पशुपतिमा आरतीअघिको राष्ट्रिय गानबारे पर्यटनमन्त्रीको प्रतिक्रिया : 'राष्ट्रिय गान र मलामीको साइनो छैन'

सुरज कुँवर

काठमाडौँ — संस्कृति पर्यटन तथा नागरिक उड्डयन मन्त्री योगेश भट्टराईले गंगा आरतीमा प्रारम्भ गरिएको राष्ट्रिय गान र आरती हुने स्थान नजिकै मृतकहरूको अन्त्येष्टि हुने र शोकाकुल आफन्त असहज परिस्थितिबीच कुनै सम्बन्ध नरहेको प्रतिक्रिया दिएका छन् । 

मंगलबार पर्यटन बोर्डमा आयोजित फोटो नेपालको कार्यक्रमा पुगेका मन्त्री भट्टराईले राष्ट्रिय गान बजाउने निर्णय र मलामी गएकाहरुको कुनै सम्बन्ध नहुने बताए। ‘राष्ट्रिय गान अलग हो, त्यो अलग हो,’ कान्तिपुरसँग संक्षिप्त प्रतिक्रिया दिँदै उनले भने, ‘यो एकै ठाउँमा ल्याइएको प्याकेज होइन।’ उनले पशुपति क्षेत्रमा हुने विविध सांस्कृतिक कार्यक्रमहरुको प्रसंग जोड्दै भने, ‘त्यसो त तिजमा दिदीबैनीहरु तिलहरी लगाएर नाचगान गरिरहेका हुन्छन्। अन्य कुरा पनि सँगसँगै चलिनै रहेको हुन्छ। त्यसैले यो फरक विषय हो।’

कान्तिपुरसँग प्रतिक्रिया दिनु अघि पर्यटन बोर्डको कार्यक्रममा सहभागी सञ्चारकर्मीहरुले राष्ट्रिय गानको विषयबारे मन्त्रीको धारणा मागेका थिए। लगत्तै राष्ट्रिय सभा गृहमा चिनियाहरुले आयोजना गरको कार्यक्रममा जाने हतारोमा रहेका मन्त्रीले यसबारे बोल्दिनँ भन्दै पन्छिएका थिए।

गत भदौं १३ गतेदेखि पशुपतिमा आरती सुरु हुनुअघि राष्ट्रिय गान बजाउन सुरु गरिएको थियो। आरती हुने स्थान नजिकै मृतकहरूको अन्त्येष्टि हुने र शोकाकुल आफन्त असहज परिस्थितिमा रहेको बेला राष्ट्रिय गान गाउन उचित नहुने भन्दै मन्त्रीको निर्णयको चौतर्फी आलोचना भइरहेको छ। सामाजिक सञ्जालमा समेत यसको विरोध भइरहेको छ। चारैतिर विरोध भएपछि गंगा आरती सेवा सञ्चालक समितिले भने सोमबार र मंगलबार राष्ट्रिय गान बजाएन।
सोमबार बसेको समितिको आकस्मिक बैठकले यस्तो निर्णय गरेको स्रोतको भनाइ छ ।

प्रकाशित : भाद्र २४, २०७६ १९:२९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

कांग्रेस देशव्यापी जागरण अभियानमा

कार्यकर्ताको मनोबल उकास्ने र पार्टी संगठन सुधार गर्ने मुख्य लक्ष्य
कान्तिपुर संवाददाता

काठमाडौँ — प्रमुख प्रतिपक्ष कांग्रेसले मंगलबारदेखि देशव्यापी जागरण अभियान सुरु गरेको छ । बीपी जयन्तीको अवसर पारेर ७७ जिल्लामा एकसाथ सुरु दोस्रो चरणको अभियान १५ दिनसम्म चल्नेछ ।

अभियान प्रारम्भ गर्न कांग्रेस सभापति शेरबहादुर देउवासहित केन्द्रीय पदाधिकारी तथा सदस्यहरू जिल्ला पुगेका छन् । प्रदेश निर्वाचन क्षेत्रकेन्द्रित जागरण प्रभावकारी बनाउन कांग्रेसले ३ सय ३० क्षेत्रमै केन्द्रीय प्रतिनिधि खटाएको छ ।

