त्रिभुवन अन्तर्राष्ट्रिय विमानस्थलमा क्यूट सिस्टमको समय सकिँदै, उडानमा यात्रुलाई हुनसक्छ हैरानी

सुरज कुँवर

काठमाडौँ — त्रिभुवन अन्तर्राष्ट्रिय विमानस्थलमा यात्रुहरूलाई एयरलाइन्सदेखि भिसा प्राप्त विदेशी मुलुकको अध्यागमनसम्म जोड्ने एयरपोर्ट कनेक्सन प्रविधि (क्यूट सिस्टम) को सम्झौता अवधि शनिबार सकिँदै छ । नेपाल नागरिक उड्डयन प्राधिकरणले प्यासेन्जर प्रोसेसिङ एप्लिकेसन प्रविधि उपलब्ध गराउने बहुराष्ट्रिय कम्पनी सिटासँग नयाँ सम्झौता नगरेपछि उसले विमानस्थलस्थित २८ वटै विदेशी एयरलाइन्सलाई शनिबारपछि आफ्नो सिस्टम नेपालमा नरहने जानकारी गराइसकेको छ ।

हवाई यातायात क्षेत्रमा कहलिएको आईटी कम्पनी हो, सिटा। विमानस्थलभित्र अन्तर्राष्ट्रिय वायुसेवा कम्पनीले यात्रुहरूको बोर्डिङ, लगेज पासलगायत सेवा यही सफ्टवेयरको सहायतामा उपलब्ध गराउँदै आएका छन्।

प्राधिकरण र त्रिभुवन अन्तर्राष्ट्रिय विमानस्थलले प्रविधिबारे चासो नराखे वा नयाँ कम्पनीलाई नभित्र्याए शनिबारपछि नेपालबाट अन्तर्राष्ट्रिय गन्तव्यमा जाने एयरलाइन्सको सेवा अवरोध हुनेछ। ‘यो यस्तो प्रविधि हो, जहाँ एयरलाइन्सले यात्रुको राहदानी सिटाको सफ्टवेयरबाट स्वाइप गरेपछि मात्रै गन्तव्य मुलुकको बोर्डिङ पास जारी गर्न मिल्छ,’ काठमाडौंमा रहेको एक मध्यपूर्वी मुलुकको एयरलाइन्सका एयरपोर्ट म्यानेजरले कान्तिपुरलाई भने, ‘यो प्रविधि नभए कुनै पनि एयरलाइन्सले बोर्डिङ पास नै जारी गर्न सक्दैनन्।’

विश्वका सबै मुलुकका अध्यागमन कार्यालयसँग सिटाको कनेक्सन हुन्छ। कुनै पनि एयरलाइन्सले यात्रुको भिसा सक्कली हो या होइन भन्ने पनि यसैबाट जानकारी प्राप्त गर्छन्। गन्तव्य मुलुकको अध्यागमनमा यात्रुबारे पहिल्यै विस्तृत विवरण पनि यही प्रविधिको सहायताले पुग्ने ती म्यानेजरले बताए। यो कामलाई सिटाको प्रविधिले सजिलो बनाउने हो। सिटाको प्रविधिमा यात्रुको रेकर्ड काठमाडौंमा राखिएपछि संसारको जुनसुकै विमानस्थल वा सम्बन्धित एयरलाइन्सले आफ्नो सञ्जालभित्र यात्रुको विस्तृत यात्रा विवरण पाउँछन्।

क्यू सिस्टम नभए यात्रुहरूलाई बोर्डिङ पास उपलब्ध गराउन र लगेज पठाउन नसकिने उनले बताए। तर आन्तरिक टर्मिनलमा सेवा प्रवाह गर्ने नेपाली वायुसेवाले भने आफ्नै रैथाने प्रविधिबाट बोर्डिङ पास र कार्गो लगेजको ट्याग उपलब्ध गराउँछन्।

प्राधिकरण र त्रिभुवन अन्तर्राष्ट्रिय विमानस्थलले सम्झौता नवीकरण नगरेपछि सिटाको मुख्यालयले कुनै पनि विदेशी एयरलाइन्ससँग काठमाडौंका लागि सम्झौता नवीकरण गरेको छैन। ‘हाम्रो कम्पनीले सिटासँग सम्झौता नवीकरण गर्न खोजेको थियो तर उसले काठमाडौंस्थित त्रिभुवन अन्तर्राष्ट्रिय विमानस्थलसँग ठेक्का सम्झौता सेप्टेम्बर १४ सम्म मात्रै भएकाले नवीकरण गर्न मानेन,’ एक अर्का विदेशी एयरलाइन्सका म्यानेजरले कान्तिपुरसँग भने।

सिटाले काठमाडौंमा रहेका नेपाल वायुसेवा निगम र हिमालय एयरलाइन्ससहित २८ वटा विदेशी एयरलाइन्ससँग प्रतियात्रु एक डलर हाराहारी शुल्क लिने सम्झौता गरेको थियो। यसले एयरलाइन्सलाई सेवा दिएबापत शुल्क लिन्छ भने विमानस्थलमा यसको सफ्टवेयर राखेबापत त्रिभुवन अन्तर्राष्ट्रिय विमानस्थललाई भाडा दिनुपर्छ। विमानस्थलले सम्झौता नवीकरण नगरेपछि एसिया क्षेत्र हेर्ने सिटाका कर्मचारी काठमाडौं आएका छन्।

यसैबीच विदेशी एयरलाइन्स अपरेटरहरूको साझा संस्थाले विमानस्थलका महाप्रबन्धक राजकुमार क्षत्रीलाई सोमबार भेटी यसबारे निकास खोज्न आग्रह गरेको छ। उक्त भेटमा महाप्रबन्धक क्षत्रीले ‘चिन्ता लिनु पर्दैन विकल्प दिलाउनेछु’ भनी वाचा गरेको स्रोतले जानकारी दिएको छ।

प्रकाशित : भाद्र २५, २०७६ १७:५८
ADVERTISEMENT
प्रतिक्रिया
पठाउनुहोस्
ADVERTISEMENT

स्वास्थ्य संस्था थप्न मलेसिया 'सकारात्मक', दुई देशबीच बिहीबार पुन: बैठक   

कान्तिपुर संवाददाता

काठमाडौँ — झन्डै १५ महिनादेखि रोकिएको मलेसियाको रोजगारी खुलाउन दुई देशबीचका श्रम अधिकारीहरुको बैठक बिहीबार बस्नेगरी टुङ्गिएको छ । मलेसिया जाने कामदारको बायोमेडिकल प्रणालीअनुसार स्वास्थ्य परीक्षण गर्ने संस्थाका विषयमा दुईसम्म बसेको छलफलमा कुरा नमिल्दा बैठक लम्बिएको हो । 

श्रम सम्झौतालाई कार्यान्वयन गर्न दुवै देशका उच्च अधिकारीहरु संलग्न संयुक्त कार्यदल बैठक मलेसियामा बसेको हो। बैठकमा नेपालका तर्फबाट श्रम, रोजगार तथा सामाजिक सुरक्षा मन्त्रालयका सहसचिव रामप्रसाद घिमिरेको नेतृत्वमा टोलीसहभागी छ। घिमिरेले दुई पक्षबीच सम्झौतालाई कार्यान्वयन गर्ने विषय सकारात्मक रुपमा अघि बढेको बताए। उनले सकारात्मक र सौहार्दपूर्ण हिसाबले बैठक भइरहेकोले बैठकमा उठेका विषयहरु बताउँदा हतार हुने बताए। ‘दुवै पक्षबीच सहमतिको नजिक पुगेका छौं,’ उनले भने, ‘भोलिसम्म टुंगिनेछ।’

मलेसियाका लागि नेपाली राजदूत उदयराज पाण्डेले संयुक्त प्राबिधिक समितिको बैठ्क गतिरोध तोड्ने तर्फ अगाडि बढेको वताए। ‘दुई दिनसम्म बिषयमाथि निकै गहन र विस्तुतरुपमा छलफल भयो,’ उनले भने।

नेपालले मलेसिया सरकारको स्वास्थ्य मापदण्ड र प्रक्रिया पूरा गर्ने स्वास्थ्य संस्थालाई यथाशीघ्रअनुगमन गरी बायोमेडिकल प्रक्रियामा समावेश गर्न प्रस्ताव राखेको छ। नेपालले गत साउन २१ गते नै स्वास्थ्य मापदण्ड पूरा गरेको भन्दै ३६ वटा पुराना स्वास्थ्य संस्थासहित १ सय २२ वटा संस्थाको प्रस्तावित सूची पठाएको थियो। नेपालले पठाएको स्वास्थ्य संस्थाको पत्रको जवाफ दिँदै एक साताअघि मलेसिया नयाँ स्वास्थ्य संस्था थप्न तयार भएको जनाएको थियो।

मेडिकल संस्थाको छनोट विषयमा दुई देशबीच सहमति भएलगत्तै मलेसियाको रोजगारी खुल्नेछ। ‘मलेसिया र नेपाल दुवैको संयुक्त प्रयासबाट कामदारको हित, अधिकार र सुरक्षालाई संरक्षण गर्न सकिन्छ,’ श्रम, रोजगार तथा सामाजिक सुरक्षामन्त्री गोकर्ण विष्टले भने,‘यसैमा हामी केन्द्रित भएका छौं। यो बैठकबाट सबै बिषयहरु टुंगिने आशा राखेको छु। यसतर्फ मलेसिया पनि सकारात्मक छ।’

प्रकाशित : भाद्र २५, २०७६ १७:२३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT