उपचुनावको एजेन्डा तय गर्दै दलहरू

प्रदीप मेन्याङ्बो

सुनसरी — धरानमा उपमहानगरपालिकाको प्रमुख र एक वडाध्यक्षका लागि हुने उपनिर्वाचनका लागि तयारीसँगै दलहरू मतदातासमक्ष पुग्न एजेन्डा तय गर्न जुटेका छन् ।

नगर प्रमुख तारा सुब्बा र ७ नम्बरका वडाध्यक्ष भुवन मोक्तानको निधनपछि दुई पद रिक्त छन् । निर्वाचन आयोगले मंसिर १४ गतेका लागि चुनावको मिति तोकेपछि नगरमा प्रमुख दलहरू सक्रिय भएका हुन् ।

कांग्रेसले अन्य साना दलहरूसँग चुनावी गठबन्धन गर्ने तयारी गर्दै छलफल गरिरहेको छ । ‘धरानमा कांग्रेसले विगतका चुनावमा चारतारे झन्डा गाड्न सकेको छैन,’ कांग्रेसका सुनसरी सभापति राजीव कोइरालाले भने, ‘अबको उपनिर्वाचनमा जसरी पनि विजय प्राप्त गर्न जागरण अभियान नै चलाउँदै आएका छौं ।’ सरकारको नेतृत्व गरिरहेको दलका कमी कमजोरीलाई निर्वाचनको मुख्य एजेन्डा बनाएर जनतामाझ जाने उनले बताए ।

दुवै पदका लागि कांग्रेस र नेकपाले आ–आफ्ना उम्मेदवार भने छनोट गरिसकेका छैनन् । त्यसैले आकांक्षी पनि आफ्नो नाम पार्न पार्टीका कार्यक्रमहरूमा सक्रिय रूपमा सहभागी छन् । मतदाता आकर्षित गर्न विभिन्न आश्वासन, चुनावी एजेन्डा बोकेर दुवै दलले कार्यकर्ता लक्षित वडा भेला र टोल भेला सुरु गरिसकेका छन् ।

कांग्रेस नगर समितिले आगामी बुधबारदेखि तीन दिन बृहत् नगरसभा गर्ने भएको छ । पूर्वप्रधानमन्त्री तथा पार्टी सभापति शेरबहादुर देउवा, केन्द्रीय नेताहरू विजयकुमार गच्छदार र ज्ञानेन्द्रबहादुर कार्कीलगायतले सभालाई सम्बोधन गर्ने कार्यक्रम छ । सभाले धरान घोषणापत्र जारी गर्ने नगर सभापति तिलक राईले बताए ।

अघिल्लो निर्वाचनमा नगर प्रमुखमा कांग्रेसका तिलक राई एमालेका तारा सुब्बासँग ४ हजार ८ सय ७३ मतको अन्तरले पराजित भएका थिए । राईले १६ हजार १ सय २ र सुब्बाले २० हजार ९ सय ७५ मत ल्याएका थिए । क्रियाशील अधिकांश कार्यकर्ता कुनै न कुनै गुटमा विभाजन हुनुको नोक्सानी पार्टीले खेप्दै आएको छ ।

उपनिर्वाचन हुन २ महिना २२ दिन मात्र बाँकी छ । उम्मेदवार नतोकिए पनि एमाले र माओवादीबीचको एकीकरणपछि बनेको नेकपा हौसिएको छ । अघिल्लो चुनावमा माओवादी केन्द्रका उम्मेदवार ११ हजार १ सय ८० मतले तेस्रो स्थानमा थिए । उक्त मतको हिसाब हेर्दै माओवादी केन्द्रसँग एकता गरेकाले अबको उपनिर्वाचनमा सहजै विजय प्राप्त गर्नेमा विगतको एमालेका अगुवा ढुक्क छन् ।

पार्टीको चुनावी एजेन्डामा यसपटक सुकुम्बासी व्यवस्थापन गर्ने, भएका ठूला योजनाहरू बसपार्क, तीनकुने सुन्दर बस्ती विकास आयोजना, धरान खानेपानी आयोजना, स्मार्ट सिटी, धार्मिक र प्राकृतिक पर्यटन, शिक्षा स्वास्थ्य र खेलकुद र धरान हवाई मैदानलगायत रहेको नेकपाका नगर कमिटी अध्यक्ष नारायण सुवेदीले बताए ।

‘उपनिर्वाचनलाई लक्षित हामीले एकता प्रक्रियासँगै २० वटै वडा भेला सकेका छौं,’ उनले भने, ‘अहिले टोलस्तरीय भेला जारी छ ।’ कार्यकर्ताका लागि राजनीतिक प्रशिक्षणहरू पनि धमाधम चलाउन थालेको उनले बताए ।

प्रकाशित : भाद्र २३, २०७६ ०८:२२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

काँडाबीच फूल

कान्तिपुर संवाददाता

काठमाडौँ — नामै क्याक्टी ब्लसम अर्थात फुल्दै गरेको सिउँडी फूल । तिखा काँडाबीच पनि फुल्ने क्याक्टी अर्थात क्याक्टसलाई धेरैले कला र साहित्यमा प्रतीकात्मक रूपमा चित्रण गर्छन् ।

संघर्षबीचको सफलता जनिने यो प्रतीकलाई यतिबेला चित्रकार प्रमिला बज्राचार्यले क्यानभासमा प्रयोग गरेकी छन् । ठमेलस्थित दलाई–ला आर्ट स्पेसमा जारी ‘क्याक्टी ब्लसम’ शीर्षकको एकल चित्रकला प्रदर्शनीमा नेपाली समाजमा सफलता हासिल गर्न नारीलाई कति कठिन छ भन्ने सन्दर्भलाई प्रेमिलाले खोतल्ने प्रयास गरेकी छन् । ‘नारीलाई आत्मपहिचान बनाउन साह्र्रै गाह्रो छ,’ हालैको दिन ग्यालरीमा भेटिएकी उनले भनिन्, ‘अनेकौं कठिनाइ पार गरेर मात्रै लक्ष्यसम्म पुग्नुपर्ने हुन्छ ।’

पितृसत्तात्मक समाजमा नारीले आफ्नो स्थानलाई सुरक्षित र स्थायित्व कायम गर्न कडा परि श्रम गर्नुपर्ने भाव छ उनका अधिकांश चित्रमा । उनका चित्रमा एउटा निश्चित गन्तव्यका लागि अडिग रहेका जस्ता देखिने नारी फिगर भेटिन्छन् तर अघिल्तिर केही न केही अवरोध खडा भएको देखिन्छ । ती अवरोध कतै कतै त सुनौला काँडेतार जस्ता देखिन्छन् ।

नारीले लक्ष्यमा पुग्न कहिले पुरानो सामाजिक चिन्तनको अवरोध, कहिले परिवारकै अवरोध त कहिले सांस्कृतिक परिपाटीको अवरोध हाम्रो समाजमा छँदै छन् । प्रमिलाका चित्र नियाल्दै जाँदा यस्तै अवरोधको बोध हुन्छ । प्रायः नारी फिगर र भावलाई चित्रमा उतार्न रुचि राख्ने बज्रचार्यको यो बाह्रौं एकल प्रदर्शनी हो ।

करिब एक वर्षअघि पनि उनले ‘मेरो सेरोफेरो’ शीर्षकमा पनि नारीकै विचार, वरिपरिका परिवेशलाई चित्रमा प्रस्तुत गरेकी थिइन् । आफू नारी भएकै कारणले महिलाका विषयका भाव अभिव्यक्त गर्न सजिलो हुने उनको अनुभव छ ।

प्रदर्शनीमा रहेका नारी सिरिजका १५ कलाकृतिमा संघर्षशील नारी पात्रलाई नै केन्द्रमा राखेकी छन् । एक्रेलिक माध्यममा बनाइएका उनका प्रत्येक नारी चित्रसँगै फूलहरू पनि भेटिन्छन् । फुलिरहेको सिँउडी फूल होस् या कमल र सूर्यमुखी फूल । यी फूलमार्फत उनले नारीको कोमल हृदयसँग तुलना गरेकी छन् । ‘नारीको मन फूलजस्तै अत्यन्तै भावुक र संवेदनशील हुन्छ,’ उनले भनिन्, ‘विविध प्रकृतिका फूलझैं नारीका अनुभूति समय क्रममा निर्भर रहन्छ ।’

कलाकृतिमा भने फूलहरूलाई उनले प्रतीकात्मक रूपमा दर्साएकी हुन् । नीलो, रातो, पहेँलो, हरियो रंगमार्फत पनि उनले नारी चरित्र र मनोविज्ञानको चित्रण गर्न खोजेकी छन् । प्रायः नीलो रंगको सघनतालाई उनले प्राथमिकतामा राखेकी छन् । नीलो आँसुको रंग हो । यसलाई दुःख र पीडाको रंग पनि मानिन्छ ।

फूलिरहेका फूलचाहिँ आशा र सकारात्मकताको सन्देशसहित उनका कलाकृतिमा प्रयोग भएका छन् । दुःख, पीडा र संघर्षबीच पनि उनले निराशाको वकालत गरेकी छैनन् । उनका चित्रले उज्यालोतिरको संकेत गर्छ । अवरोधबीच पनि आशा र उत्साह सञ्चार गर्छ ।

पृथ्वीको सतहभन्दा धेरै टाढा रहेको सूर्यलाई नियालिरहेकी नारीका चित्र झन् उत्तिकै अर्थपूर्ण छन् । बज्राचार्यका अनुसार नारीको सफलताको बाटो आकाशमा रहेको घाम जस्तै टाढा छ तर छुन नसके पनि त्यहाँसम्म पुग्ने हिम्मत राख्ने महिला नै उनले कोरेका चित्रका नायिका हुन् ।

यी नायिका एउटै भूगोल, संस्कार र उमेर समूहबाट आएका छैनन् । उनले विभिन्न उमेर समूह हुँदै पहाडीदेखि तराई मूलका नारीहरूको फिगर कोरेकी छन् । मुलुकका सबैतिर नारी समुदायलाई अप्ठ्यारा झेल्दै अघि बढिरहेका छन् भन्ने अर्थपूर्ण सन्देश उनका चित्रमा पाइन्छ । प्रदर्शनी आगामी असोज ११ गतेसम्म जारी रहने बताइएको छ ।

प्रकाशित : भाद्र २३, २०७६ ०८:१२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×