१० दिनमा १० लाख यात्रु बाहिरिए

बढी भाडा लिने २ सय ८ जनालाई कारबाही
विमल खतिवडा

काठमाडौँ — टिकट बुकिङ खुला भएयता १० लाख यात्रु दसैंका लागि उपत्यकाबाट बाहिरिएका छन् । दसैंमा घर जाने यात्रुको दैनिक टिकट काउन्टरमा भीड लाग्ने गरेको छ । असोज ५ गतेबाट टिकट बुकिङ खुला भएको हो ।

ZenTravel

महानगरीय ट्राफिक प्रहरी महाशाखाका प्रमुख एसएसपी भीमप्रसाद ढकालका अनुसार मंगलबारसम्म ९ लाख ९२ हजार ८ सय ६७ यात्रु बाहिरिएका छन् ।

६ लाख ९१ हजार ६ सय ४६ यात्रु भित्रिएका छन् । जसमा १ लाख १९ हजार ४ सय ६७ सवारी साधन यात्रु बोकेर बाहिरिएको उनले बताए । त्यस्तै यात्रुसँग बढी भाडा लिने २०८ जनालाई कारबाही गरिएको छ । ‘यात्रुसँग बढी भाडा लिने केहीलाई ठाउँकाठाउँ जरिवाना गरिएको छ,’ प्रमुख ढकालले भने, ‘केहीलाई थुनामा राखेर समेत कारबाही अगाडि बढाइएको छ ।’ उनका अनुसार उपत्यकाका १४ स्थानमा यात्रुलाई सहजता प्रदान गर्न नागरिक सहायता कक्ष राखिएको छ । जहाँ सबैभन्दा बढी गुनासा टिकट नपाएको आएको छ ।

‘सुरक्षा योजना कार्यान्वयन गरिरहँदा नागरिक सहायता कक्षमा १० वटा गुनासा दर्ता भएका छन्, मौखिक गुनासा धेरै छन्,’ उनले भने, ‘धेरै गुनासा टिकट नपाएको, सिट नम्बर उल्लेख नभएको, बढी भाडा लिएको, टिकट काटेर यात्रु नलिई गएको, गाडी नम्बर फरक परेको भन्ने छ ।’

उनले गुनासासमेत कार्यान्वयन गर्दै आएको बताए । नयाँ बसपार्कबाट बाहिरिने गाडीको अनिवार्य रूपमा यान्त्रिक परीक्षण गर्ने गरिएको छ । यात्रु लिएर हिँडेका गाडीलाई एक/दुई किमिभित्रमा मादक पदार्थ सेवन गरेको छ/छैन भनेर चेकजाँच गर्ने गरिएको छ । गाडीमा अनिवार्य रूपमा भाडादर टाँस्न लगाइएको ट्राफिक प्रहरीको दाबी छ । ‘चाडबाडमा धेरै दुर्घटना हुन्छन्,’ उनले भने, ‘दुर्घटना कम गराउन चेकजाँचमा कडाइ गरेका छौं, उपत्यकामा मात्र ४५ ठाउँमा चेक प्वाइन्ट खडा गरेका छौं ।’

त्यस्तै लामा दूरीका साधनलाई नागढुंगाबाट ट्राफिक कम्युनिकेसन एप्समार्फत चालक परिवर्तन गरे/नगरेको बारे हेर्ने गरिएको छ । नागढुंगाबाट बाहिरिने हरेक गाडी र चालकको फोटो खिच्ने गरिएको छ । ‘लामो दूरीका गाडीलाई एप्समार्फत निगरानी राख्ने गरिएको छ,’ उनले भने, ‘लामो दूरीमा दुईजना चालक राख्न भनिएको छ, चालक परिवर्तन नगर्ने १५ जनालाई कारबाही गरिएको छ ।’

क्षमताभन्दा बढी यात्रु बोक्ने ३८ वटा सवारी साधन कारबाहीमा परेका छन् । नागढुंगा–नौबिसे सडकमा बिग्रिएका ८० वटा सवारी साधनलाई र्‍याकरमार्फत झिकेर सडक सहज बनाइएको छ । सादा पोसाकका प्रहरी बसपार्क क्षेत्रमा परिचालन गरेर कालो बजारी भए/नभएको हेर्ने गरिएको छ ।

‘लाखौं यात्रु बाहिरिँदा अझै जाम किन भन्ने प्रश्न आउने गरेको छ,’ उनले भने, ‘विभिन्न जिल्लाबाट आफन्त लिन निजी सवारी साधन लिएर आउने धेरै छन्, ती बाहिरिने क्रम भइरहेको छ, यता ठाउँठाउँमा आयोजना हुने कार्यक्रमले गर्दा पनि जाम भइरहेको छ ।’ उनले यात्रु बोकेर तीव्र गतिमा सवारी चलाउने १५ जना चालकलाई कारबाही गरिएको छ ।

विभिन्न जिल्लासँग जोडिएका राजमार्गमा पनि प्रहरी परिचालन गरेर कडाइ गरिएको छ । ‘काउन्टरबाट हिँडेपछि बीचबीचमा यात्रु हाल्ने, टिकट काट्ने प्रवृत्तिलाई रोक्न ठाउँठाउँमा प्रहरी परिचालित छन,’ उनले भने, ‘भेटेसम्म प्रहरीले कारबाही गर्ने गरेको छ ।’ यता यातायात व्यवस्था विभागका महानिर्देशक गोगनबहादुर हमालका अनुसार गुल्मी र अर्घाखाँची जाने यात्रुलाई गाडी नपुगेको गुनासो आएपछि १७ वटा गाडी झिकाइएको छ । गाडी आएपछि समस्या नहुने बताए ।

‘नाकामा कतै पनि जाम छैन, मालवाहक सवारी साधनलाई ठाउँठाउँमा रोकेका छौं,अत्यावश्यक सामान बोकेर आउने साधनलाई भने खुला गरेका छौं,’ उनले भने, ‘नुवाकोट जाने सडकमा समस्या आएको थियो, अहिले गाडी चल्न सक्ने बनाइएको छ, यो खण्डमा पनि निर्माण सामग्री बोक्ने साधनलाई प्रवेशमा रोक लगाएका छौं ।’ १२ देखि १९ गतेसम्म देशभरका गाडीको रुट परमिट खुला गरिएको छ । त्यस्तै मालवाहक सवारी साधनलाई चितवनमै रोकिएको छ ।

प्रकाशित : आश्विन १४, २०७६ २०:४०
प्रतिक्रिया
पठाउनुहोस्

एउटा रुट परमिट लिएर चाडवाडमा देशैभर सार्वजनिक बस चलाउन पाइने

विमल खतिवडा

काठमाडौँ — सार्वजनिक सवारी साधनलाई आइतबारबाट देशभर इजाजत पत्र (रुट परमिट) खुला गरिएको छ । यातायात व्यवस्था विभागले सार्वजनिक सूचना जारी गर्दै रुट परमिट खुला गरेको हो । त्यस्तै १० चक्केभन्दा ठूला सवारी साधनलाई काठमाडौं प्रवेशमा रोक लगाइएको छ । विभागले असोज ७ गते सूचना जारी गर्दै रुट परमिट खुला र मालवाहक ठूला साधनलाई राजधानी प्रवेशमा रोक लगाउने निर्णय गरेको थियो ।

रुट परमिट खुला भएपछि पूर्वमा चल्ने गाडीले पश्चिम वा जुनसुकै ठाउँमा पनि यात्रु बोकेर जान पाउनेछन् । रुटमा रोकतोक हुने छैन । ‘यसरी चल्ने गाडीले कुनै एउटा रुटको परमिट भने पहिल्यै लिएको हुनुपर्नेछ, रुट नलिई गाडी चलाउन पाइँदैन,’ विभागका महानिर्देशक गोगनबहादुर हमालले भने, ‘१० चक्के र योभन्दा ठूला ट्रक, ट्र्रेलर, लरी सबैलाई चितवनबाटै रोकेका छौं ।’ उनका अनुसार पहिल्यै सूचना जारी गरिएकाले चाप कम छ । चितवनमा रोकिने मालवाहक गाडी कम भएको ट्राफिक प्रहरीले जनाएको छ ।

खाद्यान्न, औषधि, कुहिने सामान, खसीबोका बोकेर आउने साधनलाई रोकिने छैन । निर्माण सामग्री बोकेर आउने १० चक्केभन्दा ठूला सवारी साधनलाई मात्र रोकिनेछ । ‘चाडबाडको समयमा जाम हुन नदिन यस्तो निर्णय गरेका हौं,’ उनले भने । जामको समस्या नागढुंगा-नौबिसे खण्डमा बढी छ । अरूतिर ठूलो समस्या छैन । जाम बढी हुने यो खण्डबाट भित्रिने मालवाहक साधनलाई मात्र प्रवेश निषेध गरिएको हो ।

सबैभन्दा बढी जाम यही खण्डमा हुन्छ । सडक उकालो छ । क्षमताभन्दा बढी सामान बोकेर आउने साधनले गर्दा जाम हुँदै आएको छ । यो खण्ड भएर दैनिक ८ हजारभन्दा बढी सवारी साधन ओहोर-दोहोर गर्छन् । दसैंमा यो संख्या दोब्बर हुन्छ ।
‘व्यावहारिक पक्षलाई मध्यनजर गर्दै रातको समयमा जाम नहुने अवस्था आयो भने छाडिनेछ,’ उनले भने, ‘जाम हुने अवस्था आए रोकिनेछ ।’ नागढुंगा-नौबिसे सडक शनिबारबाट सहज भएको छ । ‘अहिलेलाई १९ गतेसम्म यो नियम लागू हुनेछ,’ उनले भने, ‘यसको दुरुपयोग हुन्छ भनेर समय निर्धारण गरेका हौं, माग आएमा समय थप्न तयार छौं ।’

उनले नागढुंगादेखि नौबिसेमा दसैंसम्ममा सडक राम्रो बन्ने दाबी गरे । ‘ठूलो समस्या नागढुंगा खण्डमै देखिएको हो, यो समस्या समाधान हुँदै जानेछ,’ उनले भने, ‘अर्को समस्या भनेको ग्रामीण क्षेत्रका सडकमा देखिएको छ, त्यहाँ पनि स्थानीय तहले मर्मतको काम गरिरहेका छन् ।’ महानगरीय ट्राफिक प्रहरी महाशाखाका प्रमुख एसएसपी भीमप्रसाद ढकालका अनुसार असोज ५ गते टिकट बुकिङ खुला भएयता ८० हजार ३ सय ४१ सवारी साधन राजधानी भित्रिए भने ८८ हजार ८० सवारी साधन बाहिरिएका छन् ।

त्यस्तै अहिलेसम्म ५ लाख ९७ हजार ९ सय ८६ भित्रिए राजधानी भित्रिए भने ६ लाख ८९ हजार ५ सय ७१ यात्रु बाहिरिएका छन् । ‘१० चक्केभन्दा माथिका मालवाहक सवारी साधनलाई ११ गते रातिबाट चितवनमै रोकेका छौं,’ उनले भने, ‘अत्यावश्यक सामान बोकेर आएका साधनलाई मात्र खुला गरेका छौं ।’

बीचमा आएकालाई राति कटाउने गरिएको छ । उनका अनुसार जामको समस्या रहेको नागढुंगामा शनिबारबाट यातायात सहज भएको छ । त्यस्तै यो खण्डमा फसेका, बिग्रिएका सवारी साधन तान्ने दुईवटा र्‍याकर सडकमा राखिएको छ । १/१ सय मिटरको फरकमा प्रहरी राखिएको प्रमु एसएसपी ढकालले बताए । सार्वजनिक गरिएको सुरक्षा योजनाअनुसार १४ स्थानमा नागरिक सहायता कक्ष राखिएको छ । ‘यो कक्षले यात्रुका गुनासा सुन्ने गर्छ,’ उनले भने, ‘गुनासा सुनेर आठजनालाई कारबाहीसमेत गरिसकिएको छ ।’ उनका अनुसार चाडबाडमा मादक पदार्थ सेवन गर्ने बढी हुन्छन् । यसरी मापसे गर्ने ६८० जनालाई कारबाही गरिएको ट्राफिक प्रहरीले जनाएको छ ।

‘दुईवटा चालक राख्नुपर्ने भनेका छौं,’ उनले भने, ‘नागढुंगामा राखिएको ट्राफिक कम्युनिकेसन एप्स हेरेर चालक नराख्ने नौजनालाई कारबाही गरेका छौं ।’ एउटै चालकको भरमा गाडी चलाएकालाई कारबाही गरिएको उनले बताए । तीव्र गतीमा गाडी चलाउने १२ जना र यात्रुबाट बढी भाडा लिने १५२ जना कारबाहीमा परेका छन् । ‘सिटभन्दा बढी यात्रु बोक्ने ३६ जनालाई कारबाही गरेका छौं,’ उनले भने, ‘नगाढुंगामा र्‍याकर राखिसकेपछि ६८ वटा सवारी साधनलाई तानेर पन्छाई सवारी आवागमन सहज बनाएका छौं ।’

उनले टिकट काउन्टरमा बस्ने कर्मचारीलाई पोसाक र परिचय पत्र अनिवार्य गरिएको बताए । नयाँ बसपार्कबाट बाहिरिने सवारी साधनको यान्त्रिक परीक्षण गरेर मात्र पठाउने गरिएको छ । यातायात व्यवसायी राष्ट्रिय महासंघका महासचिव सरोज सिटौलका अनुसार १९ गतेसम्म करिब २० लाख यात्रु बाहिरिनेछन् । यात्रु जाने क्रम सुरु भइसकेको छ ।

‘नागढुंगा-नौबिसे सडकले समस्या पारिरहेको छ,’ उनले भने, ‘नुवाकोट जाने टोखा-छहरे सडक पनि बिग्रिएको छ, त्यसैले अग्रिम टिकट दिन सक्ने अवस्था छैन ।’ यसबारे पटकपटक सम्बन्धित निकायको ध्यानाकर्षण गराउँदा पनि कसैले नसुनेको गुनासो गरे । अन्यत्रका पनि सडक बिग्रिएका छन् ।

प्रकाशित : आश्विन १३, २०७६ ०९:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×