निगमको ओसाका उडानमा यात्रु बढे

२ सय ७४ सिट क्षमताको वाइडबडी विमानमा दसैंतिहार बीचमा नेपाल आउन र जापान जान टिकट खरिद गर्ने यात्रुको संख्या २ सय ३५ नाघेको छ ।

‘यो एक महिनाको अवधिको बुकिङमा प्रत्येक उडानमा कम्तीमा २ सय ३५ यात्रु नाघेको देखिन्छ,’ निगमका सहायक प्रवक्ता सुलेश मिश्रले भने, ‘ओसाकाबाट काठमाडौं फर्किने उडानमा बिजनेस श्रेणीका १८ सिट बिक्री भइसकेका छन् ।’

निगमले यात्रु संख्या बढेपछि टिकटको मूल्य पनि बढाएको छ । निगमले सुरुको एक महिना एकतर्फी भाडा ३७ हजार हाराहारी मूल्य तोकेको थियो । ‘अक्टोबरमा इकोनमी टिकट १ लाख १० हजार र बिजनेस श्रेणीको टिकटको मूल्य १ लाख २० हजार रुपैयाँसम्ममा बिक्री भएको छ,’ पाण्डेले भने ।

टिकट बिक्री बढेपछि निगमले सातामा दुइटा मात्रै गर्दै आएको उडानलाई तीन पुर्‍याइएको मिश्रको भनाइ छ । निगमले भदौ १३ देखि जापानको ओसाका उडान थालेको हो । पहिलो उडानकै क्रममा यात्रुको संख्या अत्यधिक न्यून भएपछि एउटा उडान कटौती गरेको थियो । तर असोज ७ देखि निगमले पुन: सातामा मंगलबार, बिहीबार र शनिबार गरी तीन दिन उडान थालेको थियो । निगमले भाइटीकाको दिन हुने उडान भने स्थगन गरेको छ ।