कर्मचारी अभावले थलिए स्थानीय सरकार

अधिकांश वडा कार्यालय सचिवविहीन
भीमबहादुर सिंह

जाजरकोट — प्राविधिकबाहेक ३७ कर्मचारीको दरबन्दी रहेको बारेकोट गाउँपालिकामा अहिले दुई जना मात्र छन् । सबै काम प्रमुख प्रशासकीय अधिकृत र एक लेखापालको थाप्लोमा छ । ९ वडामध्ये एउटामा पनि सचिव छैनन् । कुशे गाउँपालिकामा एक वडासचिवले सबैतिर धाउनुपर्ने बाध्यता छ ।

जिल्लाका सातवटै स्थानीय सरकार कर्मचारी अभावले थलिएका छन् । यहाँका कर्मचारी समायोजनपछि अन्यत्रै गएपछि अभाव चुलिएको हो । कुशे गाउँपालिकामा प्राविधिकबाहेक ३७ कर्मचारीको दरबन्दी छ । गाउँपालिकामा अहिले प्रमुख प्रशासकीय अधिकृत, दुई नायब सुब्बा र दुई लेखापालबाहेक कोही छैनन् ।

कर्मचारी अभावकै कारण सेवा प्रवाहमा सास्ती भइरहेको गाउँपालिका अध्यक्ष हरिचन्द्र बस्नेतले बताए । ‘बाँकी रहेका पनि रमाना लिएर अन्यत्र जान थालेपछि गाउँपालिका कर्मचारीविहीन बनेको छ,’ उनले भने, ‘कर्मचारी नहुँदा जनप्रतिनिधिले केही गर्न सक्ने अवस्था छैन ।’

जुनीचाँदे गाउँपालिकामा प्रमुख प्रशासकीय अधिकृत र ३ वडासचिव गरी ५ कर्मचारी मात्र छन् । त्यस्तै ५५ जनाको दरबन्दी भएको छेडागाड नगरपालिकामा प्राविधिकसमेत १६ कर्मचारी छन् । वडासचिवलगायत कर्मचारी अभावले स्थानीय तहको सेवा प्रवाह कमजोर बनेको छ । अधिकांश स्थानीय सरकार १/२ जना वडासचिवको भरमा छन् । गाउँगाउँमा नाम मात्रका वडा कार्यालय स्थापना भएका छन् । ती कार्यालय फर्निचर, सोलार, कम्प्युटरलगायत सामग्रीले भरिभराउ छन् । तर कर्मचारी नहुँदा सेवा प्रवाह हुन सकेको छैन । स्थानीयलाई भने सेवा लिन सदरमुकाम धाउनुपर्ने बाध्यता छ ।

१३ वडा भएको नलगाड नगरपालिकामा पनि ५५ मध्ये ३ वडासचिव र करारसहित १३ कर्मचारी छन् । त्यस्तै ५५ दरबन्दी रहेको भेरी नगरपालिका प्राविधिक, करारलगायत २९ कर्मचारीको भरमा चलिरहेको छ । अधिकांश गाउँ/नगरपालिकामा वडासचिवले आलोपालो गरेर काम गर्नुपर्ने बाध्यता छ । कर्मचारी अभावमा योजना तर्जुमा, कार्यान्वयन, ऐन/कानुन बनाउनेलगायत काम अलपत्र परेका छन् ।

जिल्लाभर ७७ वडासचिव आवश्यक पर्नेमा मुस्किलले १५ जना मात्र रहेको जिल्ला समन्वय समिति प्रमुख मनबहादुर रावलले बताए । ‘वडासचिवसमेत नहुँदा सेवाग्राहीलाई सेवा लिन सदरमुकाम धाउनुको विकल्प छैन,’ उनले भने, ‘करारमा राखिएका कर्मचारी भने कामविहीन बनेका छन् ।’ उनका अनुसार विवाह, जन्म, मृत्यु, बसाइँ सराइलगायत पञ्जीकरणका काम गर्न स्थायी कर्मचारी हुनुपर्ने प्रावधान छ । जिल्लाका ७ वटा स्थानीय तहमा २ सय ५० कर्मचारीको अभाव देखिएको उनले जानकारी दिए ।

कतिपय वडासचिवले पञ्जीकरणका लागि खाली कागजमा दस्तखत गरेर गाउँ पठाउने गरेका छन् । गाउँमा रहेका करार र अस्थायी कर्मचारीले उक्त खाली कागजमा पञ्जीकरणका लागि सिफारिस गर्नुपर्ने बाध्यता छ । जनप्रतिनिधि तथा कर्मचारी कार्यालयको छाप र कागज बोकेर सदरमुकाम बस्न बाध्य हुनुपरेको बारेकोट गाउँपालिका–९ का वडाध्यक्ष शशिराम गौतमले बताए । सबै काम सदरमुकामबाटै हुने भएकाले खलंगामै बस्ने गरेको उनको भनाइ छ । ‘गाउँमा कर्मचारी छैनन्, त्यसैले सेवाग्राहीलाई कामकाजका लागि सिधै खलंगा बोलाउने गरेको छु,’ उनले भने, ‘सेवाग्राही त समस्यामा छन् नै हामीले पनि सास्ती भोग्नुपरेको छ ।’

कुशे, बारेकोट र जुनीचाँदे गाउँपालिकाको सेवा प्रवाह सदरमुकामबाटै भइरहेको छ । कतिपय सेवाग्राहीको कार्यालय खोज्दैमा दिन बित्ने गरेको स्थानीय उदय खड्काले बताए । ‘वडाध्यक्ष फेला परे सचिव फेला पर्दैनन्, सचिव भेटिए अध्यक्ष हुँदैनन्,’ उनले भने,‘स्थानीय सरकारले गाउँगाउँमा सिंहदरबारको नारा दिए पनि हामीले थप सास्ती भोग्नुपर्ने बाध्यता छ ।’ उनले साविक गाविस कार्यालयले दिने सुविधासमेत स्थानीयले पाउन नसकेको गुनासो गरे ।

प्रकाशित : भाद्र २४, २०७६ २०:१६
ADVERTISEMENT
प्रतिक्रिया
पठाउनुहोस्
ADVERTISEMENT

आर्ट काउन्सिलमा भदौ २८ गतेसम्म फोटो प्रदर्शनी

कान्तिपुर संवाददाता

काठमाडौँ — अन्तर्राष्ट्रिय साक्षरता दिवसको अवसर पारेर फोटो पत्रकार क्लबले बहुभाषिक परिवेशमा साक्षरता अभिवृद्धि फोटो प्रतियोगितामा छानिएका उत्कृष्ट फोटोहरुको प्रर्दशनी सुरु भएको छ । 

बबरमहलस्थित नेपाल काला परिषदमा फोटोहरुकै प्रर्दशनी गरिएको छ । युनेस्को नेपाल,शिक्षा र मानव स्रोत विकास केन्द्रसँगको सहकार्यमा क्लबले फोटो प्रर्दशनी गरेको हो ।

१ सय ८२ जना फोटोग्राफरहरुले पठाएका ६ सय ३६ फोटाहरुको मध्ये निर्णायक मण्डलले विजेता सहित उकृष्ट ५४ फोटाहरु छानिएका थिए जसमा ४२ जना फोटोग्राफरहरुको फोटा प्रर्दशनीमा रहेको छ ।

देशको शिक्षाको स्थिति, विधार्थी, स्कूल र शिक्षकबीचको सम्बन्ध , नेपालको बहुभाषिय र अन्तर संस्कृति झल्काउने रहेको फोटाहरु रहेको सञ्चारिका समूहकी अध्यक्ष तथा प्रतियोगिताका निर्णायक नितु पण्डितले बताइन् ।प्रदर्शनी भदौ २८ गतेसम्म चल्ने आयोजकले जनाएको छ ।

प्रतियोगितामा वीरगन्जका पंकज श्रेष्ठले खिचेको (फरक क्षमता ) अटिजमका विधार्थीलाई पढाउँदै गरेको फोटोले प्रथम स्थान हासिल गरेको छ ।

यसैगरी सुनिता डंगोलले खिचेका फोटाले ललितपुरको जिवित देवीका रुपमा पुजिने कुमारीलाई पढाउँदै गरेको फोटोले दोस्रो स्थान हासिल गर्दा अनिश रेग्मीको संकेतिक भाषा प्रयोग गरेको फोटोले तेस्रो स्थान हात पार्न सफल भएको छ ।

प्रकाशित : भाद्र २४, २०७६ १९:५६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT