प्रदेश २ का १० तहमा अझै गाउँसभा भएन

सुनिता बराल

बर्दिवास, महोत्तरी — प्रदेश २ का ५९ वटा गाउँपालिका मध्ये ३ जिल्लाका १० वटा गाउँपालिकाले अझै गाउँसभा गरेको छैन । सभा नभएपछि ती सबै गाउँपालिकामा काम र विकास निर्माण रोकिएको छ ।


सप्तरीको राजगढ गाउँपालिकाले प्रमुख प्रशासकीय अधिकृत नहुँदा सभा हुन सकेन् । गाउँपालिका अधिकृत, नायबसुब्बा, खरिदारलगायत धेरै कर्मचारी रिक्त रहेकाले कर्मचारी अभावमा सभा गर्न नसकिएको राजगढ गाउँपालिका अध्यक्ष परमानन्द यादवले बताए ।


भदौ ९ गते उपप्रमुखको कुर्सीमा बाख्रा–खसी ल्याएर बाँधेपछि सप्तरीकै वलान–बिहुल गाउँपालिकाको गाउँसभा गर्ने प्रक्रिया सेलाएको छ । न्यायिक समितिमा आफ्नो विरुद्धमा मुद्दा दर्ता गराएको भन्दै स्थानीय सुजित साह कानु र अन्य केही व्यक्तिले आफ्नो कुर्सीमा बाख्रा–खसी ल्याएर बाँधेपछि काम गर्ने वातावरण नै नभएको गाउँपालिका उपाध्यक्ष रुबी गुप्ताले बताइन् ।


गाउँपालिका र जनप्रतिनिधिको अपमानसहितको काममा संलग्नलाई कार्वाही र काम गर्ने वातावरण हुनुपर्ने गुप्ताले माग गरेकी छिन् ।

पर्सा जिल्लाको विन्दावासिनी गाउँपालिकाले पनि अहिलेसम्म सभा गरेको छैन । गाउँपालिकाकी उपप्रमुख किरणदेवी गुप्ताले पालिकाको कामलाई कर्मचारीले वेवास्ता गरेका कारण सभा हुन नसकेको बताइन् । गुप्ताले गाउँपालिकाका प्रमुखले पनि सभा गराउनेप्रति चासो नदेखाएकाले गाउँपालिकाको कामकाज ठप्प रहेको बताइन् ।


सिराहाको औरही गाउँपालिकामा भने कर्मचारी समस्या नरहे पनि अल्पमत/बहुमतका कारण सभा हुन सकेको छैन् । अध्यक्ष सिद्धार्थ यादवले आफूलाई असफल बनाउन वडाध्यक्षहरुले सभाको बातावरण बन्न नदिएको आराेप लगाएका छन् ।


पर्साको सखुवा पर्सौनी, विन्दवासीनी, पकाहा मैनपुर, धोविनी र सिराहाको औरही तथा सप्तरीको राजगढ, महादेवा, बलान विहुल तिरहुत र छिन्नामस्ता गाउँपालिकामा अझै गाउँसभा हुन सकेकाे छैन्।


गाउँपालिका राष्ट्रिय महासंघ प्रदेश २ ले गाउँपालिकामा समस्याको चाङ रहेको र संघले गाउँपालिकालाई दिएको अधिकार पनि कटौती गर्दै लगेकाले अधिकार प्राप्तिका लागि दबाव दिन गाउँपालिका प्रमुख–उपप्रमुखको बैठकले १२ वटा निर्णय गरेको महासंघ प्रदेश २ का अध्यक्ष विजयकुमार चौरसियाले जानकारी दिए ।


प्रदेश २ का गाउँपालिकाले प्रमुख प्रशासकीय अधिकृत नभएको, जनप्रतिनिधिहरुबीच आवश्यक समन्वय हुन नसकेको, अल्पमत बहुमतका कारण पनि सभा हुन नसकेको बताएका छन् । प्रशासकीय प्रमुख र अन्य कर्मचारीको पनि व्यवस्थापनका लागि संघीय मामिला तथा सामान्य प्रशासन मन्त्रालयाको ध्यानाकर्षण गराउने महासंघले निर्णय गरेको छ ।


गाउँपालिका महासंघ प्रदेश २ का अध्यक्ष नै प्रमुख रहेकाे पर्साको पकहा मैनपुर गाउँपालिकाले पनि सभा गराउन सकेको छैन् । सभा नहुनुको कारण कर्मचारीको अटेरी गरेको अध्यक्ष चौरसियाले बताए ।


गाउँपालिका राष्ट्रिय महासंघका महासचिव वंशलाल तामाङले कर्मचारीलाई संघले चलाउने हुदाँ स्थानीय सरकारलाई कर्मचारीले नटेर्ने र आफूअनुकुल भए काम अगाडि बढाउने गरेकाले अधिकांश गाउँपालिकाले सोचे जसरी काम हुन सकेको बताए । प्रकाशित : भाद्र १४, २०७६ २१:२९

प्रतिक्रिया
पठाउनुहोस्
ADVERTISEMENT
ADVERTISEMENT

निगमको जहाजमा जापानी महिला नेतृ

घनश्याम खडका

काठमाडौँ — बन्द भएको १३ वर्षपछि खुलेको नेपाल बायु सेवा निगमको काठमाडौंबाट ओसाकासम्मको सिधा उडानमा जापानका तीन महिला सांसदहरुले यात्रा गरेका छन् । 


निगमले जहाज सुचारु गरेको अवसर पारी दुई दिने नेपाल भ्रमणमा आएका उनीहरु बिहीबार राति काठमाडौंबाट ओसाकाका लागि उडेका थिए । जापानको लिब्रल डेमोक्रेटिक पार्टी (एलडिपी) का तीन महिला सांसदहरुले निगमको जहाज चढी सिधा उडान सुरु भएकामा खुसी प्रकट गरेका हुन् ।

‘म मध्यरातमा यहाँबाट उड्नेछु र जति जति पूर्वतिर गयो उतिउति उज्यालोलाई पच्छ्याउँदै झुल्के घाममा जापान पुग्नेछु’ काठमाडौंबाट उड्नु अघि जापानी दूतावासले आयोजना गरेको जमघटमा बोल्दै पूर्व रक्षामन्त्री समेत रहेकी एलडिपीकी प्रमुख उपमहासचिव तोमामी इनादाले भनिन्, ‘यो उज्यालो नेपाल र जापानको मैत्रीपूर्ण सम्बन्धको शुभ संकेत हो ।’

जापानको माथिल्लो सदन हाउस अफ काउन्सिलर्सकी सांसद फुसाए ओता र तल्लो सदनकी सदस्इ मिओ सुगिता पनि तोमामीले नेतृत्व गरेको टोलीमा सहभागी भएका थिए । आफूहरु नेपालीको हँसिलो अनुहार र उदात्त स्वभावले प्रभावित भएको भन्दै उनीहरुले नेपाल भ्रमण वर्ष २०२० लाई सघाउन जापान तयार रहेको सन्देश पनि दिए ।

‘यो हाम्रो पहिलो नेपाल आगमन हो र निकै छोटो भएकाले काठमाडौंबाहिर जान पाइएन’ आोसकाको पहिलो महिला मेयर समेत रहेकी फुसाएले भनिन्, ‘अर्को पटक अलिक समय लिएर हामी आउँछौं र यहाँका भित्री बस्तीहरुमा पनि पुग्छौं, नेपाल घुम्न लायक साह्रै रमाइलो देश रहेछ । यो सन्देश हमी जापानमा पनि दिन्छौं र नेपाल भ्रमण वर्षमा हाम्रा नागरिकहरुलाई घुम्न जान भन्छौं ।’

उनीहरुले राष्ट्रपति विद्यादेवी भण्डारी, परराष्ट्र मन्त्री प्रदीप ज्ञवाली र महिला, बालबालिका तथा जेष्ठ नागरिक मन्त्री थाममाया थापासँग शिष्टाचार भेट गरेका थिए । महिला सांसदको उक्त टोलीले जापान सरकारको अनुदानमा निर्माणाधीन थापाथलीस्थित प्रसूति गृहको भवन अवलोकन पनि गरेको थियो ।

प्रकाशित : भाद्र १४, २०७६ २१:०८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×