हिमाली जिल्लामै च्याङ्ग्रा अभाव

महँगो बन्दै दसैं
राजबहादुर शाही, छपाल लामा

मुगु /हुम्ला — तिब्बती नाकाबाट आयात नहुँदा यो वर्ष हिमाली जिल्लामै च्याङ्ग्राको अभाव देखिएको छ । तिब्बतमै च्याङ्ग्राको मूल्य अकासिएपछि यस वर्ष व्यापारीले च्याङ्ग्रा नभित्र्याएका हुन् ।

दसैंलाई लक्षित गरी हिमालपारिको जिल्ला मुस्ताङबाट म्याग्दी सदरमुकाम बेनीमा ल्याइएका भेडाच्याङ्ग्रा । तस्बिर : रासस

चिनियाँ बजारबाट च्याङ्ग्रा खरिद नहुँदा मुगुमा मासु अभावको समस्या चुलिएको छ । पाँच वर्षयता तिब्बती च्याङ्ग्रा जिल्लामा आउन छाडेका छन् । व्यवसायी तिलक रावतका अनुसार तिब्बती बजारमा एउटा च्याङ्ग्राको मूल्य १५ देखि १७ हजार रुपैयाँ छ ।

पाँच वर्ष अघिसम्म मुगुको उत्तरी नाका नाक्नेनाग्लाबाट दसैंका लागि एक हजार बढी च्याङ्ग्रा भित्रन्थे । च्याङ्ग्रा ल्याएर दसैं मनाउने रहर भए पनि च्याङ्ग्रा नपाउँदा चाडबाड सोचेजस्तो नहुने देखिएको छायाँनाथरारा नगरपालिकास्थित लुम्सका धनलाल बडुवालले बताए । स्थानीय खसीबोकाभन्दा च्याङ्ग्राको मीठो र स्वादिलो हुने भएकाले स्थानीय बजारमा च्याङ्ग्राको माग बढी छ ।

पूलु प्रहरी चौकी इन्चार्ज रामशरण कुर्मीका अनुसार यो वर्ष उत्तरी नाकाबाट च्याङ्ग्रा भित्रिएका छैनन् । व्यापारीहरु च्याङ्ग्रा किन्नका लागि तिब्बत गए पनि महँगीका कारण रित्तै फर्किएको उनको भनाइ छ ।
मुगु–तिब्बत सीमा नाक्चेनाग्ला नाका हुँदै च्याङ्ग्रा गमगढी भित्रने गरेको उनले जानकारी दिए । व्यापारीले यस वर्ष घाटा हुने डरले तिब्बती च्याङ्ग्रा नल्याएको मुगमकार्मारोङ गाउँपालिका अध्यक्ष छिरिङक्याप्ने लामाले बताए । च्याङ्ग्रा नआउँदा राजस्वमा समेत घाटा लागेको उनको भनाइ छ ।

स्थानीय बजारमा व्यापारीले जुम्ला, हुम्ला र बाजुराबाट खसीबोका ल्याउन थालेका छन् । गमगढीमा १४ देखि १६ हजार रुपैयाँमा खसीबोका खरिद बिक्री भइरहेको छ ।

जिल्ला कृषि कार्यालयका अनुसार करिव १० हजार घरधुरी रहेको जिल्लामा दसैंको बेला आठ हजार खसी खपत हुने गरेको छ । सदरमुकाममा खसीको मासु प्रतिकिलो ६ सय ५० र कुखुराको मासु प्रतिकिलो पाँच सय ५० रुपैयाँमा बिक्री हुने गरेको छ ।

हुम्लीको दसैं महँगो बन्दै
दसैं भित्रिएसँगै जिल्लामा तिब्बती च्याङ्ग्रा भित्रिन थालेका छन् । सदरमुकाम सिमकोटमा मात्रै पाँच सय च्याङ्ग्रा भित्रिएको उद्योग वाणिज्य संघले जनाएको छ । तिब्बती बजारबाट महँगो मूल्यमा च्याङ्ग्रा भित्रिएसँगै हुम्लीको दसैं महँगो हुने भएको हो ।

तिब्बतमै च्याङ्ग्राको मूल्य बढी भएकाले हुम्लामा पर्याप्त च्याङ्ग्रा भित्रन भने सकेका छैनन् । संघका उपाध्यक्ष रामबहादुर भण्डारीका अनुसार स्थानीय बजारमा १० हजारदेखि २५ हजार रुपैयाँमा च्याङ्ग्रा खरिद भइरहेको छ । थप च्याङ्ग्रा खरिदका लागि केही व्यापारी तिब्बती बजारमा पुगेका छन् । च्याङ्ग्रा व्यापारी ग्वामसिंह भण्डारीका अनुसार च्याग्रा –चुवाखोला–टाँके–हिल्सा नाका हुँदै जिल्लामा च्याङ्ग्रा भित्रिरहेका छन् ।

‘अहिले चाइनामै च्याङ्ग्राको मूल्य बढेको छ, त्यसैले यहाँ पनि महँगो मूल्यमा बिक्री गरिरहेका हौं,’ उनले भने, ‘तिब्बतमै एउटा च्याङ्ग्राको मूल्य पाँचदेखि १६ हजार रुपैयाँसम्म छ ।’

च्याङ्ग्राको मासु मीठो र स्वादिलो हुने भएकाले प्रत्येक दसैंमा तिब्बती च्याङ्ग्रा जिल्लामा भित्र्याइने गरिएको हो । स्थानीयले ऋण सापटी गरेर पनि घरघरमा च्याङ्ग्राको बली दिने गरेका छन् । तिब्बती च्याङ्ग्राका कारण स्थानीय खसीबोका बिक्री हुन छाडेको व्यावसायी राच्या कामीले बताए ।

प्रकाशित : आश्विन १३, २०७६ २१:५८
प्रतिक्रिया
पठाउनुहोस्

दुबईमा भएको दुर्घटनामा ६ नेपालीको मृत्यु

होम कार्की

काठमाडौँ — संयुक्त अरब इमिरेट्स (युएई)को दुबईमा सडक दुर्घटनामा परी सोमबार बिहान ६ जना नेपालीसहित ८ जनाको ज्यान गएको छ ।

दुर्घटना परी अन्य ६ जना घाइते छन्। घाइतेहरु भने नेपाली नागरिक होइनन्।

दुबईको मोहम्मद विन जायद सडकमा नेपाली कामदारलाई बोकेको माइक्रो बस लरी ट्रकमा गएर ठोकिदा ज्यान गएको हो। दुर्घटना सोमबार बिहान ४:५४ मा भएको थियो।

नेपाली दूतावासका अनुसार मृत्यु हुने नेपाली कामदारको नाम खुलेको पनि ठेगाना खुलिसकेको छैन। मृत्यु हुनेमा दीपक बिक, नयराम साउद, नारायाणप्रसाद पोखरेल, कृष्णबहादुर पुन, दानबहादुर सत्याल र रमेश चौधरी रहेका छन्। ती नेपाली सबै सुरक्षागार्ड हुन् । उनीहरु फस्ट सेक्युरेटी कम्पनीमा काम गर्थे।

कामदारलाई मरर्दिफ सिटी सेन्टरबाट सारजाहातर्फ जाँदै गरेको अवस्थामा दुर्घटना भएको हो। उनीहरुलाई डिउटीका लागि कार्यस्थल लगिदै थियो।

दुबई प्रहरी ट्राफिक विभागका निर्देशक सैफ मुहहैर अल मजरोयुईका अनुसार माइक्रो बसमा १३ जना सवार थिए। मृतकको शवलाई रसिद अस्पतालबाट शव गृहमा सारिएको छ।

प्रकाशित : आश्विन १३, २०७६ २१:४५
पूरा पढ्नुहोस्
प्रतिक्रिया
पठाउनुहोस्