चौधरी परिवारले जित्यो 'कान्तिपुर करोडपति सिजन–३' को एक करोड

चौधरीले सुनवलको भूमही चोकमा ‘चौधरी फ्रेस हाउस एन्ड किराना पसल’ चलाउँदै आएका छन् । ‘सुरुमा कान्तिपुरबाट बधाई दिँदै फोन आयो, पत्याउन सकिँन,’ अनिलले टेलिफोनमा भने,‘ त्यसपछि एक करोड जितेकोमा बधाई छ भन्दै एकोहोरो फोन आइरह्यो, त्यसपछि साँच्चिकै पुरस्कार जितेछौं भन्ने भएको छ ।’

फोन आउँदा अनिल र उनका बुवा गया पसलमै थिए । अनिल मासु बिक्रि गर्दै थिए भने बुवा किराना पसलमा थिए । एक करोड पाएसँगै परिवारमा खुशी छाएको छ । अनिलका अनुसार परिवारमा बुवा, दीदी र आमासहित चार जना छन् । ‘कान्तिपुरको ग्राहक बनेको १० वर्ष भइसकेको छ,’ बुवा गयाले भने,‘ तर पुरस्कार नै पाइन्छ भनेर ग्राहक बनेको थिइन, देशविदेशका समाचार पढ्न ग्राहक बन्दा पनि यति ठूलो पुरस्कार पाइदोरहेछ, पुरस्कार पाएको खुशीयालीमा आफन्त सबैलाई फोन गरेर सुनाए ।’ उनले उक्त रकम व्यवासयमै लगानी गरेर ठूलो बनाउने बताए ।

उनी कान्तिपुर क्षेत्रीय कार्यालय भरतपुर अन्तर्गत ग्राहक बनेका थिए । गोलाप्रथा कलाकार हरिवंश आचार्यले निकालेका थिए । उनले करोडपति घोषणा गर्दै पाएको पुरस्कार राम्रो ठाउँ सदुपयोग होस् भन्दै विजेतलाई बधाई दिएका थिए । यसअघि चन्द्रागिरी नगरपालिका ४ स्थित थानकोटका विनय श्रेष्ठ र कलंकिका सरोजकुमार श्रेष्ठले १/१ करोड नगद जितिसकेका छन् । विनय पहिलो र सरोजले दोश्रो सिजनमा करोड जितेका हुन् ।‘पुरस्कार नै पाइन्छ भनेर ग्राहक बनेको थिइन,’ पहिलो करोडपति बिजेता विनय श्रेष्ठले भने,‘ नसोचेको कुरा पाए, यसरी पाएको नगदबाट केही परिवारकालागि खर्च गरे, अरु पैसा शेयर र जग्गामा लगानी गरे ।’ उनी किराना पसल चलाउंदै आएका छन् । उनको चार जनाको परिवार छ ।

‘कान्तिपुरको मात्र ग्राहक बनेको थिइन,’ उनले भने,‘ अंग्रेजी सुधार गर्न र सिक्न दि काठमाण्डु पोष्टको पनि ग्राहक बनेको थिए ।’ त्यस्तै महाबिक्रेता उपहार योजना अन्तर्गत रसिद नम्बर ०१५ का धरानस्थित मैनाली न्युज सेन्टरले एजेन्सीले गाडी जित्न सफल भएको छ । धरानस्थित छापा चोकमा रहेको सेन्टरले ड्याटसनको ‘गो’ कार जित्न सफल भएको हो । सेन्टरका सञ्चालक गोविन्द र शान्ता मैनाली हुन् । ‘कान्तिपुरबाट फोन गरेर बधाई दिदाँ सुरुमा छक्क पर्‍यौं,’ शान्ताले भनिन, ‘यसरी गाडी पर्ला भन्ने लागेको थिएन, अहिले सम्म चिठ्ठामा केही नपरेकाले पर्छ भन्ने आशै थिएन ।’ गाडी परेपछि घरमा फोन मार्फत बधाई आइरहेको उनले बताइन् ।

उनका अनुसार एजेन्सी चलाउन थालेको १६ बर्ष भएको छ । कार्यक्रममा कान्तिपुर पब्लिकेशन्स् प्रालिका अध्यक्ष तथा प्रबन्ध निर्देशक कैलाश सिरोहिया, कान्तिपुरका प्रधान सम्पादक सुधिर शर्मा, दि काठमाण्डु पोष्टका प्रधान सम्पादक अनुप काफ्ले लगायतको उपस्थिती थियो । करोडपति घोषणा कार्यक्रममा गायक सुगम पोखरेलले आधा दर्जन गीत मार्फत उपस्थित दर्शक/श्रोतालाई मनोरञ्जन दिलाएका थिए । कान्तिपुरको बार्षिक ग्राहक योजना अन्तर्गत ‘करोडपति सिजन–३’ चैतबाट सुरु भएको हो ।योजनामा कान्तिपुर र द काठमाडौं पोष्टका वार्षिक ग्राहक बन्नेलाई लक्की ड्र मार्फत मासिक १० लाख र साप्ताहिक लक्की ड्रबाट १ लाख नगद प्रदान गरिएको थियो । ग्राहक बन्नसाथ शिखर इन्स्युरेन्सबाट ५ लाखको दुर्घटना बीमा सहित स्वास्थ्य बीमामा ७ सय ५० रुपैयाँ छुट पाउने व्यवस्था गरिएको थियो । वितरण विभागका प्रमुख मनोज बस्नेतका अनुसार यो सुविधा कान्तिपुरको ग्राहक बनेका धनुषा महेन्द्रनगरका पपेन्द्र कुमार गिरीको दुर्घटनामा परी मृत्यु भएपछि ५ लाख रुपैयाँको दुर्घटना बीमाबापतको रकम श्रीमती जुना कार्कीलाई प्रदान गरिएको छ ।