महिनादिन देखि केयू प्रशासनमा ताला, ‘वार्ता’ले निकास दिएन

नगेन्द्र अधिकारी

काभ्रे — विभिन्न माग राखी काठमाडौं विश्वविद्यालय प्राध्यापक संघले प्रशासनिक भवनमा १ महिना अघिदेखि लगाएको ताला अझै खुलाइएको छ । उपकुलपति रामकण्ठ माकजू र रजिष्ट्रार सुवोध शर्माको कार्यालयमा ताला लगाएका प्राध्यापकले डिन, ग्लोबल इन्गेजमेन्ट, लेखा शाखामा पनि तालाबन्दी गरेका हुन् ।

प्रशासन र प्राध्यापक र कर्मचारीका प्रतिनिधीबीच ‘अनौपचारिक’ वार्ता भएपनि त्यसले निकास दिएको छैन ।

स्कुल अफ म्यानेजमेन्टका डिन विजय केसीको संयोजकत्वमा मुकुन्द उपाध्याय र बालकृष्ण लुइँटेल सदस्य रहेको वार्ता समितिले प्राध्यापक र कर्मचारी संघलाई मान्यता दिने अनौपचारिक सहमति गरेपनि विश्वविद्यालय सभा (सिनेट)बाट अनुमोदन गराउने आधार प्रस्तुत नगरेकोले वार्ता सफल हुन नसेकेको संघका पूर्वअध्यक्ष विभूतीरञ्जन झाले जानकारी दिए ।

‘मान्यता दिने विषयमा पटकपटक सहमति गरेर हामीलाई झुक्याइएको छ, उपकुलपतिले पहिले पनि नमान्नु भएको हो,’ झाले भने, ‘सिनेटबाट अनुमोदन गराउने आधार नदेखाएकोले हामीले सहमति गरेनौं ।’ केसी नेतृत्वको वार्ता टोली अमान्य भन्दै प्राध्यापक कर्मचारीले उपकुलपतिसँगै वार्ता हुनुपर्ने अडान राख्दै आएका छन् ।

संविधान र विश्वविद्यालय ऐनले निर्देशित गरेका सुशासनका आधारभूत सिद्धान्त पालना नभएको र विश्वविद्यालय सम्बन्धित सबै पक्षको सहभागितामा संचालन नभएको भन्दै केयूका प्राध्यापक आन्दोलित छन् । विश्वविद्यालयमा भइरहेका नीतिगत र आर्थिक भ्रष्टाचारका विषयमा संघले भ्रष्टाचारमा संलग्नलाई आवस्यक छानबिन गरी कारवाही गर्न माग गर्दा पनि कारवाहीको साटो संरक्षण गरेको, संघसँग विभिन्न समयमा भएका प्रतिवद्धता कार्यान्वयन नभएको भन्दै प्राध्यापक संघ एक महिनादेखि आन्दोलनमा छ ।

आन्दोलित प्राध्यापकले दैनिक कोणसभा, प्रशासनिक भवनअघि माचपार्स गर्दै आएका छन् । प्राध्यापक संघले बिहीबार विभागीय प्रमुख र संयोजकलाई ‘पदाधिकारी भए वार्ता गर्न र प्राध्यापक भए आन्दोलनमा सघाउन’ अनुरोध गरेका थिए ।

आन्दोलित शिक्षक विश्विद्यालयले लिएको परिक्षामा सहभागी नभएपछि विधार्थीलाई नै निरिक्षक राखेर परिक्षा सञ्चालन गरिएको थियो । प्राध्यापकको आन्दोलनमा काठमाडौं विश्वविद्यालय कर्मचारी संघले पनि ऐक्यवद्धता र समर्थन जनाएका छन् । स्कुल अफ मेडिकल साइन्सेसका फ्याकल्टी काउन्सिलले पनि आन्दोलनमा ऐक्यवद्धता जनाएका छन् ।

प्रकाशित : भाद्र २०, २०७६ १६:२०
ADVERTISEMENT
प्रतिक्रिया
पठाउनुहोस्

शिक्षालयलाई लक्षित गरी धरानमा बम विस्फोट, चन्द समूहले गरेको आशंका

प्रदीप मेन्याङ्बो

(सुनसरी) — सुनसरीको धरान उपमहानगरपालिका १८ स्थित बीपी कोइराला स्वास्थ्य विज्ञान प्रतिष्ठान हातभित्र रहेको दिल्ली पब्लिक स्कुल र इटहरी उपमहानगरस्थित सुष्मा गोदावरी कलेजलाई लक्षित गरेर अज्ञात समूहले बम विस्फोट गराएका छन् । 

इटहरी सुष्मा गोदावरी कलेजमा सुतली बम र दिल्ली पब्लिकमा प्रेसर कुकर बम प्रयोग गरिएको प्रहरीले जनाएको छ । बिहीबार राति करिब १२ बजे भएको विस्फोटले दिल्ली पब्लिक स्कुलको मुख्य प्रवेशद्वारमा क्षति पुगेको छ । विस्फोटले उक्त प्रवेशद्वार नजिकै बीपी प्रतिष्ठानको चिकित्सकहरु बस्ने आवासीय भवनहरुका सिसाका झ्यालहरु समेत फुटेका छन् । बिरामी उपचार गर्ने चिकित्सकहरु बसेको आवासीय भवनमा समेत क्षति पुगेको र शैक्षिक संस्थाहरुमा बम विस्फोट गरिनुले सुनसरीमा सुरक्षा चुनौती थपिएको छ ।

प्रहरीले इटहरी र धरानमा गरेको विस्फोट चन्दा नदिँदा तर्साउने नियतले नेत्रविक्रम चन्द समूहले गरेको हुनसक्ने अनुमान गरेको छ । सुनसरी जिल्ला प्रहरी प्रवक्ता प्रहरी नायव उपरीक्षक विनोद शर्माले बम विस्फोट गर्ने समूहको खोजी भइरहेको बताए । उनले भने, ‘मानवीय क्षति नभए पनि बम विस्फोटमा संलग्नको खोजी र अनुसन्धान गरिरहेका छौं ।’

शैक्षिक संस्थालाई लक्षित गरेर बम विस्फोट गराएकोमा उच्च शिक्षालय तथा माध्यमिक विद्यालय संघ सुनसरी (हिसान)का अध्यक्ष मुकुन्द घिमिरेले जुनसुकै बहानामा शिक्षालयमा बम विस्फोट गर्नु आततायी क्रियाकलाप भएको बताए । उनले भने, ‘यस्तो क्रियाकलाप निन्दनीय मात्र होइन राजनीतिक वा अन्य आवारणमा गरेको भए वैचारिक विचलन र क्षयीकरण मात्र हो ।’ हिसानले घटनामा सम्लग्नलाई कडा कारबाहीको माग गरेको छ ।

यसैबीच सुनसरी कांग्रेसले मध्यराति इटहरी र धरानको शैक्षिक संस्थामा भएको बम विस्फोटको विरोध र भर्त्सना गरेको छ ।

प्रकाशित : भाद्र २०, २०७६ १६:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT