‘झूट कुरा आउँदा आन्दोलन गर्न कहाँ जाने ?’

राजधानीमा शनिबार ‘दैनिक अनलाइन’ शुभारम्भ गर्दै उनले सामाजिक सञ्जाल र डिजिटल मिडियामा प्रकाशन/प्रसारण हुने गरेका हेर्न र सुन्नसमेत नसकिने समाचारविरुद्ध आफूहरू आन्दोलन गर्न कहाँ जाने भन्ने प्रश्नसमेत गरेका छन् ।

कतिपय मिडियाले आफूविरुद्ध केही समयअघि नेपाल भ्रमणमा आएका भारतीय विदेशमन्त्रीलाई बालुवाटारमा लुकेर गई भेटेको भनेर हुँदै नभएको समाचार छापेको दाहालले बताए । त्यस्ता समाचारले आफूलाई पीडा हुने गरेको उनको भनाइ छ ।

‘भारतका विदेशमन्त्री यहाँ आउनुभयो, हामी भेट्ने भन्नेमै थियौं । तर पूर्वप्रधानमन्त्री र पार्टी अध्यक्ष भएका नाताले मैले या त हामीकहाँ आउँदा भेट्न सजिलो हुन्छ या त बीचमा कहीँ भए सजिलो हुन्छ भनें । त्यो मिलाउन नसकेपछि भेट भएन,’ उनले भने, ‘तर मिडियामा खुसुक्क लुकेर गएर मैले बालुवाटारमा भेटें भनेर आयो । मैले भेटेकै थिइनँ ।’ तथ्यहीन विषयवस्तुसित नाम जोडेर आउँदा राजनीतिक नेताहरू हैरान हुने गरेकोप्रति गम्भीर हुनसमेत पत्रकारलाई उनले आग्रह गरे ।

यस्तै कारण कतिपय मुलुकले सामाजिक सञ्जाल र डिजिटल मिडियालाई नियन्त्रण गरेको उनको भनाइ छ । आफूहरू भने त्यसतर्फ नलागेको उनले बताए ।