विपन्न जेष्ठ नागरिकलाई मात्रै विमान चढ्दा ५० प्रतिशत छुट

सुरज कुँवर

काठमाडौँ — वायुसेवा संचालक संघ (आवन) मा आवद्ध सातवटा एयरलाइन्स (बुद्ध, यति, तारा, समिट, सिता, सिम्रिक र सौर्य) ले ७० वर्षदेखि माथीका जेष्ठ नागरिकलाई सर्तसहित हवाई भाडामा ५० प्रतिशत छुट दिन सहमत भएका छन् ।

फाइल तस्बिर


यो सुविधा सबै जेष्ठ नागरिकलाई भने खुला गरिएको छैन। आफुलाई विपन्न भनेर स्वघोषणा गर्ने जेष्ठ नागरिकलाई मात्रै एयरलाइन्सहरुले यो छुट उपलब्ध गराउने भएका हुन्।

संस्कृति, पर्यटन तथा नागरिक उड्डयन मन्त्रालय सम्हालेको २६ औं दिन भदौं ९ गते मन्त्री योगेश भट्टराईले १ सय ४१ वटा कार्ययोजनासहितको एकवर्षे कार्ययोजना सार्वजनिक गर्दै जेष्ठ नागरिकलाई हवाई भाडामा छुट दिने कार्यक्रम ल्याएका थिए। तर, वायुसेवा संचालक संघको शुक्रबार बसेको बैठकले सबै जेष्ठ नागरिक नभई विपन्न जेष्ठ नागरिकलाई मात्रै हवाई भाडामा ५० प्रतिशत छुट दिने निर्णय गरेको हो।

यो निर्णय आइतबारदेखि लागू हुने छ। ‘७० वर्ष माथिका विपन्न जेष्ठ नागरिकले हवाई भाडामा ५० प्रतिशत छुट पाउनका लागि सम्वन्धित वायुसेवा कम्पनीको कार्यालयमा आई स्वयंले आफु विपन्न भएको व्यहोरा स्वघोषणा गर्नु पर्नेछ,’ आवनको निर्णयमा उल्लेख छ।

यो सुविधा ‘अपर लिमिट’ सबभन्दा मंहँगो भाडा दरमा मात्रै लागु हुने छ। वायुसेवा कम्पनीले छुटको सिट भने सिमितमात्र तोकेका छन्। सुगम रुटमा एउटा एयरलाइन्सले प्रति दिन दुई जनालाई मात्रै छुट दिने छ भने दुर्गम पहाडी रुटमा प्रति सेक्टर एक जना विपन्न यात्रुले मात्रै छुट पाउने छन्।

यसअघि आवनले मन्त्रीले आफुहरुसँग छलफल नै नगरी यो कार्यक्रम ल्याएको भन्दै तत्कालिन अध्यक्ष पवित्रकुमार कार्कीको अध्यक्षतामा बसेको बैठकले भदौं १० गते (भोलीपल्ट) नै असहमती पत्र लेखेको थियो।

पर्यटन मन्त्रीको यो कार्यक्रममा समर्थन जनाउदै राष्ट्रिय ध्वजाबहाक नेपाल वायुसेवा निगम र आवनको सदस्यता नलिएको निजी क्षेत्रको श्री एयरलाइन्सले जेष्ठ नागरिकलाई छुट दिने प्याकेज सार्वजनिक गरिसकेका छन्।

श्रीकै काउन्टरबाट टिकट खरिद गर्ने दुई जनालाई छुट दिने भनेको छ भने निगमले असोज १ गते ७० वर्ष नाघेका जेष्ठ नागरिकलाई आन्तरिक उडानमा ५० प्रतिशत छुट लागू गरिसकेको छ।

प्रकाशित : आश्विन १०, २०७६ २०:२८
प्रतिक्रिया
पठाउनुहोस्

मिटर ब्याजी प्रदेशी पुर्पक्षका लागि करागार चलान

ओमप्रकाश ठाकुर

(सर्लाही) — ठगी आरोपमा पक्राउ परेका सर्लाही पिपरियाका श्याम प्रदेशी भनिने श्यामकृष्ण साहलाई जिल्ला अदालतले शुक्रबार पुर्पक्षका लागि कारागार चलान गरेको छ ।

जिल्ला अदालतका एक नम्बर जिल्ला न्यायाधीश कृष्णराम कोइरालाको एकल इजलासले प्रदेशीलाई पुर्पक्षका लागि रौतहट करागार चलान गर्न आदेश दिएको अदालतका श्रेस्तेदार मुकुन्द आचार्यले जानकारी दिए ।

प्रदेशीसँग शुक्रबार नै बयान लिइएको थियो । भोलि शनिबार सार्वजनिक बिदा परेको र आइतबार देखि अदालतमा दसैं बिदा सुरु हुने भएकाले शुक्रबार नै बयान लिएर पुर्पक्षका लागि कारागार चलानको आदेश दिइएको अदालतले जनाएको छ ।

मुद्दाको गम्भिरता हेरेर पुर्पक्षका लागि कारागार चलान गरिएको श्रेस्तेदार आचार्यले बताए । ‘मुद्दाको प्रकृति हेरेर धरौटीमा छोड्ने, तारेखमा छोड्ने वा थुनामा राख्ने तीनवटा प्रावधान हुन्छ,’ आचार्यले भने, ‘प्रदेशीको गम्भीरता हेरेर थुनामा राख्ने देखेर माननीय न्यायाधीश ज्यूले थुनामा पठाउनु भयो ।’

ठगी मुद्दामा पक्राउ परेका प्रदेशीले बन्दुकको आडमा नक्कली तमसुक बनाउने गरेको, चलनचल्तीको ब्याजको दर भन्दा निकै बढी दरमा ऋण प्रवाह गरेको, महिला तथा बालिकालाई अभद्र व्यवहार गरिएको जस्ता आरोप लगाइएको छ । विभिन्न आरोप सहित जिल्ला प्रहरी कार्यालयमा उजुरी परेपछि प्रहरीले गत भदौ १५ गते साँझ सदरमुकाम मलंगवाबाट प्रदेशीलाई पक्राउ गरेको थियो ।

प्रदेशीलाई प्रहरीले २५ दिनसम्म थुनामा राखेर अनुसन्धान गरेको थियो । ठगी मुद्दाको आरोप लगााउँदै जिल्ला प्रहरी कार्यालयले बिहीबार जिल्ला अदालतमा मद्दा दर्ता गरेको थियो । अदालतले शुक्रवार पुर्पक्षका लागि कारागार चलान गर्न आदेश दिएकाले प्रदेशीलाई रौतहट सदरमुकाम गौरस्थित कारागार चलान गरिएको सर्लाही प्रहरीका प्रवक्ता प्रहरी नायव उपरीक्षक प्रतितसिंह राठोरले बताए ।

सर्लाहीमा कारागार भवन नरहेकाले यहाँ विभिन्न अभियोगमा पक्राउ परेकाहरुलाई अदालतको आदेशपछि छिमेकी जिल्लाका कारागारमा चलान गरिँदै आएको छ ।

प्रकाशित : आश्विन १०, २०७६ २०:१८
पूरा पढ्नुहोस्
प्रतिक्रिया
पठाउनुहोस्