सांसद्को प्रश्नमा खानेपानी मन्त्रालयको जवाफ, 'काम सुरु भएको १० महिनामा मेलम्चीको पानी काठमाडौंमा'
काठमाडौँ — खानेपानी मन्त्रालयका सचिव माधव बेल्वासेले मेलम्ची आयोजनाको काम पुन: सञ्चालनमा आएको १० महिनाभित्र काठमाडौंमा पानी आइपुग्ने आश्वासन दिएका छन् ।
सार्वजनिक लेखा समितिको बुधबार सिंहदरबारमा बसेको बैठकमा सांसद्हरुले यत्तिका वर्ष ल्याउन नसकेको मेलम्चीको पानी अब आउने ग्यारेन्टी के छ ? भनी प्रश्न गरेका थिए । झन्डै ९ महिनादेखि अवरुद्ध मेलम्ची खानेपानी आयोजनाका विषयमा लेखा समितिले सम्बन्धित निकायका अधिकारीलाई बोलाएर बुधबार छलफल गरेको हो । आयोजनाको काम जति सक्दो चाँडो अघि बढाउने तयारी रहेको भन्दै सचिव बेल्वासेले पीडित मजदुरहरुको ज्याला सरकारले दिने तयारी भइरहेको जानकारी दिए ।
इटालियन कम्पनी सीएमसीले काम लगाएका ६ सय ८० मजदुरको ३ करोड २० लाख भुक्तानी दिनुपर्नेछ । मजदुरहरुले पहिलेको भुक्तानी नभएसम्म काम नगर्ने अडान लिइरहेका छन् ।
सचिव बेल्वासेले मजदुरको रकम सरकारले व्यहोर्ने भए पनि स्थानीय ठेकेदारहरुको भने दिन नसकिने प्रस्ट पारे । स्थानीय ठेकेदारको माग सम्बोधन नभए मेलम्चीको काम अघि बढाउन सहज छैन ।
छलफलमा खानेपानी मन्त्रालयका सचिव बेल्वासे, मेलम्ची खानेपानी आयोजनाका प्रमुख सूर्यप्रसाद कँडेल, कर्मचारी र काठमाडौं उपत्यका खानेपानी लिमिटेड (केयुकेएल)का प्रतिनिधि सहभागी थिए । सांसदहरुले इटालियन ठेकेदार कम्पनी सीएमसीले छोडेपछि यत्तिको समयसम्म किन काम नगरेको, गुणस्तरिता नभएको, स्थानीय मजदुर र ठेकेदारहरु भुक्तानीको विषय राखेका थिए । बैठकमा लेखराज भट्ट, राजेन्द्रकुमार केसी, सूर्यप्रसाद पाठक, मिना बुढाथोकी, प्रेम आले लगायतले बोलेका थिए ।
सचिव बेल्वासेले सिनो हाइड्रोसँगको सम्झौता अन्तिम चरणमा पुगेको पनि बताए ।
यो पनि
प्रकाशित : भाद्र १८, २०७६ १३:१२