किन भयो कांग्रेस नेता रिजालमाथि आक्रमण प्रयास ?

रिजाल आउने सुनेपछि नेकपा कार्यकर्ताले ऐरीचौतारीलगायत शृंगपथ सडकका विभिन्न स्थानमा रूख ढालेर आवागमन अवरुद्ध गराएका थिए । झन्डै ४ घण्टासम्म रोकिएपछि पैदलै कार्यक्रमस्थलमा जाने क्रममा रिजालमाथि ढुंगामुढा र बोतल प्रहार भएको कांग्रेस तनहुँका कार्यवाहक सभापति जितप्रकाश आलेले बताए । घटनामा रिजाललाई चोटपटक भने लागेको छैन । साढे १२ देखि सवा ४ बजेसम्म उनलाई अवरोध गरिएको थियो ।

गाउँपालिकाको केन्द्र कहाँ राख्ने भन्ने विषयमा कांग्रेस र नेकपासहितका अन्य दलहरूबीच लामो समयदेखि विवाद छ । कांग्रेसले वडा ६ को पोखरीभन्ज्याङ र अरू दलले सोही वडाको ढुंगागाडे वा चालिसेमा राख्नुपर्ने माग गर्दै आएका थिए । तर गाउँकार्यपालिका बैठकले पोखरीभन्ज्याङमा केन्द्र बनाउने निर्णय गरेपछि आइतबार भवन शिलान्यास कार्यक्रम थियो । अध्यक्ष र उपाध्यक्षसहित गाउँपालिकाका ८ वटै वडामा कांग्रेसले जितेको छ ।

नेकपालगायत पार्टीले शिलान्यास कार्यक्रमलाई बिथोल्न आइतबार ऋषिङ गाउँपालिका बन्द आयोजना गरेका थिए । बन्द अवज्ञा गरेको भन्दै रिजालमाथि अवरोध भएको हो । पोखरीभन्ज्याङमा केन्द्र बनाउन नहुने भन्दै भूपालसिंह थापाको संयोजकत्वमा गठित ऋषिङ गाउँपालिका केन्द्र सरोकार संयुक्त संघर्ष समितिले बन्दको

आह्वान गरेको थियो ।

सवा ४ बजे अवरोध हटेपछि रिजालले केन्द्रमा पुगेर भवनको शिलान्यास गरे । त्यसक्रममा उनले आक्रमण आफूमाथिमात्रै नभइ कांग्रेस र लोकतन्त्रमाथि नै भएको बताए । ‘यो घटनाले नेकपाको दुई तिहाइ सरकारको चरित्र उदांगो भएको छ,’ उनले भने, ‘सरकार अधिनायकवादतर्फ लागेको पुष्टि हुन्छ ।’ सरकारले संविधान र लोकतन्त्रविरोधी गतिविधि गरेको आरोप उनले लगाए । नेकपाका कार्यकर्ताले आफूमाथि आक्रमण गर्दा प्रहरी प्रशासन मूकदर्शक भएर बसेको उनले गुनासो गरे ।

अवरोध र आक्रमणमा संघर्ष समितिका संयोजक भूपालसिंह थापा, नेकपा ऋषिङ अध्यक्ष गन्जसिंह गुरुङ, नेकपा नेताहरू मदन आले, राजेश्वर ढकालसहित ६० जनाको सहभागिता कांग्रेसले जनाएको छ । नेकपा ऋषिङका अध्यक्ष गन्जसिंह गुरुङले भने रिजालमाथि कुनै पनि आक्रमण नभएको दाबी गरे । ‘नेकपाका कार्यकर्ताले कसैमाथि आक्रमण गरेका छैनन्,’ उनले भने, ‘आक्रमण गरेको भए घाउचोट लाग्थ्यो होला ।’ संयुक्त संघर्ष समितिमा नेकपा, लोकतान्त्रिक पार्टी, कांग्रेस बीपी, नेकपा क्रान्तिकारी, नेकपा मालेलगायत आबद्ध छन् ।

कांग्रेसद्वारा भर्त्सना

कांग्रेस केन्द्रीय कार्यालयले केन्द्रीय सदस्य रिजालमाथि भएको आक्रमण प्रयासप्रति भर्त्सना गरेको छ । ‘खुकुरी, भाला, लाठी, ढुंगा, बियरका बोतलसहित मण्डले शैलीमा आक्रमण गर्न खोजेको सुनियोजित घटनाप्रति कांग्रेसको गम्भीर ध्यानाकर्षण भएको छ,’ केन्द्रीय कार्यालयद्वारा जारी विज्ञप्तिमा उल्लेख छ, ‘कार्यक्रमको विषयमा प्रहरी प्रशासनलाई समयमै जानकारी गराउँदा पनि बेवास्ता गर्नु चिन्ताको विषय हो ।’

कांग्रेसले फरक विचार र सिद्धान्त स्वीकार गर्न नसक्ने नेकपाका कार्यकर्ताको अधिनायकवादी चरित्र देखाएको भन्दै निन्दा गरेको छ । ‘सत्ताको दुरुपयोग गर्दै नेकपाका कार्यकर्ताले एकपछि अर्को घटना दोहोर्‍याएर व्यक्तिको स्वतन्त्रतामाथि प्रहार गरिरहेको घटनाप्रति सतर्क रहन आग्रह गर्छौं,’ कांग्रेसले भनेको छ, ‘मण्डले शैलीमा हुने यस्ता गतिविधि नियन्त्रण नगरे अधिनायकवादी सरकारविरुद्ध कांग्रेस आन्दोलनमा उत्रन बाध्य हुनेछ ।’ लोकतान्त्रिक आन्दोलनको मियो कांग्रेसलाई नजिस्क्याउन र आफूलाई जिम्मेवार राजनीतिक दलका रूपमा प्रस्तुत हुन नेकपालाई चेतावनी दिएको छ ।

कांग्रेस वरिष्ठ नेता रामचन्द्र पौडेलले पनि विज्ञप्ति जारी गरी गाउँपालिका भवन शिलान्यासका लागि अतिथिलाई कुरेर बसेका जनतामाथि अपमान गर्दै नेकपा कार्यकर्ताले ‘मण्डले’ शैलीमा अवरोध गरेको जनाएका छन् ।