का‌ंग्रेसमा क्षेत्रीय संरचना गठन धमाधम

कान्तिपुर संवाददाता

काठमाडौँ — कांग्रेसको निर्वाचन क्षेत्र स्तरका संरचना गठनसँगै १४ औं महाधिवेशन प्रक्रिया अघि बढाउने बाटो खुलेको छ । शनिबारसम्म ३५ जिल्लाको निर्वाचन क्षेत्रीय कार्यसमिति गठन भइसकेका छन् ।

एक निर्वाचन क्षेत्र भएका ३५ जिल्लामा क्षेत्रीय समिति नचाहिने र बाँकी ७ जिल्लामा केही दिनमै गठन भइसक्ने निर्वाचन समिति सदस्य गोपालकृष्ण घिमिरेले बताए ।


राज्य पुनःसंरचनाका क्रममा दुई जिल्ला थपिनुका साथै वडा, गाउँ, नगर र निर्वाचन क्षेत्र समायोजन भएपछि कांग्रेसका तत्कालीन संरचना भत्किएका थिए । संविधान जारी भएको चार वर्ष पुग्न लाग्दा बल्ल कांग्रेसले संघीय ढाँचाअनुसार संरचना बनाउन लागेको हो ।


पुरानै संरचनालाई समायोजन गरेर अन्तरिम कार्यसमिति गठन गर्न केन्द्रीय कार्यसमिति बैठकले महाधिवेशन गराउन गठित निर्वाचन समितिलाई जिम्मा दिएको थियो । पार्टीका तल्ला तहका संरचना नहुँदा महाधिवेशन प्रक्रियासमेत अघि बढ्न सकेको थिएन । अहिले गठन भएका संरचना अन्तरिम अवधिका लागि हुन् ।


कांग्रेसको १४ औं महाधिवेशन आगामी फागुनमै गर्नुपर्ने हो तर नहुने निश्चित भएको छ । सभापति शेरबहादुर देउवाले एक वर्ष कार्यकाल थपेर ७७ फागुनसम्म महाधिवेशन गर्ने जानकारी केन्द्रीय कार्य समिति बैठकमा गराइसकेका छन् । विधानअनुसार विशेष परिस्थितिमा एक वर्ष कार्यकाल बढाउन पाइन्छ । संविधानले त्यसमा थप ६ महिनाको सुविधासमेत दिएको छ ।


महाधिवेशन अघि बढाउन पार्टीको क्रियाशील सदस्यताको नवीकरण र वितरण गर्नुपर्ने हुन्छ । क्रियाशील सदस्यता वितरण र नवीकरणको काम विधानले प्रतिनिधिसभा निर्वाचन क्षेत्रीय कार्यसमितिलाई सुम्पेको छ । क्षेत्रीय कार्यसमितिले पनि वडा, गाउँ र नगर कार्यसमितिको सिफारिसअनुसार क्रियाशील सदस्यता टुंगो लगाउने गर्छन् ।


महाधिवेशन प्रक्रिया अघि बढाउन निर्वाचन क्षेत्रीयस्तरका कार्यसमितिसँगै गाउँ, नगर र वडा तहका संरचना गठन हुनुपर्छ । सदस्य घिमिरेका अनुसार डोल्पा, मनाङ, मुस्ताङ, सप्तरी, सिरहा, सिन्धुपाल्चोकमा मात्रै क्षेत्रीय कार्यसमिति गठन बाँकी छ । ७ सय ५३ पालिका र ६ हजार ७ सय ४३ वडाको संरचना गठन अघि बढाइएको छ । घिमिरेले कात्तिक मसान्तभित्र वडा तहसम्मकै संरचना गठन भइसक्ने बताए ।


प्रवक्ता विश्वप्रकाश शर्माले स्थानीय तहका पार्टी संरचनाको गठन सकिनासाथ महाधिवेशन प्रक्रिया अघि बढ्ने बताए । प्रतिनिधिसभाको १ सय ६५ क्षेत्रमध्ये अहिले १ सय ३० क्षेत्रीय कार्यसमिति गठन हुनेछन् । एक निर्वाचन क्षेत्र रहेका जिल्लामा निर्वाचन क्षेत्रको काम जिल्ला कार्यसमितिले हेर्छ । प्रदेश कार्यसमिति भने ३ सय ३० क्षेत्रमै गठन गरिने कांग्रेसले जनाएको छ ।


स्थानीय तहका संरचना गठनमा विवाद नहोस् भनेर ९ वटा मापदण्डसहितको निर्देशिका जारी गरिएको थियो । त्यसअनुसार निर्वाचन समितिले वरिष्ठता, महाधिवेशन प्रतिनिधि र क्रियाशील सदस्यता, भूगोलको जनसंख्यालगायत मापदण्डका आधारमा नेतृत्व तय गरेको हो ।


सात प्रदेशका कार्यसमिति गठनमा भने कांग्रेसले अझै निर्णय लिएको छैन । महाधिवेशनको प्रक्रिया अघि बढाउन आवश्यक नपरे पनि पार्टी संगठन सुदृढीकरणका लागि प्रदेश कार्यसमिति तत्काल गठन हुनुपर्ने माग तल्लो तहबाट उठ्दै आएको छ । निर्वाचन कि भागबन्डा भन्नेमा कुरा नमिलेकाले प्रदेश कार्यसमिति गठनमा ढिलाइ हुँदै आएको छ ।

प्रकाशित : भाद्र २९, २०७६ ०७:१८
प्रतिक्रिया
पठाउनुहोस्

बाँके घटनामा स‌ंलग्नलाई कारबाही नगरे संसद् ठप्प : कांग्रेस

कुलचन्द्र न्यौपाने, मधु शाही

काठमाडौं र बाँके — कांग्रेस सभापति शेरबहादुर देउवाले पार्टी नेताहरूमाथि आक्रमण गर्नेलाई कारबाही नभए संसद् ठप्प पार्ने बताएका छन् । नेपालगन्जमा शनिबार कार्यकर्ता भेटघाटमा उनले भ्रष्टाचारविरुद्ध आवाज उठाउँदा नियोजित ढंगले आक्रमण भएको बताए ।

कांग्रेसको बाँके जिल्ला सभापति किरण कोइरालामाथि भएको आक्रमणको विरोधमा शनिबार राजधानीको माइतीघर मण्डलमा गरिएको प्रदर्शन ।तस्बिर : अंगद ढकाल/कान्तिपुर

‘पार्टीका जिल्ला सभापतिलाई कुटपिट गरेर हात भाँचिएको छ,’ उनले भने, ‘यो नियोजित आक्रमण हो । आक्रमणकारीलाई कारबाही नभए संसद् ठप्प पार्छौं ।’

शनिबारै दाङको घोराहीमा आयोजित कार्यक्रममा उनले सत्तापक्षले कांग्रेस नेताहरूमाथि जबर्जस्ती गरिरहेको बताएका थिए । ‘यस्तो कार्य नरोकिए सरकारलाई काम गर्न दिँदैनौं,’ उनले भने । पार्टीभित्रै एकता नभएकाले आक्रमण भइरहेको उनले बताए । बाहिरी आक्रमणबाट बच्न एकता जरुरी रहेकामा उनले जोड दिए ।

कांग्रेसमाथिको आक्रमणलाई उनले लोकतन्त्रमाथिको आक्रमणको संज्ञा दिए । ‘लोकतन्त्रमा शान्तिपूर्ण रूपमा आफ्ना कुरा राख्न पाइन्छ,’ उनले भने, ‘अहिले सरकारले लोकतन्त्रकै उपहास गरिरहेको छ । विरोधीको आवाज दबाउन खोजिरहेको छ । यसविरुद्ध लड्न कांग्रेस एकजुट हुनुपर्छ ।’

बाँकेको खजुरामा कांग्रेसको राष्ट्रिय जागरण अभियानअन्तर्गत दोस्रो चरणको कार्यक्रम चलिरहेका बेला गत बिहीबार नेकपा कार्यकर्ताले आक्रमण गरेका थिए । घटनाको विरोधमा कांग्रेस कार्यकर्ताले शनिबार दिउँसै मैनबत्ती बालेर प्रदर्शनसमेत गरे ।
बाँके सभापति किरण कोइरालासहितका नेता–कार्यकर्ताले सभापति देउवालाई घटनाबारे जानकारी गराउँदै दोषीमाथि कारबाही गर्न र सुरक्षा दिन नसक्ने प्रशासन प्रमुख तथा एसपीलाई हटाउन माग गरे । डेढ घण्टासम्म घटना हुँदा पनि प्रहरी–प्रशासन मौन बसेको भन्दै उनीहरूले आक्रोश पोखे ।

बाँकेका एसपी वीरबहादुर ओलीले भने घटना बाहिर प्रचार गरिएजस्तो नभएको बताएका छन् । एक असई र जवानलाई घटनास्थलमा खटाएको जनाउँदै उनले डेढ घण्टासम्म आक्रमण भएको विषय झुटो रहेको दाबी गरे । ‘भिडियो जम्मा २१ मिनेटको छ,’ उनले भने, ‘डेढ घण्टा कसरी हुन्छ ?’ बेलैमा सुरक्षा प्रत्याभूति गरेकैले घटनाले ठूलो रूप लिन नपाएको उनले बताए । घटनाकै दिन तीन जनालाई पक्राउ गरी अनुसन्धान भइरहेको उनले जानकारी दिए ।

यता नेकपा बाँकेले विज्ञप्ति जारी गर्दै घटना नियोजित नभएको प्रस्ट पारेको छ । ‘कांग्रेसको कार्यक्रममा जानु हाम्रा पार्टीनिकट व्यक्तिको गल्ती हो,’ उनले भने, ‘यी व्यक्तिगत कुरा हुन् । पार्टीले पठाएको होइन । घटना राजनीतिक कारणले भएको पनि होइन ।’

राजधानीमा धर्ना
घटनाको विरोधमा कांग्रेस नेता–कार्यकर्ताले शनिबार काठमाडौंको माइतीघर मण्डलमा धर्ना दिए । काठमाडौं, भक्तपुर र ललितपुरका जिल्ला सभापतिको नेतृत्वमा धर्ना दिइएको हो । तीनै जिल्लाका सभापतिले बिहान गृहमन्त्री रामबहादुर थापालाई भेटेर दोषीलाई कारबाही माग गर्दै संयुक्त हस्ताक्षरसहितको ज्ञापनपत्र बुझाएका थिए ।

धर्नापछि काठमाडौं सभापति सबुज बानियाँ, ललितपुर सभापति मदनबहादुर अमात्य र भक्तपुर सभापति दुर्लभ थापाले सम्बोधन गरेका थिए । उनीहरूले कांग्रेसको लहर देखिएपछि सत्तारूढ दलका कार्यकर्ताले अत्तालिएर आक्रमण गरेको बताए ।

आक्रमणकारीलाई सरकारले तत्काल पक्राउ गरी कारबाही नगरे विरोधका थप कार्यक्रमसमेत ल्याउने चेतावनी तीनै जिल्ला सभापतिले दिए । गृहमन्त्रीलाई दिइएको विज्ञप्तिमा पनि तीनै जिल्लाका सभापतिले दोषीमाथि कारबाही नभए आन्दोलन चर्काउने चेतावनी दिएका छन् ।

प्रकाशित : भाद्र २९, २०७६ ०७:१७
पूरा पढ्नुहोस्
प्रतिक्रिया
पठाउनुहोस्
×