दिल्लीमा १० बजे १० मिनेट ! 

विगतबाट पाठ सिक्दै यो वर्ष डेंगु नियन्त्रणका लागि दिल्लीका मुख्यमन्त्री अरविन्द केजरीवाल नेतृत्वको सरकारले केही महिनादेखि विशेष तयारी थालेको थियो । सेप्टेम्बर १ देखि दस साता लामो विशेष अभियान नै सुरु गरिएको छ । अभियानको नाम छ, ‘दस बजे दस मिनेट ।’

यो अभियानअन्तर्गत प्रत्येक आइतबार बिहान १० बजे सबैलाई आआफ्नो घरआँगनमा पानी जमेको छ/छैन हेर्न भनिन्छ । छ भने तत्काल पानी फाल्न वा फेर्न आग्रह गरिएको छ । १० मिनेटको यो अभियान नोभेम्बर १५ नोभेम्बरसम्म चल्नेछ । मुख्यमन्त्री केजरीवालले घरको पानी जम्ने ठाउँहरूको निरीक्षण गरेर अभियानको उद्घाटन गरेका थिए ।

‘मैले र मेरो परिवारले बिहान १० बजे पूरै घरको निरीक्षण गर्‍यौं । जमेको पानी फेरिदियौं । आफ्नो परिवारलाई डेंगुबाट बचाउने योभन्दा उत्तम उपाय अरू हुनै सक्दैन,’ केजरीवालले ट्वीट गर्दै भनेका थिए । डेंगु संक्रमित लामखुट्टे सफा र जमेको पानीमा हुर्कने हुँदा रोकथामका लागि अभियान चलाइएको बताइएको छ ।

यिनै अग्रसरताका कारण दिल्लीमा विगतको तुलनामा डेंगुको संक्रमण न्यून देखिएको हो । गत वर्षको तुलनामा करिब डेंगु रोगीको संख्यामा उल्लेख्य गिरावट आएको छ । यो वर्ष दिल्लीमा ७५ जनामा मात्र डेंगु पाइएको छ र कसैको पनि मृत्यु भएको छैन । दिल्लीमा सबैभन्दा बढी सन् २०१५ मा १५ हजार जनामा डेंगुको संक्रमण भएको थियो । त्यस वर्ष ६० जनाले ज्यान गुमाएका थिए ।

यसबाहेक डेंगु नियन्त्रणका लागि दिल्लीभित्रका सबै नगर निगममा चौबीस घण्टे विशेष कक्ष पनि सञ्चालनमा ल्याइएको छ । ती कक्षमा पानी जमे, घर भत्किए वा रूख एवं हाँगा भाँच्चिए तत्काल खबर गर्न भनिएको छ । दिल्लीका सरकारी अस्पतालमा मात्र ज्वरोका बिरामीका लागि मात्रै भनेर एक हजार शय्या छुट्याइएको छ ।

सबै सरकारी स्वास्थ्य संस्थालाई डेंगुको उपचार र रोकथामका लागि पर्याप्त जनशक्ति र स्रोतसाधन उपलब्ध गराइएको छ । सरकारी कर्मचारीले घरपिच्छे अनुगमनलाई पनि तीव्रता दिएका छन् ।

सरकारी अस्पताल, स्वास्थ्य चौकी र मोहल्ला क्लिनिकमा ५ सयवटा अतिरिक्त ज्वरो क्लिनिक सञ्चालनमा ल्याइएको छ । यो वर्ष काठमाडौंमा मात्रै डेंगुका कारण ६ जनाको मृत्यु भइसकेको छ । भरतपुरलगायत सहरमा स्थिति भयावह बन्दै गएको छ ।