‘विकासबाट ठगिएकालाई सी विचारधारा’

कान्तिपुर संवाददाता

काठमाडौँ — नेकपाका नेताहरूले नेपाल जस्तो समाजवादउन्मुख मुलुकका लागि चीनका राष्ट्रपति एवं चिनियाँ कम्युनिस्ट पार्टीका महासचिव सी चिनफिङको विचारधारा प्रभावकारी हुने बताएका छन् । कार्ल मार्क्स जन्म द्विशतवार्षिकी समारोह समितिले शनिबार राजधानीमा गरेको कार्यक्रममा सीको विचारधारा र त्यसले नेपाललाई पार्ने प्रभावबारे बहस सुरु गर्दै उनीहरूले त्यस्तो धारणा व्यक्त गरेका हुन् । 

कार्ल मार्क्स जन्म द्विशतवार्षिकी समारोह समितिले शनिबार राजधानीमा गरेको कार्यक्रमका सहभागी । तस्बिर : किरण पाण्डे/कान्तिपुर

कार्यक्रममा कार्यपत्र प्रस्तुत गर्दै समितिका संयोजक एवं नेकपाका स्थायी समिति सदस्य घनश्याम भूसालले पश्चिमा देशहरूको विकासको मोडेलबाट ठगिएका मुलुकहरूले ‘सी विचारधारा’ पछ्याउनु उपयुक्त हुने धारणा राखे । आफ्नो देशको उन्नतिका लागि आन्तरिक एवं बाह्य मुलुकसँग सम्बन्ध स्थापित गर्न बेल्ट एन्ड रोड इनिसिएटिभ (बीआरआई) अवधारणा अघि सारेर चीनले पश्चिमा मुलुकको विकासको अवधारणाको विकल्प छ भन्ने पुष्टि गरिदिएको उनले बताए । ‘सीको यो अवधारणालाई अवलम्बन गर्नु चीनप्रतिको आत्मसमर्पण नभई आफ्नो आत्मसम्मान स्विकार्नु हो,’ भुसालले भने, ‘तर पुरानो व्यवस्थाका कतिपय मानिस यसलाई असफल बनाउन पहल गरिरहेका छन् ।’
सीको योजनाले मुलुकलाई सम्पूर्ण रूपमा समाजवादतर्फ उन्मुख हुन सहयोग पुर्‍याउने भुसालको भनाइ छ । चीनले अरूलाई पैसा बाँड्न नभई समाजवादी समृद्धिमा सबैलाई समावेश गर्न बीआरआईको अवधारणा ल्याएको उनले बताए ।

कार्यक्रममा नेकपा स्थायी समिति सदस्य जनार्दन शर्माले पश्चिमा पुँजीवाद कमजोर बन्दै गएको सन्दर्भमा चिनियाँ राष्ट्रपति सीको विकास मोडेलले विश्वको मन जित्न सफल भएको तर्क गरे । नेपालले सीको अभियान परिष्कृत समाजवादी मोडेल भाएकाले त्यसलाई सफल पार्नुपर्नेमा उनको जोड छ । बीआरआई भौतिक समृद्धिको मात्रै अभियान नभएर समाजवादी अभियान भएको उनको टिप्पणी थियो । ‘बीआरआई अभियानसँग जोडिँदा निर्णयको स्वतन्त्रता हामीसँग राख्न सक्छौं कि सक्दैनौं भन्ने कुरा महत्त्वपूर्ण हो, यो अभियानमा जोडिएर हाम्रो हितमा हुने कुरालाई आत्मसात् गर्नुपर्छ, नेपालको समृद्धिका लागि प्रयोग गर्नुपर्छ,’ शर्माले भने ।

चीनले अरूको नक्कल गरेका कारण धोका पाएपछि सुरु गरेको सिर्जनशीलताले नै उसको विकास द्रुतगतिमा हुन सकेको नेकपाका अर्का स्थायी समिति सदस्य सुरेन्द्र पाण्डेले बताए । अबको सय वर्षमा चीन विकसित देशको एक नम्बरमा पुग्ने उनको दाबी छ । अब चीनसँग भौतिक विकासका योजनाभन्दा पनि ज्ञान अभिवृद्धिसम्बन्धी परियोजना माग्नुपर्ने स्थायी समिति सदस्य गणेश शाहको सुझाव छ ।

प्रकाशित : आश्विन ५, २०७६ ०७:५३
प्रतिक्रिया
पठाउनुहोस्

सीसीपीसँगको सम्मेलनबारे नेकपामा छलफल

कान्तिपुर संवाददाता

काठमाडौँ — सत्तारूढ नेकपा सचिवालयको शनिबारको बैठकमा चिनियाँ कम्युनिस्ट पार्टी (सीसीपी) सँगको संयुक्त आयोजनामा हुन लागेको प्रशिक्षण सम्मेलनका विषयमा छलफल भएको छ । बैठकमा पार्टी स्कुल विभाग प्रमुख तथा सचिवालय सदस्य ईश्वर पोखरेलले सोमबार र मंगलबार हुन लागेको सम्मेलनबारे जानकारी गराएको सचिवालय स्रोतले जनाएको छ ।

सम्मेलनमा सीसीपीका तर्फबाट उनीहरूको राजनीतिक विचारधारा, नीति तथा सिद्धान्तबारे तीनवटा र नेकपाका तर्फबाट दुईवटा प्रतिवदेन पेस हुँदै छन् । ‘दुवै कम्युनिस्ट पार्टीका तर्फबाट आ–आफ्ना धारणा राख्दा उनीहरूको तर्फबाट सी थट (चिनियाँ राष्ट्रपति सी चिनफिङका विचारधारा) का विषयमा कुरा उठ्लान्, हामीले पनि आफ्नो पार्टीका बारेमा जानकारी गराउँछौं,’ सचिवालयका एक सदस्यले भने ।

सम्मेलनको प्रधानमन्त्री एवं नेकपा अध्यक्ष केपी शर्मा ओलीले उद्घाटन गर्ने र उद्घाटन सत्रमा सीसीपीका विदेश विभाग प्रमुख सोङ ताओलाई स्वागत गर्ने कार्यक्रम छ । नेकपाका अर्का अध्यक्ष पुष्पकमल दाहालले नेकपा गठन र एकता प्रक्रियामा अहिले भइरहेको विकासक्रमबारे प्रस्तुति दिनेछन् । नेकपाले सम्मेलनमा आफ्नोतर्फबाट केन्द्रीयस्तरका झन्डै २ सय कार्यकर्तालाई सहभागी गराउने तयारी गरेको छ भने चिनियाँ कम्युनिस्ट पार्टीका तर्फबाट झन्डै २० जनाको सहभागिता रहनेछ । सम्मेलनमा सहभागी हुन चिनियाँ कम्युनिस्ट पार्टीका विदेश विभाग प्रमुख ताओ सोमबार नेपाल आउँदै छन् । नेपालस्थित चिनियाँ दूतावासका प्रवक्ता झाङ सीका अनुसार उनी तीन दिन यहाँ बस्नेछन् । उनी सम्मेलनमा प्रमुख वक्ताका रूपमा सहभागी हुनेछन् । पहिलो दिनै उनले आफ्ना विचार राख्ने नेकपा विदेश विभागका उपप्रमुख विष्णु रिजालले जानकारी दिए । उनका अनुसार दोस्रो दिन चीनका तर्फबाट कार्यपत्र प्रस्तुत हुनेछ । कार्यपत्र चीनको विकास, सीसीपीको संरचना र बीआरआईमा केन्द्रित हुनेछन् ।

टुंगियो ६ महानगरका अध्यक्ष र सचिवको जिम्मेवारी
नेकपाले ६ वटा महानगरको अध्यक्ष र सचिवको टुंगो लगाएको छ । शनिबार बसेको नेकपा सचिवालय बैठकले चारवटा महानगरमा पूर्वएमाले र दुइटामा पूर्वमाओवादीका नेताहरू पर्नेगरी नेतृत्व टुंग्याएको हो । जसअनुसार काठमाडौं महानगरपालिकामा अध्यक्ष निर्मल देउला र सचिव रवीन्द्र श्रेष्ठ, ललितपुरमा अध्यक्ष मञ्जली शाक्य र सचिव ज्ञानेन्द्र शाक्य, पोखरामा अध्यक्ष दीपक पौडेल र सचिव विश्वप्रकाश लामिछाने चयन भएका छन् । भरतपुरमा रामप्रसाद न्यौपानेलाई अध्यक्ष र ईश्वर सापकोटालाई सचिव बनाइएको छ भने वीरगन्ज महानगरपालिकाको अध्यक्ष रहबर अन्सारी र सचिव डाक्टर विश्वम्भर थापा तथा विराटनगरको अध्यक्ष सागर थापा र सचिव हेम कार्की चयन भएका छन् ।

पार्टी एकताका बाँकी काम छिट्टै बस्ने सचिवालय बैठकले टुंगो लगाउने जानकारी प्रवक्ता नारायणकाजी श्रेष्ठले दिए । नेकपाले अब विभिन्न आयोग, मञ्च, परिषद् र प्रवास कमिटीको नेतृत्व टुंगो लगाउन बाँकी छ । प्रवास कमिटीमा पूर्वएमाले र पूर्वमाओवादी दुवैका तर्फबाट दाबी रहेपछि नेतृत्व टुंगिन समय लागेको हो । आयोगहरूमा पनि दुई पक्षबीच कुरा नमिल्दा सहमति जुट्न हम्मे परिरहेको छ । पार्टी एकताको १६ महिना हुँदा पनि नेकपाको तल्लो कमिटी कामविहीन छ ।

विभिन्न विभाग तथा जनवर्गीय संगठनको नेतृत्वको टुंगो लागे पनि सदस्यहरू चयन हुन नसक्दा ती निकाय कामविहीन छन् । प्रधानमन्त्री केपी शर्मा ओली दोस्रोपटक उपचारका लागि सिंगापुर जानुअघि एकता प्रक्रियाका धेरै काम धमाधम सकिएको थियो तर उनी उपचार गरेर फर्किएयता कामको रफ्तार घटेको छ । नेकपा सचिवालय बैठक दुई पटक मात्रै बसेको छ । ओली सिंगापुरमा आफ्नो दोस्रो उपचार सकेर भदौ २० मा नेपाल फर्किएका थिए ।

प्रकाशित : आश्विन ५, २०७६ ०७:५०
पूरा पढ्नुहोस्
प्रतिक्रिया
पठाउनुहोस्