नेकपा र सीपीसी 'जुत्ताको नापमा खुट्टा काट्ने' होइनन्

कान्तिपुर संवाददाता

काठमाडौँ — प्रधानमन्त्री केपी शर्मा ओलीले नेकपा र चिनियाँ कम्युनिस्ट पार्टी (सीपीसी) 'जुत्ताको नापमा खुट्टा काट्ने' परिस्थितिको नभइ आ-आफ्ना मुलुकको धरातलीय यथार्थताको आधारमा सिर्जनात्मक तरिकाले मार्क्सवादको प्रयोग र विकासमा समर्पित हुने बताएका छन् । दुवै देशका कम्युनिस्टको मूल विचारधारा मार्क्सवाद नै भएपनि व्यवहारमा भने ठ्याक्कै एउटै नभएको स्पष्ट पार्दै उनले सो कुरा बताएका हुन् । उनले दुवै पार्टीले मार्क्स सिद्धान्तलाई आफ्नो देशको धरातलीय यथार्थअनुसार ढालिएको स्पष्ट पारे ।  

उनले चीनको तुलनामा नेपालका कम्युनिस्टका केही भिन्न विशेषता रहेको बताए। नेकपाले मार्क्सवादलाई आफ्नै अनुपम र विशिष्ट आवश्यकता र चुनौतीलाई सामना गर्ने गरी स्थानीयकरण गरेको र तदनुरूपको साँचोमा ढालेको उनको भनाइ छ।

सोमबार बेलुकी नेकपा र सीपीसीबीच काठमाडौंमा सुरु भएको ‘विचारधारात्मक छलफल’ को उद्घाटनमा उनले ‘सी चिनफिङ विचारधारा’ लाई विकास, समृद्धि र शान्तिपूर्ण अन्तर्राष्ट्रिय सम्बन्ध कायम गर्ने नयाँ अवधारणाका रूपमा व्याख्या गरेका छन्।

उनले छलफलमा मन्तव्य राख्ने क्रममा राजनीतिक दलले अनुकरण गर्नैपर्ने कुनै खास सूत्र नहुने बताए। उनले कसैको सिको गर्नु नक्कल भएको बताए। उनले भने , 'जतिसुकै सुन्दर भएपनि नक्कल, नक्कलै हो, त्यसो गर्नु हुँदैन। त्यो दिगो पनि रहन्न, अर्काको अनुकरणबाट सफलतामा पुग्नै सकिन्न।'

प्रधानमन्त्री ओलीले मार्क्सवादलाई आफ्नो देश अनुकुल परिवर्तन गरेर विकासतिर लम्कनुपर्ने बताए। 'मार्क्सवाद सफल त्यतिखेर मात्रै हुन्छ, जब त्यसलाई हरेक देशले आफ्नै मौलिक परिस्थिति अनुरुप प्रयोग गरेको हुन्छ। चीनले आफ्नै ढाँचाको समाजवादी मोडेल प्रस्तुत गरेको छ,' उनले भने, 'हामीले परिवर्तन र विकासको आफ्नै परिवेश र अन्तर्राष्ट्रिय परिस्थिति अनुरुपको नितान्त आफ्नै मोडेल अपनाएका छौं। यसरी हाम्रा दुई पार्टीहरु 'जुत्ताको नापमा खुट्टा काट्ने' हैन परिस्थितिको ठोस विश्लेषण गर्दै आ–आफ्ना मुलुकको धरातलीय यथार्थताको आधारमा सिर्जनात्मक तरीकाले मार्क्सवादको प्रयोग र विकासमा समर्पित छन्।'

प्रकाशित : आश्विन ७, २०७६ १४:३१
प्रतिक्रिया
पठाउनुहोस्
ADVERTISEMENT
ADVERTISEMENT

यी हुन् नेकपा र सीपीसीबीचका ६ बुँदे सम्झौता

कान्तिपुर संवाददाता

काठमाडौँ — नेकपा र चिनियाँ कम्युनिष्ट पार्टी (सीपीसी) बीच भाइचारा सम्बन्ध स्थापित भएको छ । मंगलबार आयोजित एक कार्यक्रममा दुई पार्टीबीच भाइचारा सम्बन्ध स्थापना गर्नेसम्बन्धी द्विपक्षीय समझदारीपत्रमा हस्ताक्षर भएको हो ।

नेकपाका अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहालको उपस्थितिमा नेकपाका विदेश विभाग प्रमुख माधवकुमार नेपाल र नेपाल भ्रमणमा रहेका अन्तर्राष्ट्रिय विभाग प्रमुख सोङ ताओले सम्बन्ध स्थापनासम्बन्धी समझदारी पत्रमा हस्ताक्षर गरेका हुन्। उक्त सम्झौतामा ६ बुँदा समेटिएका छन्।

यी हुन् सम्झौताका बुँदाहरु :

१. उच्चस्तरीय भ्रमण
२. कार्यकर्ता तहको अध्ययन भ्रमण बृद्धि
३. पार्टी-पार्टी अनुभव आधारित सहयोग आदान-प्रदान
४. युवा र स्थानीय नेताहरूबीच भ्रमण आदान-प्रदान
५. जनस्तरको सम्बन्ध (बुद्धिजीवी, नागरिक संस्था, मिडिया) अभिवृद्धि
६. विचार-सिद्धान्तमा आधारित वार्षिक कार्यक्रम सञ्चालन

प्रकाशित : आश्विन ७, २०७६ १४:१९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT