्पनीलाई फिफ्थ फ्रिडम (पाँचौं ट्राफिक अधिकार) उपयोग गर्न पाउने बाटो पनि खुलेको छ । यो अधिकार प्रयोग गर्नेहरूले दुई गन्तव्य बिन्दुबाहेक उडानका क्रममा थप तेस्रो हवाई (मध्यवर्ती) बिन्दु हुँदै यात्रु सेवा तथा कार्गोको व्यापार गर्न पाउँछन् ।

नेपालले अस्ट्रेलियन वायुसेवालाई दक्षिण एसिया, दक्षिण–पूर्वी एसिया र मध्यपूर्वी एसियाका कुनै दुई बिन्दु पाँचौं ट्राफिक अधिकारका आधारमा उपयोग गर्न छुट दिएको छ । अस्ट्रेलियन पक्षका वायुसेवाले नेपालका गन्तव्य बिन्दुभन्दा पर (वियोन्ड प्वाइन्ट) का रूपमा अन्य दुई बिन्दु प्रयोग गर्न पाउनेछन् तर भारतको दिल्ली भने रोज्न पाउने छैनन् ।

अर्थात् काठमाडौंबाट उड्दा भारतको दिल्ली प्रयोग गर्न पाउने छैनन् । उता अस्ट्रेलियाले नेपाली वायुसेवालाई गन्तव्य बिन्दुभन्दा पर (वियोन्ड प्वान्ट) का रूपमा न्युजिल्यान्डका दुइटा गन्तव्य प्रयोग गर्न दिएको छ । यसअनुसार अब नेपाली वायुसेवा कम्पनीले अस्ट्रेलियाबाहेक न्युजिल्यान्डबाट पनि यात्रु तथा कार्गो बोक्न पाउनेछन् ।

दुवै मुलुकका अन्तर्राष्ट्रिय एयरलाइन्सले थर्ड पार्टी कोड सेयरको अधिकार पनि पाउने समझदारीपत्रमा उल्लेख छ । यो अधिकारले दुवै मुलुकका एयरलाइन्सले कुनै तेस्रो एयरलाइन्ससँग यात्रु/कार्गो व्यापारमा साझेदारी गर्न पाउनेछन् । तेस्रो पक्षको कोड सेयरमा दुवै मुलुकले आन्तरिक वायुसेवा कम्पनीसँग पनि व्यापार साझेदारी गर्न छुट पाउने पर्यटन मन्त्रालयका उपसचिव प्रमोद नेपालले जानकारी दिए ।

दुवै मुलुकले कार्गो उडानमा सीमा तोकेका छैनन् । ‘दुवै पक्षका डेजिगनेटेड (तोकिएका) एयरलाइन्सले जुनसुकै प्रकारको वायुयान प्रयोग गरी आआफूले निर्धारण गरेको उडान संख्या वा क्षमताका आधारमा कार्गो उडान गर्न पाउनेछन्,’ नेपाली पक्षले क्यानडाबाट जारी गरेको विज्ञप्तिमा उल्लेख छ ।

क्यानडामा जारी अन्तर्राष्ट्रिय नागरिक उड्डयन संगठन (आईकाओ) को ४० औं सम्मेलनमा सहभागी दुवै मुलुकका प्रतिनिधिमण्डलले ‘साइडलाइन’ बैठकमा समझदारीपत्रमा हस्ताक्षर गरेको सचिव अधिकारीले बताए । यसपछि दुवै मुलुकका अधिकारीबीच अन्तिम सम्झौता हुने उनको भनाइ छ ।

आईकाओको मुख्यालयमा भएको समझदारीपत्र हस्ताक्षर कार्यक्रममा अस्ट्रेलियाका तर्फबाट संघीय पूर्वाधार, यातायात, सहरी एवं क्षेत्रीय मन्त्रालयका निर्देशक जिम वल्फ नेतृत्वको टोली थियो । नेपालका तर्फबाट पर्यटन मन्त्रालयका सहसचिव सुरेश आचार्य थिए । नेपाली प्रतिनिधिमण्डलमा कानुन मन्त्रालयका सहसचिव धनराज ज्ञवाली, नागरिक उड्डयन प्राधिकरणका उपमहानिर्देशक नरेन्द्र थापा र पर्यटन मन्त्रालयका उपसचिव नेपाल थिए ।

प्रकाशित : आश्विन १४, २०७६ २१:३१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×