प्रतिनिधिका रूपमा केन्द्रीयस्तरका नेता नभएर गत निर्वाचनमा पराजित उम्मेदवार, समानुपातिक उम्मेदवार, पूर्वमन्त्री तथा पूर्वजिल्ला कार्यसमिति सभापतिहरूलाई खटाइएको छ । पहिलो चरणको अभियानमा केन्द्रीयस्तरका नेताहरू नै प्रतिनिधि थिए । यसपटक उनीहरूलाई गृहजिल्ला तथा पायक पर्ने जिल्लामा जाने गरी स्वतन्त्र छाडिएको छ ।

सभापति देउवा विराटनगर, वरिष्ठ नेता रामचन्द्र पौडेल कास्की, उपसभापति विमलेन्द्र निधि धनुषा, अर्का उपसभापति विजयकुमार गच्छदार सुनसरी, महामन्त्री शशांक कोइराला मकवानपुर, महामन्त्री पूर्णबहादुर खड्का भक्तपुर, कोषाध्यक्ष सीतादेवी यादव र सहमहामन्त्री प्रकाशरण महत काठमाडौंमा खटिएका छन् । अन्य केन्द्रीय नेताहरू अधिकांश गृहजिल्ला पुगेका छन् ।

कांग्रेसले तल्लो पंक्तिका कार्यकर्ताको मनोबल उकास्न र पार्टी संगठन सुधार गर्न अभियान सुरु गरेको हो । कांग्रेस केन्द्र र प्रदेशमा सरकार बाहिर छ । स्थानीय तहमा समेत सरकारको नेतृत्वमा रहेको नेकपाकै बहुमत छ । निर्वाचनमा पराजयको समीक्षा गर्न बसेको पहिलो केन्द्रीय बैठकले नै जागरण अभियान थाल्ने निर्णय लिएको थियो ।

पहिलो चरणमा ७७ जिल्ला, दोस्रो चरणमा ३ सय ३० प्रदेश निर्वाचन क्षेत्र र तेस्रो चरणमा ७ सय ४३ गाउँपालिका लक्षित गरी अभियान थाल्ने पार्टीको घोषणा थियो । पहिलो चरणको कार्यक्रम सम्पन्न गरेर कांग्रेस दोस्रो चरणमा प्रवेश गरेको हो । तेस्रो चरणको अभियान भने पार्टीको केन्द्रीय महाधिवेशनको माहोलसँगै सुरु हुनेछ ।

सबै जात र समुदायलाई पार्टीसँग जोड्न कांग्रेसले अभियानको नाम नै ‘हिमाल, पहाड, तराई–मधेस’ दिएको छ । पार्टीले मंगलबार अधिकांश जिल्लामा वृक्षरोपण गरेर कार्यक्रम प्रारम्भ गरेको थियो । केन्द्रीय कार्यालयका अनुसार मुलुकभर ३४ हजार ९ सय ८० बिरुवा रोपिएका छन् ।

जागरण अभियानका क्रममा सामाजिक संवाद, युवाकेन्द्रित संवाद, संविधान दिवसका कार्यक्रम, वडास्तरीय अन्तरक्रिया, स्थानीय तहको दुईवर्षे समीक्षा, पार्टी प्रवेशलगायत कार्यक्रम गर्न केन्द्रले तोकेर सर्कुलर गरेको छ । अभियानका क्रममा सम्बद्ध क्षेत्रका अगुवा, सहिद परिवार, द्वन्द्वकाल एवं विभिन्न आन्दोलनका घाइतेको घरमै पुगेर अवस्था बुझ्ने र सुझाव लिने कार्यक्रमसँगै कांग्रेसले सरकारविरुद्ध प्रदर्शनका लागि ७ वटा विषय तय गरेको छ ।

प्रकाशित : भाद्र २४, २०७६ १९:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT