ज्येष्ठ नागरिकलाई छुट दिन सकिँदैन : संघ

कान्तिपुर संवाददाता

काठमाडौँ — वायुसेवा सञ्चालक संघले ७० वर्षमाथिका नागरिकलाई आन्तरिक उडानमा ५० प्रतिशत छुट दिन नसकिने जनाएको छ ।

संस्कृति पर्यटन तथा नागरिक उड्डयनमन्त्री योगेश भट्टराईले सोमबार एकवर्षे कार्ययोजना सार्वजनिक गर्दै आन्तरिक उडानमा ज्येष्ठ नागरिकलाई छुट दिइने घोषणा गरेका थिए । यसबारे धारणासहित संघले मंगलबार मन्त्रालयमा जवाफीपत्र पठाएको अध्यक्ष पवित्र कार्कीले कान्तिपुरसँग बताए ।

‘पर्यटनमन्त्रीले हामीसँग सल्लाह नै नगरी यो कार्यक्रम ल्याउनुभएछ,’ यसबारे हामीले गरेको सदस्यहरूसँगको बैठकपछि ज्येष्ठ नागरिकलाई आन्तरिक उडानमा ५० प्रतिशत छुट दिन सक्दैनौं भनेर लिखित विवरण पठाएका छौं,’ कार्कीले भने । संघले मंगलबारै पत्र मन्त्रालयमा दर्ता गराएको छ । भट्टराईले निजी वायुसेवा सञ्चालकहरूसँग समन्वय गर्दै तीन महिनाभित्र अध्ययन गरी यो लागू गर्ने घोषणा गरेका थिए । संघका १५ सदस्य वायुसेवा कम्पनीले पछिल्लो आर्थिक अवस्थासहित वायुसेवा कम्पनीको विस्तृत विवरण मन्त्रीलाई पठाएका हुन् ।

प्रकाशित : भाद्र ११, २०७६ २१:१२
प्रतिक्रिया
पठाउनुहोस्

जपानमा भारी वर्षा 

एएफपी

टोकियो — जापानमा भारी वर्षापछि दुई व्यक्तिको मृत्यु भएको छ । वर्षाका कारण बाढी र पहिरोको चेतावनीसँगै ६ लाख ७० हजार व्यक्तिलाई सुरक्षित स्थानमा सारिएको छ ।

जापानको क्युसु प्रान्तको उत्तरीे भागमा पर्ने माथिल्लो स्थानमा सरकारले उच्च सर्तकताको चेतावनी दिनुको साथै सो क्षेत्रबाट करिब १० लाख मानिसलाई सो स्थान छोड्न सल्लाह दिइएको छ ।

सरकारी अधिकारीले दुई व्यक्तिको मृत्युको पुष्टि गरेका छन् । पश्चिमी सागा प्रान्तमा कारसहित बगाइएको एक व्यक्ति शव फेला परेको थियो । फुकुओका प्रान्तमा एक कारबाट भाग्न खोज्दा भीषण बाढीमा फसेर अर्को एक व्यक्तिको मृत्यु भएको थियो ।

यद्यपि सरकारका प्रवक्ता योसिहिडे सुगाका अनुसार तेस्रो व्यक्तिको पनि भीषण वर्षाबाट हृदयाघातका कारण मृत्यु भएको छ । चिकित्सकद्वारा यस मृत्युको पुष्टि भए तापनि सरकारले पुष्टि गरेको छैन ।

बाढी, पहिरो र घर डुवानमा परेको बाढीको कारण विभिन्न क्षेत्र क्षति विवरण प्राप्त भए तापनि अझै बढी क्षतिको सम्भावना रहेको सुगा बताए ।

स्थानीय अधिकारी त्यहाँका बासिन्दाको अवस्थालाई ध्यान राखेर सो स्थान छोड्न सल्लाह दिएका छन् । अग्नि नियन्त्रण र प्रकोप व्यवस्थापन विभागका अनुसार यसअघि नै सागा र नागासाकी क्षेत्रमा बाढीबाट घरहरु बगाएको विवरण प्राप्त भइसकेको थियो ।

प्रकाशित : भाद्र ११, २०७६ २०:३२
पूरा पढ्नुहोस्
प्रतिक्रिया
पठाउनुहोस्