सुर्खेतमा सेनाको एयर वेस

कृष्णप्रसाद गौतम

सुर्खेत — नेपाली सेनाले काठमाडौंबाहिर पहिलोपल्ट सुर्खेतमा एयर वेस सञ्चालनमा ल्याएको छ । प्रधानसेनापति पूर्णचन्द्र थापाले मंगलबार एयर वेसको उद्‌घाटन गरे । 

वेसमा तत्काल एमआई–१७ सहित २ वटा हेलिकप्टर तैनाथ अवस्थामा राखिएको उत्तरपश्चिम पृतना मुख्यालयले जनाएको छ । कर्णाली र सुदूरपश्चिम प्रदेशका जिल्लामा आपतकालीन उद्धार, ढुवानी र राहत वितरणलगायत कार्यलाई लक्षित गरी एयर वेस सञ्चालमा ल्याएको हो ।

उद्धार छिटो र कम लागतमा हुने भएकाले सुर्खेतमै वेस स्थापना गरिएको पृतनाले जनाएको छ । सेनाका अनुसार वेस स्थापना गरिएसँगै ढुवानी सहज भइ विकास निर्माणका कार्यले तीव्रता पाउने अपेक्षा गरिएको छ ।

हवाइ सेवा क्षमता वृद्धिका लागि एयर वेसमा ह्यांगर निर्माणको कामसमेत सुरु गरिएको सेनाले जनाएको छ । वेस सञ्चालनमा ल्याइएसँगै आपतकालीन र जटिल अवस्थाका विरामी, दुर्घटनाका घाइते र प्राकृतिक प्रकोपमा परेका व्यक्तिको उद्धार र राहतमा सहज हुने मुख्यालयले जनाएको छ ।

प्रकाशित : भाद्र १७, २०७६ १९:५६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

प्रदेशी विरुद्ध सम्पत्ति शुद्धीकरण मुद्दा

कान्तिपुर संवाददाता

काठमाडौँ — मिटरब्याजको धन्दा चलाएको र ठगी गरेको आरोपमा पक्राउ परेका सर्लाहीका श्याम प्रदेशी विरुद्ध प्रहरीले सम्पत्ति शुद्धीकरणसम्बन्धी मुद्दामा अनुसन्धान अगाडि बढाएको छ ।

सम्पत्ति शुद्धीकरण अनुसन्धान विभागको अनुमतिमा जिल्ला प्रहरी कार्यालय सर्लाहीले प्रदेशीको सम्पत्ति विवरण खोज्न थालेको हो । प्रहरीले प्रदेशी र उनको परिवारका सदस्यको नाममा रहेको बैंक खाता रोक्का गर्न राष्ट्र बैंकमार्फत पत्राचार गरेको छ भने उनको जग्गा बेचबिखन रोक्न मालपोत कार्यालयमा पत्राचार गरेको छ ।

जिल्ला प्रहरी कार्यालय सर्लाहीका प्रमुख एसपी गोपालचन्द्र भट्टराईले विभागले अनुमति दिएपछि अनुसन्धान थालिएको बताए । उनले प्रदेशीको नाममा रहेको चल–अचल सम्पत्ति र त्यसको स्रोतबारे विस्तृत अनुसन्धान गरेर विभागलाई प्रतिवेदन बुझाइने बताए । प्रदेशीले विपन्न, निरक्षर र दलित समुदायका व्यक्तिलाई ऋण दिएर दोब्बर–तेब्बर रकमको कागजमा ल्याप्चे लगाउन लगाएको प्रमाण भेटिएको छ । कान्तिपुरले फेला पारेको कागजमा श्यामले १ सय ९९ जनालाई यसरी ऋण दिएको देखिन्छ ।

परिस्थितिको फाइदा उठाउँदै ऋण दिएबापत २० देखि २५ प्रतिशत कमिसन लिने, ३६ प्रतिशतभन्दा धेरै चक्रीय ब्याजमा ऋण लगाउने, समयमै ब्याज नतिर्नेलाई दैनिक एक हजारसम्म हर्जाना तिराउने र फर्जी कागजका आधारमा अदालतमा मुद्दा हाल्ने उनको शैली देखिन्छ ।

जिल्ला प्रहरी कार्यालय सर्लाहीका अनुसार प्रदेशीले आफ्नो र परिवारका विभिन्न सदस्यको नाममा जिल्ला अदालत सर्लाहीमा हालेको मुद्दामध्ये ३९ वटामा उनको पक्षमा फैसला भइसकेको छ । जिप्रका सर्लाहीका अनुसार मंगलबारसम्म एकजना पीडितले मात्रै प्रहरीमा ठगी मुद्दा दर्ता गरेका छन् । अन्य पीडितले सामूहिक निवेदन दर्ता गर्ने प्रक्रिया थालेको उनले जानकारी दिए ।

प्रदेशीमाथि यौन उत्पीडनको आरोप लाग्दै आएको छ । उनले छोरी–चेली ल्याइदिए ऋण माफ गरिदिनेसम्मको प्रलोभन दिने गरेको पीडितले खुला रूपमै बताउँदै आएका छन् । एक वर्षअघि घरमा काम गर्ने गाउँकै एक मण्डल थरकी बालिकालाई जबर्जस्ती करणी गरेको उनीमाथि लागेको थियो । तर पीडित परिवार आर्थिक प्रलोभनमा परेर अदालतमा बयान फेरेपछि प्रदेशी थुनामुक्त भएको एक प्रहरी अधिकारीले बताए ।

प्रदेशीको मिटर ब्याजको पासो सहन नसकेर जिल्लामा तीन जनाले आत्महत्या गरिसकेको स्थानीय कमल बुढाथोकीले बताए । लालबन्दी नगरपालिका–३ जब्दीका दुर्गादेवी चौधरीले लिएको २ लाख कर्जाको ब्याजसमेत चुक्ता गरेपनि सावाँ बाँकी रहेको भन्दै मुद्दा दर्ता गर्ने र थुनामा पठाउने भन्दै धम्क्याएपछि चौधरीले आत्महत्याको बाटो रोजेकी बुढाथोकीले बताए ।

चौधरीको आत्महत्या पश्चात ससुरा श्रीकान्त चौधरीलाई पनि प्रदेशीले तारन्तार ताकेता र धम्की दिन थालेपछि उनले पनि आत्महत्या गर्नुपरेको बुढाथोकीको भनाई छ ।

यो पनि पढ्नुहोस्ः

प्रकाशित : भाद्र १७, २०७६ १९:३८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT