प्रतिनिधिसभा बैठक : दुई विधेयक स्वीकृत, एक समितिमा

कान्तिपुर संवाददाता

काठमाडौँ — प्रतिनिधिसभाको बुधबारको बैठकले दुई विधेयक स्वीकृत गरेको छ भने एक विधेयकलाई दफावार छलफलका लागि सम्बन्धित समितिमा पठाएको छ । 

बैठकमा गृहमन्त्री रामबहादुर थापाले 'नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) विधेयक, २०७५ का सम्बन्धमा राष्ट्रियसभाबाट भएको संशोधनमाथि विचार गरियोस्' भनी प्रस्ताव प्रस्तुत गरेका थिए । प्रस्तावलाई बैठकले बहुमतले स्वीकृत गरेको हो ।

यसैगरी गृहमन्त्री थापाले 'प्रहरी समायोजन विधेयक, २०७५ का सम्बन्धमा राष्ट्रियसभाबाट भएको संशोधनमाथि विचार गरियोस्' भनी दोस्रो प्रस्ताव पनि प्रस्तुत गर्नुभएको थियो । प्रस्तावलाई बैठकले सर्वसम्मतिले स्वीकृत गरेको थियो ।

दुवै प्रस्तावमाथिको छलफलमा भाग लिँदै सांसद दिलेन्द्रप्रसाद बडूले विधेयकमा कर्मचारी भन्ने शब्द थप गरिनुपर्ने माग गरे। यसैगरी प्रधानमन्त्री केपी शर्मा ओलीका तर्फबाट कानून, न्याय तथा संसदीय मामिलामन्त्री भानुभक्त ढकालले 'लोकसेवा आयोग विधेयक, २०७५ लाई दफावार छलफलका लागि सम्बन्धित समितिमा पठाइयोस्' भनी प्रस्ताव प्रस्तुत गरेका थिए । प्रस्तावलाई बैठकले सर्वसम्मतिले स्वीकृत गरेको छ ।

प्रकाशित : आश्विन १, २०७६ १६:२५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

प्राविधिक विश्वविद्यालयमा अड्कियो बजेट अधिवेशन

देवनारायण साह

मोरङ — सामाजिक विकास मन्त्रालयले ल्याएको मनमोहन प्राविधिक विश्वविद्यालय सम्बन्धमा व्यवस्था गर्न विधेयकमा प्रदेशसभाको बजेट तथा वर्षे अधिवेशन अड्किएको छ । चालू अधिवेशनमा प्रदेश सरकारले ल्याएको विधेयक सबै पारित भइसकेको र यो एउटा विधेयकमा मात्रै अधिवेशन अड्किएको हो ।

सरकारले विधेयक पारित गरेपछि मात्रै अधिवेशन अन्त्य गर्न खोजेको छ भने प्रमुख प्रतिपक्षीले अहिलेकै अवस्थामा विधेयक पारित हुन नदिने अडानमा छ ।

सामाजिक विकास समितिले बहुमतले पारित गरेको उक्त विधेयकको प्रतिवेदनलाई कार्यसूचीबाट हटाउन माग गर्दै प्रमुख प्रतिपक्षी कांग्रेसले बुधबार दोस्रो दिन प्रदेशसभा बैठक अवरोध गर्‍यो । सदन सुरु हुने बित्तिकै प्रमुख प्रतिपक्षी दल कांग्रेसका प्रदेशसभा सदस्यहरु आ–आफ्ना सिटबाट उठेर विरोध जनाएका थिए ।

कांग्रेस सांसदको विरोधका कारण सभामुख प्रदीपकुमार भण्डारीले असोज ५ गतेसम्मका लागि बैठक स्थगित गरेका छन् । प्रदेश १ मा विधेयक निर्माणमा असहमति जनाउँदै सदन अवरुद्ध भएको यो पहिलो पटक हो ।

कांग्रेका प्रमुख सचेतक केदार कार्कीले नेकपाको स्कुल विभाग र जनवादी शिक्षा दिन्छ भन्ने कुरा नलेखिए पनि मनमोहन प्राविधिक विश्वविद्यालयसम्बन्धी विधेयकमा त्यस्तै व्यवस्था रहेकोले यसलाई फिर्ता नगरे विरोध कायम रहने बताएका थिए ।

सामाजिक विकास समितिले सोमबार उक्त विधेयक बहुमतले पारित गरेपछि प्रमुख प्रतिपक्षी दल कांग्रेसका प्रमुख सचेतक कार्कीले ‘नोट अफ डिसेन्ट’ लेखेका थिए ।

सामाजिक विकासमन्त्री जीवन घिमिरेले विश्वविद्यालयसम्बन्धी यो विधेयक नेपालकै इतिहासमा नयाँ किसिमको भएको दाबी गरे । ‘अहिले भएका विश्वविद्यालयभन्दा यो विधेयक फरक छ,’ उनले भने, ‘यो विधेयक अनुसार मनमोहन प्राविधिक विश्वविद्याय साझेदारीमा सञ्चालन हुन्छ ।’

प्रकाशित : आश्विन १, २०७६ १६:१८
पूरा पढ्नुहोस्
प्रतिक्रिया
पठाउनुहोस्
ADVERTISEMENT