कांग्रेस बैठकमा हिन्दु राज्यबारे बहस, नेताहरुबीच घोचपेच

कुलचन्द्र न्यौपाने

काठमाडौँ — कांग्रेसको केन्द्रीय कार्यसमिति बैठकमा हिन्दु राज्यका बारेमा बहस सुरु भएको छ । यसअघि फाट्टफुट्ट धर्मबारे कुरा उठ्ने भए पनि बैठकमा लामो बहस चलेको थिएन । राजनीतिक प्रस्तावमाथि जारी छलफलका क्रममा केन्द्रीय सदस्यहरुले पार्टीको सिद्धान्तसमेत धार्मिक स्वतन्त्रता रहेको भन्दै धर्मनिरपेक्षताबारे पार्टीको दृष्टिकोण बदल्नु पर्ने माग गरेका हुन् ।

कांग्रेस संसदीय दलका प्रमुख सचेतक बालकृष्ण खाँणले हिन्दु राष्ट्रको मुद्दाप्रति पार्टी गम्भीर बन्नुपर्ने बताए । ‘पार्टीको चार तारामध्ये एउटा ताराको अर्थ धार्मिक स्वतन्त्रता हो । सरकार आफैंले राज्य कोषबाट होली वाईनजस्ता कार्यक्रम गरेर आम नेपालीको धार्मिक आस्थामाथि प्रहार गर्‍यो’ खाँडले भने, ‘महासमिति बैठकमा पनि झन्डै आधा सदस्यहरुले हिन्दु धर्मको पक्षमा हस्ताक्षर गरेर पार्टीलाई बुझाएका छन् । महासमिति बैठकले उठाएका विषयमा समेत पार्टी गम्भीर बन्नुपर्छ ।’

कांग्रेस नेता शेखर कोइरालाले आगामी पार्टी महाधिवेशनमा हिन्दु राज्य स्थापना गर्नेबारे पार्टीभित्रै ठूलै दबाव खडा हुने संकेत गरेका छन् । केन्द्रीय सदस्य फरमुल्लाह मंसुरले बिहीबारको बैठकमा महामन्त्री सशांक कोइराला र केन्द्रीय सदस्य शेखर कोइराला हिन्दु राज्य स्थापनाका लागि लागेको भन्दै आपत्ति प्रकट गरेका थिए । ‘राष्ट्रियता जनावर गाई काट्न पाइँदैन भन्नु गलत हो ? होली वाईनको विरोध गर्ने तर संविधानमा लेखिएको ‘प्रलोभनमा धर्म परिवर्तन गर्न पाइँदैन भन्नु गलत हो ?’ शुक्रबारको बैठकमा शेखरले भने, ‘पार्टीको १४ औं महाधिवेशनमा हिन्दु राष्ट्रको विषय चर्को रुपले उठ्छ । यसलाई कसरी व्यवस्थापन गर्ने हो त्यसतर्फ हाम्रो ध्यान जान जरुरी छ ।’ मंसुरले दुई कोइरालाप्रति लक्षित गर्दै व्यवसाय गर्ने अनि बाबु–आमाको विरासतमा राजनीति गर्ने ? भन्दै आक्रोश पोखेका थिए ।

‘निरंकुश पञ्चायतविरुद्ध प्रजातान्त्रिक आन्दोलनमा पटक–पटक प्रहरीको लाठी खाँदै जेल गएका छौं, निरंकुशताविरुद्ध हरेक आन्दोलनमा हामी अग्रपंक्तिमा उभिएका छौं, आन्दोलनको मैदान र जेलमा हुँदै गर्दा कति जना कहाँ हुनुहुन्थ्यो ?' कोइरालाले मंसुरको आक्रोशको जवाफ दिँदै भने, ‘हामी सबै आफ्नो कर्मले यहाँसम्म आएका हौं, कसैको दाया र मायाले आएका होइनौं ।’

केन्द्रीय सदस्य एनपी सावदले भने हिन्दु धर्मको पक्षमा धारणा राखेका थिए । केन्द्रीय सदस्य ज्ञानेन्द्रबहादुर कार्कीले हिन्दु धर्मको एजेण्डा पार्टीभित्र प्रवेश गराएर मुलुकलाई थप अन्योलमा धकेल्न नहुने बताए । ‘नयाँ–नयाँ एजेण्डा प्रवेश गराएर मुलुकलाई थप अन्योलमा पुर्‍याउन हुन्न, संविधानमा जे व्यवस्था छ, त्यसैलाई मानेर जानुपर्छ’ उनको भनाइ थियो । बैठकमा केन्द्रीय सदस्य गुरु घिमिरे, मीन विश्वकर्मा, उमाकान्त चौधरी, गोविन्द भट्टराई, अमृत अर्याललगायतले सरकारविरुद्ध सडक र सदनमा प्रभावकारी प्रतिपक्ष बन्नुपर्ने बताएका थिए ।

प्रकाशित : भाद्र १३, २०७६ २०:२६
प्रतिक्रिया
पठाउनुहोस्

हिमालको हिउँ उपयोग गर्ने ज्ञान जरुरी : खनाल

कान्तिपुर संवाददाता

काठमाडौँ — पूर्वप्रधानमन्त्री तथा नेकपाका वरिष्ठ नेता झलनाथ खनालले समाजवादी शिक्षा समान हैसियतमा सीपमूलक, सिर्जनशील र उत्पादनशील हुनुपर्ने बताएका छन् ।

‘नेपाली धरातलमा समाजवाद निर्माण गर्ने हो,’ नेपाल समुद्र नजिक नभएकाले पौडिने सीपभन्दा हिमालको हिउँको उपयोग गर्ने ज्ञान जरुरी रहेको उल्लेख गर्दै खनालले भने, ‘हिमालको हिउँको प्रयोग सिकायौं भने अर्थपूर्ण हुन्छ। जलस्रोत, पर्यटनको ज्ञान सीप महत्वपूर्ण छ। समाजवाद निर्माण गर्न व्यवहारसँग गाँसिने नयाँ अनुशासन, नैतिकता, संस्कृति सिकाउनु पर्छ। श्रम र ज्ञान दुवै जोडिएको हुनुपर्छ।’

विश्वविद्यालय प्राध्यापक तथा विद्यालय शिक्षक एसोसिएसन नेपाल (यूएसटीएएन)को मुखपत्र ‘उर्नी' सार्वजनिक कार्यक्रममा बोल्दै नेता खनालले अध्ययन अनुसन्धानलाई जोड दिनु पर्ने र त्यसबाट आएको परिणामलाई व्यवहारमा लागू गर्नुपर्ने बताए।

‘समाजवाद निरन्तर प्रक्रिया हो, कुनै सूत्र होइन,’ उनले भने, ‘पूर्वीय सभ्यताको गहन अनुसन्धान हुनुपर्छ।’

प्रकाशित : भाद्र १३, २०७६ २०:१७
पूरा पढ्नुहोस्
प्रतिक्रिया
पठाउनुहोस्