व्यक्तिलाई बेचिएको जग्गा संस्थामै फर्काउन पहल

विनोद भण्डारी

विराटनगर — व्यक्तिका नाममा नामसारी गरिएको मोरङ बेलबारी–२ को सहारा बालग्रामको जमिन संस्थाकै नाममा फिर्ता गराउन बेलबारीका राजनीतिक दल र नागरिक अगुवाले पहल सुरु गरेका छन् ।

ZenTravel

अनाथ बालबालिकाको संरक्षणका लागि चार अमेरिकी नागरिकले जमिन खरिद गरी भौतिक पूर्वाधार निर्माण गरेर दुई दशकअघि तत्कालीन प्रतिनिधिसभा सदस्य हर्कमान तामाङसहितको समुदायलाई हस्तान्तरण गरिएको थियो । उक्त सार्वजनिक संस्थाको जग्गा व्यक्तिको नाममा नामसारी भएको थाहा पाएपछि स्थानीय बासिन्दा आक्रोशित भएका हुन् ।

नेकपा बेलबारी नगर समितिले सोमबार सचिव रविन थापाको नेतृत्वमा पाँच सदस्यीय छानबिन समिति गठन गरेको छ । समितिले पाँच दिनमा आफ्नो प्रतिवेदन बुझाउने र संस्थाको जमिन बिक्रीमा संलग्न पार्टीका जुनसुकै तहका नेता भए पनि कारबाही गर्ने नगर अध्यक्ष पर्शुराम सुवेदीले बताए ।

‘कुनै पनि हालतमा जमिन संस्थाकै नाममा फर्काएरै छाडछौं,’ उनले भने । सहाराका संस्थापक अध्यक्ष पूर्वप्रतिनिधिसभा सदस्य हर्कमान तामाङ र हालका अध्यक्ष शिव बरालले उक्त संस्थाको नाममा रहेको जग्गामध्ये २८ कट्ठा ३ धुर जमिन स्थानीय व्यवसायी डम्बरबहादुर तामाङलाई बेचेर २०७५ मंसिर ११ गते नामसारी गरेको समाचार सार्वजनिक भएपछि स्थानीय राजनीतिक दल र नागरिक अगुवा फिर्ता गराउन एकजुट भएका हुन् ।

जग्गा बिक्री गर्ने कार्यमा संलग्न तामाङ र बराल नेकपाका पुराना कार्यकर्ता हुन् । तामाङ पूर्वसांसद र बराल तत्कालीन बेलबारी गाविसका दुई कार्यकालका अध्यक्ष हुन् । उनीहरू दुवै हाल नगर प्रमुख ज्ञानेन्द्र सुवेदीका सल्लाहकार छन् । तामाङ र सहाराका हालका अध्यक्ष बरालले डम्बरबहादुरसँग ३ करोड रुपैयाँ लिएर संस्थाको नाममा रहेको विभिन्न ८ वटा कित्ताका जग्गामध्ये तत्कालीन हरैंचा ५ ख हाल बेलबारी २ को कित्ता नं. १०७८ को ५ कट्ठा, ७८५ को ७ कट्ठा, १०८३ को ३ कट्ठा, १०८१ को ४ कट्ठा, १०९० को ५ कट्ठा र कित्ता नं. १०१९ को ४ कट्ठा ३ धुर जमिन गत मंसिरमा राजीनामा पास गरेको पुष्टि भएको छ ।

बेलबारी–२ को नेकपा वडा संयन्त्रले उक्त जमिन तत्काल संस्थाको नाममा नल्याइए कडा आन्दोलन गर्ने चेतावनी दिएको छ । वडा संयन्त्र समितिका संयोजक सीताराम न्यौपाने र उपसंयोजक रञ्जित गुरुङले विज्ञप्ति जारी गर्दै जग्गा संस्थाकै नाममा नल्याए जस्तोसुकै कदम चाल्न तयार भएको उल्लेख गरेका छन् । संस्थाको जमिन बेच्ने जुनसुकै तहका कार्यकर्ता भए पनि कारबाही गरिनुपर्ने संयन्त्रको विज्ञप्तिमा छ ।

व्यक्तिको नाममा गएको संस्थाको १ बिघा ८ कट्ठा ३ धुर जमिन फर्काउन सम्बन्धित संस्था, वडा समिति र बेलबारी नगरपालिकासमक्ष नेकपा संयन्त्रले माग गरेको छ । सामाजिक प्रयोजनका लागि स्थापित संस्थाको सम्पत्ति समाज र पार्टी नीतिविपरीत बेचिएको उल्लेख गर्दै संयन्त्रका संयोजक न्यौपानेले फिर्ता ल्याउन अख्तियार दुरुपयोग अनुसन्धान आयोगको पनि ध्यानाकर्षण गरेका छन् ।

बेलबारी–२ का वडाध्यक्ष घनश्याम गौतमले सहाराका सञ्चालकले संस्थाको जग्गा बेचेर क्षमा गर्नै नसकिने गल्ती गरेको उल्लेख गर्दै संलग्नलाई हदैसम्मको कारबाही गरिनुपर्ने बताए । स्थानीय जमिनदारहरूले सस्तो मूल्यमा संस्थालाई जमिन उपलब्ध गराएर संस्था स्थापना भएको स्मरण गर्दै उनले संस्थामा रहेका कम्प्युटर र एउटा गाडी पनि सञ्चालकले हिनामिना गरेको दाबी गरे ।

यस्तै कांग्रेस नगर समितिले पनि विज्ञप्ति जारी गर्दै व्यक्तिको नाममा नामसारी गरिएको संस्थाको जमिन संस्थाकै नाममा फिर्ता नगरिए कडा आन्दोलन गर्ने चेतावनी दिएको छ । नगर सभापति शम्भु भट्टराईले विज्ञप्ति जारी गर्दै सहारा बालग्राममा हाल आश्रय लिइरहेका परिवारलाई कटेज नछाड्न सुझाव दिएका छन् । संस्थाका २८ वटा कटेजमा सुकुम्बासी बसेका छन् ।

तामाङ र बरालले पटक–पटक गरेर आफूबाट लिएको ३ करोड रुपैयाँ फिर्ता नगरेको भन्दै डम्बरबहादुरले जिल्ला अदालतमा मुद्दा हालेका थिए । उनीहरूले अदालती आदेशअनुसार कागजी प्रक्रिया मिलाएर संस्थाको २८ कट्ठा ३ धुर जमिन आफ्नो नाममा पास गरिदिएको डम्बरबहादुरको भनाइ छ । ‘मेरो पैसा फिर्ता दिन्छन् भने म अहिले पनि जग्गा फर्काउन तयार छु,’ उनले भने ।

अमेरिकाको भर्जेनिया राज्यका ड्यानी अनी, एलिसा हाम्फ्रिन, डा. वाल्ट ज्यामी हर्बर र टेनिसीले अनाथ बालबालिकाहरूको पालनपोषण र संरक्षण गर्ने उद्देश्यले दुई दशक पहिला मोरङको बेलबारी २ मा स्थापना गरेर सञ्चालनका लागि तत्कालीन प्रतिनिधिसभा सदस्य हर्कमान तामाङलाई २०५६ भदौ ४ गते हस्तान्तरण गरेका थिए ।

प्रकाशित : भाद्र ११, २०७६ ०८:५९
ADVERTISEMENT
प्रतिक्रिया
पठाउनुहोस्

सामाजिक संस्थाको सम्पत्ति व्यक्तिलाई

विनोद भण्डारी

बेलबारी, मोरङ — चार अमेरिकीले अनाथ बालबालिकाको पालनपोषण र संरक्षणमा सहयोग पुर्‍याउन स्थापना गरिदिएको संस्थाको जग्गा व्यक्तिलाई नामसारी गरिएको पाइएको छ । नामसारीपछि ती जग्गा व्यावसायिक प्रयोजनमा उपयोग गरिएको छ ।


बेलबारी–२ मा दुई दशकअघि स्थापना गरी समुदायलाई सञ्चालन जिम्मा दिइएको संस्थाको जमिन सञ्चालकले व्यक्तिका नाममा पारेका हुन् । अमेरिकी नागरिक ड्यानी अनी, एलिसा हाम्फ्रिन, डा वाल्ट ज्यामी हार्बर र टेनिसीले ‘सहरा परिवार नेपाल बेलबारी’का नाममा २ बिघा ५ कट्ठा ३ धुर जमिन किनेर आवश्यक संरचना निर्माण गरेका थिए । अनाथ बालबालिकाको संरक्षण गर्न जमिन र पूर्वाधार तत्कालीन प्रतिनिधिसभा सदस्य हर्कमान तामाङलाई २०५६ भदौ ४ गते हस्तान्तरण गरेका थिए ।

२०५५ भदौ ५ गते जिल्ला प्रशासन कार्यालय मोरङमा दर्ता भएको उक्त संस्थाको दर्ता नम्बर ८७५ छ । संस्थापक अध्यक्षमा तत्कालीन प्रतिनिधिसभा सदस्य तामाङको नाम उल्लेख छ । प्रशासन कार्यालयका अनुसार संस्था २०७५ असार मसान्तसम्म नवीकरण भएको छ । संस्थाको हालको सञ्चालक समितिको अध्यक्ष शिव बराल हुन् । उनी तत्कालीन बेलवारी गाविसको दुई कार्यकालका अध्यक्ष हुन् ।

कुल जग्गामध्ये २८ कट्ठा ३ धुर जिल्ला अदालत मोरङमार्फत २०७५ मंसिर ११ गते व्यवसायी डम्बरबहादुर तामाङको नाममा सारिएको पाइएको छ । संस्थाका नाममा विभिन्न ८ वटा कित्ता नम्बरमा २ बिघा ५ कट्ठा ३ धुर जग्गा रहेकोमा तत्कालीन हरैँचा–५ ख हाल बेलबारी–२ को कित्ता नं १०७८ को ५ कट्ठा, कि नं ७८५ को ७ कट्ठा, कि नं १०८३ को ३ कट्ठा, कि नं १०८१ को ४ कट्ठा, कि नं १०९० को ५ कट्ठा र कि नं १०१९ को ४ कट्ठा ३ धुर जमिन तामाङलाई नामसारी गरिएको मालपोत कार्यलय बेलबारीको अभिलेखमा छ ।

मालपोतको अभिलेखमा जिल्ला अदालतको मिसिल नम्बर ८५ अन्तर्गत २०७५ मंसिर ११ गते क्षेत्रीय कार्यालयको निर्णयमा अदालतको चलानी नम्बर ४५६० को पत्रअनुसार २०७५ असोज १४ गतेको मिलापत्रअनुसार सहारा परिवार नेपालको नाममा रहेको तत्कालीन हरैँचा–५ ख हाल बेलबारी–२ को कित्ता नं १०७८ को ५ कट्ठा, कि नं ७८५ को ७ कट्ठा, कि नं १०८३ को ३ कट्ठा, कि नं १०८१ को ४ कट्ठा, कि नं १०९० को ५ कट्ठा र कि नं १०१९ को ४ कट्ठा ३ धुर जमिन डम्बरबहादुर तामाङको नाममा आएको उल्लेख छ ।

संस्थाको नाममा अहिले पनि कित्ता नं १९९४ को १० कट्ठा र कि नं १९९६ को ७ कट्ठा जमिन रहेको मालपोतको अभिलेख छ । उक्त जमिनको मूल्य अहिलेको बजार भाउमा प्रतिधुर कम्तीमा दुई लाख रुपैयाँ पर्ने स्थानीयको भनाइ छ । संस्थाको जमिन चोरबाटोबाट व्यक्तिका नाममा ल्याएर उद्यम गर्ने सञ्चालक समितिको उद्देश्यमा खोट भएको उनीहरूको तर्क छ ।

समिति अध्यक्ष बरालले संस्थाको नामको जमिन तामाङको नाममा सारिएको स्विकारे । समितिले संस्थाको जमिनमा रोजगारमूलक उद्योग, कृषि परियोजना, सेक्युरिटी कम्पनीको प्रशिक्षण केन्द्रलगायत रोजगारमूलक कार्यक्रम सञ्चालन गर्ने तयारी गरेर बैंकिङ प्रक्रियाका लागि २८ कट्ठा ३ धुर जमिन तामाङलाई नामसारी गरिएको उनको भनाइ छ ।

‘संस्थाको नामबाट बैंकिङ कारोबार गर्न समस्या भयो’, बरालले भने ‘त्यसैले तामाङको नाममा जमिन सारेर बैंकबाट ऋण लिएर थप कार्यक्रम सञ्चालन गर्ने तयारी गरिएको हो ।’ मोरङ जिल्ला प्रशासनले कार्यालयमा दर्ता भएका कुनै पनि सामाजिक संघसंस्थाको चल/अचल सम्पत्ति कुनै पनि हालतमा व्यक्तिका नाममा नामसारी गर्न नमिल्ने बताएको छ ।

संस्थाका संस्थापक अध्यक्ष तथा पूर्वप्रतिनिधिसभा सदस्य तामाङले उक्त जमिन अमेरिकी नागरिकले नभई आफैंले खरिद गरेको दाबी गरे । ‘जमिन म आफैंले खरिद गरेको हुँ,’ उनले भने, ‘अमेरिकी नागरिकहरूले भवन निर्माण गर्न मात्र केही आर्थिक सहयोग गरेका हुन् ।’ जमिन जुनसुकै प्रयोजनमा आफूले प्रयोग गर्न सक्नेसमेत उनले बताए । तर संस्थाको भवनको भित्तामा लेखिएको शिलालेखमा ‘अमेरिकाको भर्जिनिया राज्यका ड्यानी अनी, एलिसा हाम्फ्रिन, डा वाल्ट हर्बर र टेनिसीको संयुक्त लगानीबाट निर्मित सहारा बालग्राम, सहराग्राम’ उल्लेख छ ।

प्रकाशित : भाद्र ९, २०७६ १२:४४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×