चिनियाँ विदेशमन्त्री भोलि आउँदै

भ्रमणको उद्देश्य चिनियाँ राष्ट्रपतिको नेपाल भ्रमणको चाँजोपाँजो मिलाउने रहेको हुन सक्ने बुझिएको छ । ‘नेपाल र पाकिस्तानका विदेशमन्त्रीहरूको निमन्त्रणामा चिनियाँ विदेशमन्त्रीले ७ देखि १० तारिखसम्म ती देशको भ्रमण गर्नेछन्,’ प्रवक्ता कङले भने ।

चीनको राज्य परिषद्का सदस्य एवं परराष्ट्रमन्त्री वाङ यीले चीन–अफगानिस्तान–पाकिस्तान विदेशीमन्त्रीस्तरीय बैठकमा भाग लिनुका साथै पाकिस्तान र नेपालको भ्रमण गर्ने उनले जानकारी दिए । असारमा चीनको ल्याउनिङ प्रान्तको तालियान सहरमा दाभोसअन्तर्गत विश्व आर्थिक मञ्चमा सहभागी मन्त्री ज्ञवालीले बेइजिङ पुगेर समकक्षी वाङ यीसँग भेटवार्ता गरेका थिए ।

उक्त भेटमा वाङले उपयुक्त समयमा चीनबाट उच्चस्तरीय भ्रमण गराउने वचन दिएका थिए । सोहीअनुसार उच्चस्तरीय भ्रमणको तालमेल मिलाउन उनी नेपाल जान लागेको स्रोतहरूको दाबी छ । परराष्ट्र मन्त्रालयले जारी गरेको विज्ञप्तिअनुसार चिनियाँ परराष्ट्रमन्त्री वाङ यीले आइतबार ८ तारिखदेखि १० तारिखसम्म नेपालको भ्रमण गर्नेछन् ।