महरालाई कारबाही गर्न माग 

रमेशकुमार पौडेल

चितवन — नेपाल महिला संघकी केन्द्रीय अध्यक्ष तथा सांसद उमा रेग्मीले सभामुख कृष्णबहादुर महरामाथि कारबाही गर्न माग गरेकी छन् ।

अध्यक्ष रेग्मीले मंगलबार भरतपुरमा पत्रकार सम्मेलन आयोजना गरेर यो घटनामा सभामुख महराले राजीनामा दिएरै मात्रै नपुग्ने र महरामाथि कानुनी कारबाहीको प्रकृया तत्काल सुरु हुनुपर्ने माग गरिन् । उनले पीडित महिलाले आफूलाई घटना भएकै दिन राति फोन गरेर रुदै जानकारी दिएको बताइन् ।


कानुनी कारबाहीको प्रकृया तत्काल सुरु नभए महिला संघ ७७ जिल्लाका वडावडा तहबाट आन्दोलनमा जाने उनले चेतावनी दिइन् । घटनाको बारेमा पीडित महिलाले रुदै आफूलाई भनेको हुँदा यसका बारेमा संघ चुप लागेर नबस्ने उनले बताइन् । ‘दुरसञ्चारको कल रेकर्ड हेरे हुन्छ । रुदै बोलेको हो । यस्तो जघन्य अपराध हुँदा कारबाही भएन भने हामी धेरै समय चुप लागेर बस्दैनौं’ अध्यक्ष रेग्मीले भनिन् ।


पछिल्लो समय आफू सासंद भएर गएदेखि नै ती महिलाले बेला बेलामा आफ्नो रक्तचाप परीक्षण गर्ने गरेको रेग्मीले बताइन् । ‘साढे ११ बजे फोन आयो । अरु दिन त म सुत्छु संयोगवश त्यस दिन सुतेको रहेनछु । कसले गर्‍यो अर्जेन्ट नै पो हो कि भनेर फोन उठाएँ । अनि उहाँले रुँदै घटनाको बारेमा बताउनु भयो’ रेग्मीले भनिन् । यो घटनामा सरकारले ढाकछोप गर्नभन्दा कारबाही नै गर्ने तर्फ लागेर न्याय दिन माग गरिन् ।


‘सबै पार्टी गम्भीर भएर पीडितलाई न्याय दिनुपर्छ । अहिलेसम्म महिलाहरुले न्याय पाएका छैनन् । यो घटनामा त्यसो हुनु हुँदैन । यो केशमा न्याय पाए सरकारप्रति थोरै भएपनि विश्वास बढ्छ’ रेग्मीले भनिन् । घटनाको विषयमा सत्तारुढ दल निकटको महिला संघले न्याय दिने विषयमा राम्रो पहल गर्न नसक्लान भनेर ती महिलाले आफूलाई सम्पर्क गरेको रेग्मीले दाबी गरिन् ।


सोमबार दिनभरी आफूले घटनाका बारेमा अध्ययन गर्दा महिला पीडामा परेको विषयमा कुनै शंका नरहेको अध्यक्ष रेग्मीको भनाइ छ ।


प्रहरीलाई ती महिलाले तत्काल बोलाएको तर प्रहरीले यो घटनाको बारेमा गम्भीर नभएको पत्रकार सम्मेलनमा रेग्मीले बताइन् । ‘प्रहरी आएको छ सबै खिचेर लगेको पनि छ रे । कारबाही होला भनेर ती महिला ढुक्क पनि हुनुहुन्थ्यो । तर प्रहरीले प्रमाणहरु लिएर त गयो अहिलेसम्म प्रहरीवृत्तबाट केही कुरा आएको छैन’ रेग्मीले भनिन् । महरालाई कराबाही नगर्ने र पीडितलाई तर्साउने काम कतैबाट पनि हुन नहुने उनले बताएकी छन् ।


यो पनि पढ्नुहोस्:

सभामुख कृष्णबहादुर महराद्वारा राजीनामा

महरा प्रकरण : राजीनामा पनि स-सर्त ? फरक दलको सभामुख/उपसभामुखको बाटो खुल्यो प्रकाशित : आश्विन १४, २०७६ १५:३८

प्रतिक्रिया
पठाउनुहोस्

वन्यजन्तुलाई ‘क्यानोपी ब्रिज’ 

अब्दुल्लाह मियाँ

काठमाडौँ — राजमार्गमा चल्ने सवारीले किचेर वन्यजन्तु मर्नेक्रम बढेपछि बाँके निकुञ्जले पहिलो पटक क्यानोपी ब्रिज (पुल) बनाएको छ । जुट, रेशमको डोरी र काठ प्रयोग गरेर राजमार्गमाथि ६ वटा क्यानोपी पुल बनाइएको हो । 

बाँदर, लाखर्के, न्याउरीमुसा, गोहोरो र निर बिरालो धेरै मरेको पाइएपछि दायाँबायाँ रुखमा डोरी टाँगेर पुल बनाइएको हो । निकुञ्जका सूचना अधिकारी विष्णु थपलियाले अधिकांस समय रुखमा बस्ने बाँदर, लोखर्केले ओहोर दोहोर गर्न उक्त पुलको प्रयोग गर्ने भएकाले सडक दुर्घटनाबाट मर्ने वन्यजन्तुको संख्या घट्ने विश्वास व्यक्त गरे ।

निकुञ्जखण्डको पूर्व–पश्चिम राजमार्गको अगैयादेखि ओभरी खण्डमा ३ र रत्नमार्गको चिसापानी खण्डको २ ठाउँ गरी ६ वटा क्यानोपी पुल बनाइएको हो । ‘यसलाई परीक्षणको रुपमा सुरु गरिएको छ’ थपलियाले भने, ‘कुन वन्यजन्तुले कति प्रयोग गर्छन् भन्ने सूचनाका लागि ९ वटा क्यामेरा ट्रयाप जडान गरिएको छ ।’ ६ महिना क्यामेराबाट अनुगमन गरिनेछ ।

राजमार्गको खैरीमा २५, मुगुवामा २४, मुगवामै २२, चिसापानीमा १७ र चिसापानीमै १४ मिटर लम्बाईका क्यानोपी पुल बनाइएको हो । सबै पुलको उचाईँ ८ मिटर छ भने चौडाई आधा मिटर छ ।

आर्थिक वर्ष ०७१/७२ देखि २०७६/७७ को भदौसम्म पूर्व–पश्चिम र रत्न राजमार्ग खण्डमा सवारी साधनले किचेर २ सय ८० वन्यजन्तु मरेका थिए । सबभन्दा बढी बाँदर, लोखर्के, मनसाप्रो, गोहोरो, न्याउरी मुसा र नीर बिरालो मरेका छन् ।

बाँके निकुञ्ज पूर्व–पश्चिम राजमार्गको शिवखोलादेखि पश्चिमको कोहलपुरसम्म ७२ किमि क्षेत्रमा फैलिएको छ । वीरेन्द्रनगर जोडिने रत्नराजमार्गको कोहलपुरदेखि बबईसम्मको ३० किमि क्षेत्रमा पनि बाँके र बर्दिया निकुञ्जमा फैलिएको छ । धेरै भाग राजमार्गमा पर्ने भएकाले वन्यजन्तु सवारी साधनको मारमा पर्ने गरेका छन् ।

निकुञ्जले राजमार्गमा पर्ने निकुञ्जको भागमा सवारी साधनको गति ४० किमि प्रतिघण्टा तोके पनि त्यो भन्दा बढी गतिमा सवारी साधन गुड्ने गरेका छन् ।

प्रकाशित : आश्विन १४, २०७६ १५:२३
पूरा पढ्नुहोस्
प्रतिक्रिया
पठाउनुहोस्
×