‘इन्डो–प्यासिफिक रणनीतिमा असहमति’

कान्तिपुर संवाददाता

काठमाडौँ — परराष्ट्रमन्त्री प्रदीप ज्ञवालीले अमेरिकी सरकारले अघि बढाएको ‘इन्डो–प्यासिफिक रणनीति’ मा वासिङ्टन पुगेर समर्थन जनाइसके पनि सत्तारूढ दल नेकपाका अध्यक्ष एवं पूर्वप्रधानमन्त्री पुष्पकमल दाहालले ‘नेपाल सरकार यो रणनीतिमा असहमत रहेको’ बताएका छन् ।

चिनियाँ विदेशमन्त्री वाङ यीको नेपाल भ्रमण क्रममा मंगलबार बिहान भेटवार्ता गरेका उनले ‘इन्डो–प्यासिफिक रणनीतिमा चीनको झैं नेपालको असहमति’ रहेको राय राखेका हुन् ।

चिनियाँ सरकारी समाचार संस्था सिन्ह्वाका अनुसार ‘चिनियाँ विकासक्रमलाई बाधा पुर्‍याउने अमेरिकी रणनीति’ को विपक्षमा दाहालले धारणा राखेका थिए । ‘चीनको विकास नेपालका लागि सदैव अवसर हो,’ दाहालले विदेशमन्त्री वाङसमक्ष भनेका थिए, ‘चीनको बहुपक्षीय सुरक्षा नीति र सन्तुलित, समावेशी तथा ‘विन–विन’ रणनीतिमा भूमण्डलीकरणलाई प्रवर्द्धन गर्ने नीतिको नेपाल समर्थक रहिआएको छ ।’

उनले हङकङमा देखिएको पछिल्लो स्थितिलाई चीनको आन्तरिक मामला भनेका छन् । चीनले सुरु गरेको आतंकवादविरुद्ध अभियानलाई मानव अधिकारका नाममा अवरोध उब्जाउने प्रवृत्तिको विरोधमा नेपाल उभिएको पनि दाहालले बताएको सिन्ह्वाले उल्लेख गरेको छ ।

नेकपामा पूर्वप्रधानमन्त्री माधवकुमार नेपालको संयोजकत्वमा विदेश विभाग रहे पनि अध्यक्ष दाहाल आफ्नै छोरीलाई साथ लिएर विदेशमन्त्री भेट गर्न होटल मेरियट पुगेका थिए । विदेशमन्त्रीसँग दाहालको भेटबारे विदेश विभागका अरू पदाधिकारीले ‘कुनै जानकारी नरहेको’ प्रतिक्रिया दिइसकेका छन् । दाहालपछि अर्का पूर्वप्रधानमन्त्री एवं नेपाली कांग्रेसका सभापति शेरबहादुर देउवाले विदेशमन्त्री वाङसँग भेटवार्ता गरेका थिए ।

उनले पनि चिनियाँ राष्ट्रपति सी चिनफिङको सम्भावित नेपाल भ्रमणबारे कुराकानी गरेका थिए ।

प्रकाशित : भाद्र २५, २०७६ २०:०८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

यौन सम्पर्क गर्दा कर्मचारीको ज्यान गएपछि कम्पनीले नै क्षर्तिपूर्ति दिनुपर्ने फैसला

एजेन्सी

काठमाडौँ — रोजगारदाता आफ्नो कर्मचारीको सुरक्षामा कतिसम्म संवेदनशील हुनुपर्छ ? फ्रान्सको एक अदालतले बुधबार गरेको एक फैसलाले यतिखेर धेरैको मनमा यो प्रश्न उब्ज्याइदिएको छ । व्यवसायिक भ्रमणमा गएका आफ्ना एक कर्मचारी होटलमा यौन सम्पर्क गर्दागर्दै मृत्यु भएपछि त्यसको जिम्मेवारी कम्पनीले लिनुपर्ने भन्दै अदालतले उनका परिवारलाई कम्पनीले नै क्षतिपूर्ति तिर्नु पर्ने फैसला गरेको छ । 

पेरिसस्थित अदालतले ती व्यक्तीको मृत्यु व्यवसायिक काममा जाँदा भएकाले कम्पनीले दायित्व वहन गर्नुपर्ने फैसला गरेको हो ।

सन् २०१३ मा भएको उक्त घटना अदालतमा पुगेपछि कम्पनीले यसमा आफ्नो जिम्मेवारी हुन नसक्ने दाबी गर्दै आएको थियो । ती कर्मचारीलाई यौन सम्पर्कका लागि नभई व्यसायिक कामका लागि पठाएको हुनाले क्षतिपूर्ति तिर्नुपर्ने प्रश्नै उठ्न नसक्ने कम्पनीको दाबी थियो ।

तर, अदालतले भने कुनै पनि कर्मचारी व्यवसायिक प्रयोजनका लागि बाहिर जाँदा दुर्घटनामा परे त्यसको जिम्मेवारी कम्पनीको हुने फ्रान्सेली कानून भएकाले उक्त घटनामा पनि त्यो लागू हुने फैसला गरेको छ ।

जेभियर एक्स नामक गरेका ती व्यक्ति पेरिसस्थित टीएसओ नामक एक रेलवे सर्भिस कम्पनीमा इन्जिनियर थिए ।उनी मध्य फ्रान्सको एक सहरमा कम्पनीको कामले गएका बेला होटलमा एक युवतीसँगको समागमका क्रममा हृदयघातको शिकार हुन पुग्दा उनको ज्यानै गएको थियो ।

बिमा कम्पनीले ती इन्जिनियरको मृत्यु कामको शिलशिलामा भएकाले कम्पनीले नै क्षतिपूर्ति तिर्न पर्ने जिकिर गरेपछि मुद्दा अदालतमा पुगेको थियो । आफूले नअह्राएको काममा कुनै हालतमा पनि जिम्मेवारी लिन नसकिने दाबी कम्पतीको थियो जसलाई अदालतले अस्वीकार गरिदिएको छ ।

यौन मानिसका लागि ‘नुहाउने र खाना खाने जस्तै सामान्य’ भएकाले यसमा रोजगारदाता अन्यथा भनेर फुत्किन नपाउने विमा कम्पनीको दलिल थियो जसलाई अदालतले ठिक हो भन्दै रोजगारदाताले नै क्षतिपूर्ति तिर्नु पर्ने फैसला मुद्दा परेको ६ वर्षपछि सुनाएको हो ।

प्रकाशित : भाद्र २५, २०७६ २०:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT