राजपाको विरोध र्‍याली

अवधेशकुमार झा

राजविराज — संविधान दिवसका अवसरमा शुक्रबार सप्तरीमा विरोध र खुसियालीमा विभिन्न कार्यक्रमहरु भए । संविधान संशोधनको मागमा अडिग रहेको राष्ट्रिय जनता पार्टी नेपालका कार्यकर्ताहरुले बिहानैदेखि सदरमुकाम राजविराजसहित जिल्लाका प्रमुख बजार र चौकहरुमा विरोध प्रर्दशन गरे । 



बिहानै राजविराजमा भेला भएका राजपाका कार्यकर्ताले जिल्ला प्रशासन कार्यालयसहित विभिन्न सरकारी कार्यालयमा कालो झण्डा गाड्दै संविधान संशोधन गर्न दबाब दिए। सरकारी कार्यालयहरुमा गाडिएको कालो झण्डा प्रहरीले भने हटाएको थियो। राजपाका कार्यकर्ताहरु दिउँसो राजविराजमा बृहत प्रर्दशन गरे।

स्थानीय शिव मन्दिर परिसरबाट कालो झण्डासहित निस्केको राजपाका नेता कार्यकर्ताको जुलुस राजविराज परिक्रमा पश्चात स्थानीय नेता चौकमा कोणसभामा परिणत भएको थियो। कोणसभामा राजपा नेपालका केन्द्र, प्रदेश र जिल्ला तहका नेताहरुले संविधान संशोधनको माग राख्दै मधेसी जनताको अधिकार सुनिश्चत नगरेसम्म असोज ३ गतेलाई कालो दिवसकै रुपमा मनाइरहने बताए।

उता राजपा नेपालका वरिष्ठ उपाध्यक्ष मृगेन्द्रकुमार सिंह यादवको नेतृत्वमा शुक्रबार सप्तरीको निर्वाचन क्षेत्र नम्बर ४ का कालो दिवस मनाउने क्रममा मोटरसाइकल र्‍याली निकालिएको थियो।

संविधान जारी भएको दिनको खुसियालीमा भने सरकारी अधिकारीहरुद्धारा शुक्रबार नै राजविराजमा विभिन्न कार्यक्रमहरु गरे। सुरक्षा निकाय, स्थानीय विद्यालयका विद्यार्थीहरु र केही राजनीतिक दलका नेताहरु सम्मिलत जुलुसले बिहानै प्रभातफेरी गर्‍यो। प्रभातफेरीपछि जिल्ला प्रशासन कार्यालयमा प्रवचन कार्यक्रमको आयोजना गरियो।

प्रकाशित : आश्विन ३, २०७६ १६:४३
प्रतिक्रिया
पठाउनुहोस्
ADVERTISEMENT

संविधानलाई सबैको अपनत्व हुने गरी संशोधन गर्नु जरूरी छ : मुख्यमन्त्री राउत

रासस

काठमाडौँ — प्रदेश २ का मुख्यमन्त्री लालबाबु राउतले संविधानमा सबैले अपनत्व बोध हुने गरी संशोधन गर्नु जरूरी भएको बताएका छन् । ‘सानो पाइला’ नामक संस्थाद्वारा शुक्रबार आयोजित नेपालको संविधान २०७२ मा ‘जनताको अवधारणा’ विषयक बहस र मन्थन कार्यक्रममा मुख्यमन्त्री राउतले संविधानका राम्रा पक्षलाई संस्थागत गर्दै उत्पीडित समुदायको अधिकार सुनिश्चित हुने गरी सबैको संविधान बनाउने वातावरण निर्माणको खाँचो औँल्याए ।

‘विसं २०७२ मा आफू संविधानसभाको सदस्य रहँदा संविधान लेखन समितिमा भएका बेला मधेशका मुद्दा, समस्याको समाधानबारे पटकपटक सम्बोधन गर्न सुझाव दिए पनि त्यसलाई गौण बनाई हुन्छ, हुँदैन भन्ने विधिमा लगियो,' उनले भने, ‘सङ्घीय सरकारबाट प्रदेश सरकारलाई कमजोर बनाई सङ्घीयतामाथि नै प्रहार गर्ने काम भएको छ । संविधानका कमजोर पक्षलाई संशोधन गरी सबल र सर्वस्वीकार्य बनाउनु पर्दछ ।’

राष्ट्रिय जनता पार्टी नेपालका नेता महन्थ ठाकुरले मधेसीलाई विदेशी ठान्ने मनोविज्ञान रहेसम्म संविधान सर्वस्वीकार्य हुन सक्दैन भन्दै संशोधन गरी संविधानबाट मधेशीको आत्मसम्मान स्वाभिमानको रक्षा गर्नु जरूरी भएको धारणा राखे ।

वरिष्ठ पत्रकार किशोर नेपालले संविधानमा मधेशको मुद्दा सम्बोधन हुन नसकेका कारण मधेशी जनतामा असन्तुष्टि र पीडा छ भन्दै त्यसबाट भोलि आन्दोलन र विद्रोहको अवस्था आउन नदिन समयमै नेताहरूले विचार पुर‍्‍याउनु पर्ने आवश्यकता रहेको बताए ।

प्रकाशित : आश्विन ३, २०७६ १६:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT