नयाँ घरमा पर्व

‘यसपालिको दसैं नयाँ घरमा मनाउँदै छौं,’ झुलेन्द्रले भने, ‘यसपालि पाहुना आए पनि चिन्ता छैन । चार वर्षपछि फेरि उस्तै खुसीले केटाकेटी रमाएका छन् ।’ सिनपा–९ का सुवास खड्का पनि यसपालि नयाँ घरमा दसैं मनाउने तयारीमा छन् । रंगरोगन सकिएको छ । ‘सरकारी अनुदान र आफूले ऋणपान गरेर भए पनि घर निर्माण सकियो,’ खड्काले भने, ‘अब दशैं–तिहार आउँदा पनि घर झिलिमिली पार्न पाइने भो ।’

पुनर्निर्माण गरिएका निजी निवासको संख्या थपिएसँगै यसपालि १८ हजारभन्दा बढीले नयाँ घरमा दसैं मनाउने भएका छन् । लाभग्राही सूचीमा छुटेको भन्दै पछिल्लोपटक थप १० हजार १ सय १२ वटा गुनासो दर्ता भएका छन् । तीमध्ये कति सम्बोधन हुन्छन्, टुंगो लागिसकेको छैन । यीबाहेक धेरैजसो निजी निवास पुनर्निर्माण पूरा भइसकेको जिल्ला आयोजना कार्यान्वयन एकाइले जनाएको छ । जिल्लामा कुल लाभग्राहीमध्ये हालसम्म ८४.७४ प्रतिशत निजी निवास निर्माण सम्पन्न भइसकेको छ । यहाँ २१ हजार ३ सय ६७ जना लाभग्राही सूचीमा छन् । तीमध्ये ९६.३३ प्रतिशतले पहिलो किस्ता र ९०.४४ प्रतिशतले दोस्रो किस्तासमेत लिएका छन् ।

अब प्रबलीकरणको कामले गति लिए ६ महिनादेखि एक वर्षसम्म सबै पुनर्निर्माण पूरा हुने आयोजना कार्यान्वयन एकाइले दावी गरेको छ ।